ஒரு மரத்தின் கேள்வி

ஒரு மரத்தின் கேள்வி !

ஏதோ குடும்ப தகராறு
எனை வெட்ட அருவாளுடன் அண்ணன் மகன் துரத்த
ஓடிப்போய் ஒளிந்தேன் வயக்காட்டில் ஒரு மரத்தின் பின்னால்

அந்த மரம் எனைப்பார்த்து சிரத்தது ! கேட்டது !
உனை வெட்ட ஒருவன் வந்தால்
நீ ஓடி ஒளிய நான் கிடைத்தேன் !

எனை வேட்ட நீங்கள் வரும்போது நானெங்கே போய் ஒளிய ?

தென்னை என் கரங்கள் வெட்டி ஓலையாய் தொடுக்கின்றாய்
பாக்கு மரம் என் தோல் வெட்டி அதனை தட்டுகளாய் விற்கின்றாய்
மாமரமாம் என் குழந்தைகளை கனிகளாய் நீ சுவைக்கின்றாய்
ஆலமரம் என் உடல் நிழலில் நீ ஓய்வு கொள்கின்றாய்
வாழை மரம் என் வம்சமே உனக்கு அடிமை என செய்கின்றாய்

இப்படி நீ எனை எப்படித்தான் வெட்டினாலும் சாய்த்தாலும்
நானும் என் குலமும் உனை சாடுகிறோமா ? சபிக்கிறோமோ ?

நீதான் ஒன்றும் பேசாமல் நிற்பவனை
“ மரம் போல் நிற்கிறாய் “ என திட்டுகிறாய் !

உன் காலம் கடந்தபின் நீ சவமாய் போனபின்
உனை எரிக்கும் போதும் உன் துனையாய் நான் !

நீ மரமா ? நான் மரமா ?

என் வேரும் அடியும் படர்ந்துகொள்ளும் பூமி
என் கிளையும் இலையும் அனைத்துக்கொள்ளும் மென் காற்று
என் முழு உடலும் ஆரத்தழுவிக்கொள்ளும் கதிரவனின் கீற்று
என் உயிர் வாழ் நல் பருவம் தரும் மழை
என் மேனிக்கு பங்கம் வாராமல் காக்கும் குடையாய் ஆகாயம்

இந்த பஞ்சபூதங்களின் அரவனைப்பில் பாஞ்சாலியாய்
வாழும் ஒரு அய்ந்தறிவு நான்

ஆங்காங்கே அவ்வப்போது நீ வாழ உன் குலம் வாழ
எனை வெட்டிச்சாய்க்கும் ஆறறிவு ஜடமே

நீ மரமா ? நான் மரமா ?

வயல்வெளியில் வேலை செய்து களைத்த உன் விவசாயி
துயில் கொள்ள நிழல் தருவேன்
பசுமையாய் பல சோலைகளில் பூங்காற்றாய் வீசி
உனை தாயாய் தாலாட்டுவேன்
காடுகளாய் செழித்து வளர்ந்து காலமெலாம்
நீ வாழ மழை தருவேன்
குருவி , காகம் என பற்பல பறவைக்கூட்டம் கூடு கட்டி
வாழ்ந்திருக்க ஒரு வீடாய் பயன்படுவேன்

இப்படி அத்துனை உயிர்களுக்கும் பயனாய் இருக்கும்
எனை வெட்டும் மானுடனே !

நீ மரமா ? நான் மரமா ?

- தேவிதாசன் , ஓசூர்
சுவாசம் , சுற்றுச்சூழல் பாதுகாப்பு அமைப்பு