விலையில்லா மடிக்கணினி நிலை என்னாச்சு? நிறுவனங்கள் தயக்கம்

இந்த நிதியாண்டுக்குள் மாணவர்களுக்கு, 9.12 லட்சம் மடிக்கணினிகள்
வழங்கப்படும் என, முதல்வர் வாக்குறுதி அளித்துள்ள நிலையில், துறைச் செயலர்
மாற்றம் மற்றும் டாலர் விலை ஏற்றத்தால், கொள்முதல் பணியில் கடும் தொய்வு
ஏற்பட்டு உள்ளது.

மாணவர்களுக்கு இலவச மடிக்கணினி வழங்குவதற்காக, கடந்த அக்டோபர் 4ம்
தேதி, சர்வதேச ஒப்பந்தப் புள்ளி திறக்கப்பட்டது. தொழில்நுட்ப ஒப்பந்தப்
புள்ளியில், 19 நிறுவனங்கள் பங்கேற்றன. ஐந்து நிறுவனங்கள் அதன் பிறகு
நடந்த விலை ஒப்பந்தப் புள்ளியில், உள்ளதிலேயே குறைவான விலையாக, 13
ஆயிரத்து 939 ரூபாயை, லெனோவா நிறுவனம் குறிப்பிட்டிருந்தது. மிகப் பெரிய
எண்ணிக்கையில் மடிக்கணினிகள் தேவைப்படுவதால், வழக்கத்துக்கு மாறாக,
ஒப்பந்தப் புள்ளி கோரிய, முதல் ஐந்து நிறுவனங்களை அழைத்துப் "எல்காட்'
பேசியது. அனைத்து நிறுவனங்களும், அதே விலைக்கு மடிக்கணினிகள் வழங்க
ஒப்புக்கொண்டன. அதன் படி, லெனோவா மூன்று லட்சம், ஏசர் மற்றும்
எச்.சி.எல்., தலா இரண்டு லட்சம், சிராக் 75 ஆயிரம், விப்ரோ 60 ஆயிரம் என,
எண்ணிக்கை நிர்ணயித்து, ஐந்து நிறுவனங்களுக்கும் ஒப்பந்தப் புள்ளி ஏற்பு
கடிதங்கள் (லெட்டர் ஆப் அக்சப்டன்ஸ்) வழங்கப்பட்டன. அடுத்தகட்டமாக,
"இந்நிறுவனங்களுக்கு கொள்முதல் உத்தரவு வழங்கப்பட்ட, 45 நாட்களுக்குள்,
ஒப்புக் கொண்டபடி மடிக்கணினிகளில், 15 சதவீதத்தை வழங்கிட வேண்டும். மார்ச்
31க்குள் மொத்த எண்ணிக்கையையும் வழங்கிட வேண்டும்' என, நிபந்தனை
விதிக்கப்பட்டது. ஆனால், லெனோவா நிறுவனம் மட்டும் தான் இதுவரை கொள்முதல்
உத்தரவைப் பெற்றுள்ளது. இன்னும் ஒரு வாரம் அல்லது 10 நாட்களுக்குள்,
மடிக்கணினிகளை அரசுக்கு அந்த நிறுவனம் வழங்க ஆரம்பித்துவிடும்.

காரணம் என்ன? மற்ற நான்கு நிறுவனங்களும் இன்னும் கொள்முதல்
உத்தரவையே வாங்கவில்லை. இதற்கு காரணமாக, மூன்று விஷயங்கள் கூறப்படுகின்றன.
ஒன்று, இந்தப் பணிகளில் சிறப்புக் கவனம் செலுத்தி வந்த, தகவல்
தொழில்நுட்பத் துறைச் செயலர் சந்தோஷ் பாபு, கடந்த 3ம் தேதி
இடமாற்றப்பட்டது. அவருக்கு மாற்றாக வேறு செயலர் நியமிக்கப்படாமல்,
எரிசக்தித் துறைச் செயலர் கன்னாவுக்கு கூடுதல் பொறுப்பாகத் தான் இந்தத்
துறை வழங்கப்பட்டு உள்ளது. இதனால் ஏற்பட்டுள்ள தொய்வு ஒரு காரணம். அடுத்த
காரணம், இந்த ஒப்பந்தத்துக்கு விண்ணப்பிக்கும் போது, அமெரிக்க டாலருக்கு
எதிரான இந்திய ரூபாயின் மதிப்பு, 42 ரூபாயாக இருந்தது. இப்போது, டாலரின்
மதிப்பு, 52 ரூபாயாக எகிறிவிட்டது. இதனால், ஒப்பந்தம் கோரிய நிறுவனங்கள்,
மலைத்துப் போய் உள் ளன. மூன்றாவது காரணம், அரசு ஒப்பந்தப்புள்ளிகளுக்கே
உரித்தான, "வழக்கமான' நடைமுறை. ஒரு மடிக்கணினிக்கு இவ்வளவு என,
"ஒதுக்கீடு' கேட்கும், அரசியல்வாதிகளால், அரண்டு போயிருக்கின்றன
அந்நிறுவனங்கள். கொடுத்த விலையே கட்டுப்படியாகாத நிலையில், "ஒதுக்கீடு'
செய்து கொண்டிருந்தால், தங்கள் நிறுவனமே திவாலாக வேண்டியது தான் என்பது
அவர்கள் கவலை.

இலக்கு எட்டப்படுமா? இதனால், திட்டமிட்டபடி இந்த
கல்வியாண்டுக்குள் மாணவர்களுக்கு, 9.12 லட்சம் மடிக்கணினிகள்
வழங்கப்படுவதற்கான வாய்ப்பு மிக மிகக் குறைவாகவே இருக்கிறது. ஏற்கனவே,
எட்டு லட்சத்து, 35 ஆயிரம் மடிக்கணினிகளுக்குத் தான், "லெட்டர் ஆப்
அக்சப்டன்ஸ்' வழங்கப்பட்டுள்ளது. ஒப்பந்தம் பெற்ற நான்கு நிறுவனங்கள்
தயங்குவதால், அந்த இலக்கைக் கூட எட்டுவது கடினமாகியுள்ளது.