சேவக் சாதனை * ஒருநாள் போட்டியில் அதிக ரன் * இந்தூரில் இந்தியா இமாலய வெற்றி * தொடரை கைப்பற்றி அசத்தல்

by **ஜனனி** Fri Dec 09, 2011 7:47 am

இந்தூர்: இந்தூர்
ஒருநாள் போட்டியில் விஸ்வரூபம் எடுத்தார் இந்திய கேப்டன் சேவக். வெஸ்ட்
இண்டீஸ் பந்துவீச்சை வெளுத்து வாங்கிய இவர், 219 ரன்கள் குவித்து உலக சாதனை
படைத்தார். இவரது அதிரடி கைகொடுக்க, 153 ரன்கள் வித்தியாசத்தில் அபார
வெற்றி பெற்ற இந்திய அணி, தொடரை 3-1 என கைப்பற்றியது.
இந்தியா வந்துள்ள
வெஸ்ட் இண்டீஸ் அணி, ஐந்து போட்டிகள் கொண்ட ஒருநாள் தொடரில் பங்கேற்று
வருகிறது. முதல் மூன்று போட்டிகளின் முடிவில் இந்திய அணி 2-1 என
முன்னிலையில் இருந்தது. நான்காவது போட்டி இந்தூரில் நடந்தது.
தொடர்ந்து
நான்காவது முறையாக "டாஸ்' வென்ற இந்திய அணி கேப்டன் சேவக், இம்முறை
பேட்டிங்' தேர்வு செய்தார். இந்திய அணியில் உமேஷ் யாதவிற்கு பதில் ராகுல்
சர்மா அறிமுக வாய்ப்பு பெற்றார்.
"சூப்பர்' துவக்கம்:
கடந்த
மூன்று போட்டிகளில் பார்த்திவ் படேல் சரியான துவக்கம் தராததால், இம்முறை
வழக்கமான சேவக், காம்பிர் ஜோடி களமிறங்கியது. இதற்கு நல்ல பலன்
இருந்தது.காம்பிர் பவுண்டரிகளாக விளாச, சேவக் சிக்சர் மழை பொழிந்தார்.
இதனால், ஸ்கோர் மின்னல் வேகத்தில் உயர்ந்தது. காம்பிர் ஒருநாள் அரங்கில் 28
வது அரைசதம் கடந்தார். முதல் விக்கெட்டுக்கு 176 ரன்கள் சேர்த்த போது,
காம்பிர் (67) ரன் அவுட்டானார்.
ரெய்னா அரைசதம்:
பின்
சேவக்குடன் ரெய்னா இணைந்தார். அதிரடியில் மிரட்டிய சேவக், 69 பந்தில் சதம்
கடந்தார். சமீபத்தில் "பார்ம்' இல்லாமல் தவித்து வந்த ரெய்னா (55), தனது
20வது அரைசதம் அடித்து, ரன் அவுட்டானார்.
இரட்டை சதம்:
ஜடேஜா
(10) நிலைக்கவில்லை. மறுமுனையில் தொடர்ந்து மிரட்டலான ரன்குவிப்பை
வெளிப்படுத்தினார் சேவக். இவர் 170 ரன்கள் எடுத்த போது கிடைத்த "கேட்ச்'
வாய்ப்பை சமி கோட்டை விட்டார். இதை நன்கு பயன்படுத்திக் கொண்ட சேவக்,
ரசலின் பந்தை பவுண்டரிக்கு அனுப்பி, ஒருநாள் அரங்கில் முதன் முறையாக இரட்டை
சதம் அடித்து அசத்தினார்.
149 பந்துகளில் 219 ரன்கள் (25 பவுண்டரி, 7
சிக்சர்) எடுத்த போது, சிக்சருக்கு ஆசைப்பட்டு பிடிபட்டார். ரோகித் சர்மா
27 ரன்கள் எடுத்தார். இந்திய அணி 50 ஓவரில் 5 விக்கெட்டுக்கு 418 ரன்கள்
குவித்து, ஒருநாள் அரங்கில் தனது அதிகபட்ச ஸ்கோரை பதிவு செய்தது. விராத்
கோஹ்லி (23), பார்த்திவ் படேல் (3) அவுட்டாகாமல் இருந்தனர்.
ராகுல் கலக்கல்:
இமாலய
இலக்கை துரத்திய வெஸ்ட் இண்டீஸ் அணிக்கு, பாவெல் (7) அதிர்ச்சி தந்தார்.
சிம்மன்ஸ் (36) நீடிக்கவில்லை. பின், "வில்லனாக' உருவெடுத்த ராகுல் சர்மா,
சாமுவேல்ஸ் (33), ஹயாத் (11), அதிரடி போலார்டை (3) போல்டாக்க, இந்திய
அணியின் வெற்றி எளிதானது. ரசல் (29), சமி (2), ராம்பால் (10) இம்முறை
கைவிட்டனர். ரோச் 7 ரன்கள் எடுத்தார்.
ஒருமுனையில் விக்கெட் சரிந்த
போதும், உறுதியான ஆட்டத்தை வெளிப்படுத்திய ராம்தின், அரைசதம் அடித்து
ஆறுதல் தந்தார். இவர் 96 ரன்கள் எடுத்து அவுட்டாக, வெஸ்ட் இண்டீஸ் அணி 49.2
ஓவரில் 265 ரன்கள் எடுத்து தோல்வியடைந்தது.
----
சமி பரிதாபம்
பொதுவாக
"டாஸ்' போட்டு முடிந்தவுடன் யார் வென்றாலும், இரு கேப்டன்களும் கை
கொடுத்துக் கொள்வர். நேற்று தொடர்ந்து நான்காவது முறையாக சேவக் "டாஸ்'
வென்றார். இதையடுத்து வெறுத்துப் போன சமி, சேவக் கைகொடுக்க வந்த போதும்,
அதை ஏற்காமல் சிரித்துக்கொண்டே விலகிக் கொண்டார். இருப்பினும் அவரது
முகத்தில் ஏமாற்றம் தெரிந்தது.
---
8000 ஆயிரம் ரன்கள்
நேற்று
வெஸ்ட் இண்டீஸ் அணிக்கு எதிராக 206 ரன்கள் எடுத்த போது, சர்வதேச ஒருநாள்
அரங்கில் சேவக் 8 ஆயிரம் ரன்களை கடந்தார். இந்திய அளவில் சச்சின் (18,111),
கங்குலி (11,363), டிராவிட் (10,889), அசார் (9,378), யுவராஜ் (8,051)
ஆகியோருக்கு அடுத்து, ஆறாவதாக சேவக் (8,025) இந்த இலக்கை எட்டியுள்ளார்.
உலகளவில் 24 வது வீரர் ஆவார்.
--
இரட்டை சதம் எப்படி
சர்வதேச
ஒருநாள் அரங்கில் 140 பந்துகளில் சேவக், இரட்டை சதம் அடித்தார். இதற்கு
முன் சச்சின், 147 வது பந்தில் தான் 200 ரன்கள் எடுத்தார். சேவக் 200
ரன்களை கடந்த விதம்:
பந்துகள் ரன்கள்
41 50
69 100
112 150
140 200
---
கடவுள் என் பக்கம்
சேவக்
கூறுகையில்,""இரட்டை சதம் அடித்து உலக சாதனை படைப்பேன் என்று கனவிலும்
நினைத்தது இல்லை. ஆனால் ரசிகர்கள் எதிர்பார்த்தனர். சமீபத்தில் சரியாக
விளையாடாத நிலையில், இந்த போட்டிக்காக எனது "பேட்டிங் ஸ்டைலை' மாற்றிக்
கொள்ளவில்லை. நான் கொடுத்த "கேட்ச்சை' சமி கோட்டைவிட்ட போதே, கடவுள்
என்பக்கம் இருந்தார் என்று தெரிந்தது,'' என்றார்.
--
319, 219
டெஸ்டில்
"டிரிபிள்' சதம், ஒருநாள் போட்டியில் இரட்டை சதம் அடித்த, உலகின் முதல்
வீரர் என்ற பெருமை பெற்றார் சேவக். இவர் தென் ஆப்ரிக்காவுக்கு எதிராக
சென்னை டெஸ்டில் 319 ரன்களும், வெஸ்ட் இண்டீஸ் அணிக்கு எதிராக 219 ரன்களும்
எடுத்துள்ளார். தவிர, இந்திய அளவில் டெஸ்ட், ஒருநாள் கிரிக்கெட்டில் ஒரு
இன்னிங்சில் அதிக ரன்கள் எடுத்த வீரரும் இவர் தான்.
---
அறிமுக அபாரம்
நேற்றைய
போட்டியில் அறிமுகமான இந்தியாவின் ராகுல் சர்மா, முதல் மூன்று ஓவர்களின்
கடைசி பந்திலும், மூன்று விக்கெட்டுகளை "போல்டு' செய்து அசத்தினார். கடந்த
ஐ.பி.எல்., தொடரில் அசத்திய இவரது முகத்தின் நரம்புகள் பாதிக்கப்பட்டு,
கண்பார்வை குறைவு ஏற்பட்டது. இதிலிருந்து மீண்ட இவர், சிறந்த "லெக்
ஸ்பின்னராக' ஜொலித்தார்.