தாக்குதல் நடத்துவோர் மீது நடவடிக்கை: ஜெ.,வுக்கு உம்மன் சாண்டி கடிதம்

திருவனந்தபுரம்: "தமிழகத்தில், மலையாளிகள் மீது நடத்தப்படும்
தாக்குதல்களை, மாநில அரசு தடுத்து நிறுத்த வேண்டும்; அவர்களுக்கு
பாதுகாப்பு அளிக்க வேண்டும்' என, தமிழக முதல்வர் ஜெயலலிதாவுக்கு, கேரள
முதல்வர் உம்மன் சாண்டி கடிதம் மூலம், வேண்டுகோள் விடுத்துள்ளார்.

முல்லைப் பெரியாறு அணை பிரச்னையால், இரு மாநிலங்களிலும் பதட்டம் நிலவி
வருகிறது. இந்நிலையில், கேரள முதல்வர் உம்மன் சாண்டி, நேற்று முதல்வர்
ஜெயலலிதாவுக்கு கடிதம் அனுப்பியுள்ளார். அக்கடிதத்தில் கூறியுள்ளதாவது:
தமிழகத்தில், மலையாளிகள் மற்றும் அவர்களது நிறுவனங்கள் மீது நடத்தப்படும்
தாக்குதல்கள், தடுத்து நிறுத்தப்பட வேண்டும். தமிழகத்தில், மலையாளிகளுக்கு
பாதுகாப்பு அளிக்க வேண்டும். மலையாளிகளுக்கு எதிராக, குற்ற நடவடிக்கைகளில்
ஈடுபடுவோர் மீது, தமிழக அரசு கடும் நடவடிக்கை எடுக்க வேண்டும்.
தமிழகத்தைச் சேர்ந்த பெண் தொழிலாளர்கள், கேரளாவில் அவமானப்படுத்தப்பட்டதாக
எழுப்பப்பட்ட குற்றச்சாட்டு பொய்யானது. கேரளாவில், தமிழர்களுக்கு முழு
பாதுகாப்பு அளிக்கப்பட்டுள்ளது. அரசியல் கட்சிகளையும், கட்டுப்பாட்டுடன்
நடந்து கொள்ள வேண்டும் என, கேட்டுக் கொண்டுள்ளோம்.

இரு மாநிலங்களிலும் ஏற்பட்டுள்ள பதட்டத்தை தணிக்கவும், அமைதி நிலவவும்,
இரு மாநில முதல்வர்களும் சேர்ந்து, கூட்டாக அறிக்கை வெளியிடவேண்டும். இரு
மாநில மக்களின் அமைதி மற்றும் நல்லிணக்கத்தைப் பாதிக்கும் வகையில்,
முல்லைப் பெரியாறு அணை விவகாரம் சென்றுள்ளது துரதிருஷ்டமானது.
தமிழகத்திலிருந்து கேரளாவுக்கு வரும் யாரும் தாக்கப்படுவதில்லை. அதற்கான
நடவடிக்கைகளை, எங்கள் மாநில அரசு எடுத்துள்ளது. கேரளா - தமிழக எல்லையில்,
போலீசார் பாதுகாப்புப் பணியில் ஈடுபட்டுள்ளனர். குறிப்பாக, குமுளியிலும்,
இதர பதட்டம் நிறைந்த பகுதிகளிலும், பாதுகாப்புப் பணியில் உள்ளனர்.
இருந்தாலும், அதையும் மீறி, அவ்வப்போது தவறான தகவல் பரப்பப்படுகிறது. அது
தடுத்து நிறுத்தப்பட வேண்டும். கேரளாவின் தோட்டத் தொழில் துறையில்,
ஏராளமான தமிழர்கள் பணிபுரிகின்றனர். அவர்கள், மாநிலத்தில் பொருளாதார
வளர்ச்சிக்கு உறுதுணையாக இருக்கின்றனர். தமிழகத்தில் இருந்து, சபரிமலை
அய்யப்பன் கோவிலுக்கு வரும் பக்தர்கள் யாரும் தாக்கப்படவில்லை. மாறாக,
கேரளத்தினரின் செயல்பாடுகளால், அவர்கள் மகிழ்ச்சி அடைந்துள்ளனர்.
போலீசாரும் பக்தர்களுக்கு தேவையான உதவிகளை அளித்து வருகின்றனர்.

தமிழகத்தில் உள்ள பல்வேறு கல்வி நிறுவனங்களில், கேரளாவைச் சேர்ந்த
ஏராளமான மாணவர்கள் படித்து வருகின்றனர். அதேபோல, கேரளாவைச் சேர்ந்த நிறைய
பேர், தமிழகத்தில் உள்ள நிறுவனங்களில் பணிபுரிந்து வருகின்றனர்.
அவர்களுக்கு எல்லாம், பாதிப்பு எதுவும் ஏற்படுமோ என, கேரளாவில் உள்ள
அவர்களின் குடும்பத்தினர் அஞ்சுகின்றனர். எனவே, தமிழகத்தில் உள்ள
கேரளத்தவர்களுக்கு எதிராக, யாரும் வன்முறையில் ஈடுபடாமல் நீங்கள்
பார்த்துக் கொள்ள வேண்டும். தமிழகத்தில் உள்ள சில செய்தி நிறுவனங்கள்,
முற்றிலும் தவறான, பொருத்தமற்ற படங் களை வெளியிட்டு, மக்களை பரபரப்புக்கு
ஆளாக்குகின்றன. இரு மாநிலங்களுக்கு இடையேயான ஒத்துழைப்பு மற்றும்
நல்லெண்ணத்தை, கேரளா எப்போதும் மதிக்கிறது. இவ்வாறு உம்மன் சாண்டி
கடிதத்தில் கூறியுள்ளார்.

"சட்டம் நிறைவேற்ற தயார்': பெங்களூரில் நேற்று நடந்த தென்
மாநிலங்களின் முதல்வர் கள் கூட்டத்தில், கேரள முதல்வர் உம்மன் சாண்டி
பங்கேற்றார். தமிழக அரசு சார்பில் நிதி அமைச்சர் பன்னீர் செல்வம் கலந்து
கொண்டார். அப்போது, பன்னீர் செல்வத்தை சந்தித்த, உம்மன் சாண்டி, முல்லைப்
பெரியாறு விவகாரம் குறித்து பேசினார். இதன்பின் உம்மன் சாண்டி,
செய்தியாளர்களிடம் கூறியதாவது: முல்லைப் பெரியாறு அணை விவகாரத்தில்
சர்ச்சை ஏற்பட்டதற்கு பின், இரு மாநிலங்களின் தலைவர்களுக்கு இடையே நடந்த
முதல் சந்திப்பு இது. இந்த விவகாரத்தில் கேரளாவின் கருத்து என்ன என்பதை,
தமிழக நிதி அமைச்சரிடம் எடுத்துக் கூறினேன்.

முல்லைப் பெரியாறு அணையை பொறுத்தவரை, கேரளாவுக்கு பாதுகாப்பு,
தமிழகத்துக்கு தண்ணீர் என்பது தான், எங்களின் நிலை. இதை அவரிடம்
தெரிவித்தேன். முல்லைப் பெரியாறு தண்ணீர், தமிழகத்துக்கு தேவை என்பதை
நாங்கள் உணர்ந்துள்ளோம். எங்களுக்கு தேவையான காய்கறி, பழங்கள் ஆகியவை
தமிழகத்தில் இருந்து தான் வர வேண்டும். இதனால், இந்த விவகாரம், எங்களின்
கவலையும் கூட. அதே நேரத்தில், இந்த அணை, 115 ஆண்டுகளுக்கு முன், பழைமையான
தொழில்நுட்பத்தை பயன்படுத்தி கட்டப்பட்டது. அணையின் பாதுகாப்பு தன்மை
குறித்து, இங்குள்ள மக்கள் கவலைப்படுகின்றனர். கேரள மக்களின்
பாதுகாப்பிலும் நாங்கள் கவனம் செலுத்த வேண்டும். வேண்டுமானால்,
தமிழகத்துக்கு தண்ணீர் அளிப்பதை உறுதி செய்யும் வகையில், கேரள சட்டசபையில்
சட்டம் நிறைவேற்றவும் தயார் என, தமிழக அமைச்சரிடம் கூறினேன். இவ்வாறு
உம்மன் சாண்டி கூறினார்.