நமது குதிகால் தசை நாண் (Achilles tendon) எங்கே அமைந்துள்ளது? பின்மண்டை சார்ந்த எலும்பு (occipital bone) எங்கு அமைந்துள்ளது?

by **மாலதி** Sun Nov 13, 2011 5:18 pm

நமது குதிகால் தசை நாண் (Achilles tendon) எங்கே அமைந்துள்ளது?

ஒரு
தசை நாண் அல்லது இழைமம் (sinew) என்பது தசைகளை எலும்புகளுடன் இணைக்கும்
வலிமையானதொரு நாண்; இத்தகைய நாண்கள் நம் உடல் முழுதும் உள்ளன. குதிகால் தசை
நாண் என்பது கணுக்காலின் (ankle) பின்புறம் அமைந்துள்ளது. இது
கீழ்க்காலின் பின்பகுதியில் அமைந்துள்ள தசைகளை குதிகால் எலும்புடன்
இணைக்கும் வலிமையானதொரு நாண். கிரேக்கப் பழங்கதை ஒன்றில் ஆச்சிலிஸ்
(Achilles) என்ற வீரனின் குதிகாலில் (heel) அம்பு ஒன்று பட்டு அவன் இறந்து
விடுகிறான்; இக்கதையின் அடிப்படையில்தான் குதிகால் தசைநாண் என்னும்
பொருள்படும் ஆச்சிலிஸ் டெண்டன் என்னும் கலைச்சொல் உருவாயிற்று.

பாதத்தை
மிக வலுவாக மேலே தூக்குவதாலோ அல்லது கீழ்க்காலின் பின்பகுதித் (calf)
தசைகள் சுருங்கும்போது அவற்றில் அடிபடுவதாலோ குதிகால் தசைநாண் முறிந்து
(rupture) போகலாம். இத்தகைய காயம் அல்லது முறிவு முப்பது வயதுக்கு
மேற்பட்டோருக்கு விளையாட்டு, ஓட்டப்பந்தயம் ஆகியவற்றில் ஈடுபடும்போது
ஏற்படுவதுண்டு. முழுமையான முறிவுடன் நாண் பிளவுபடுதல் (snap), கடுமையான
வலி, கால் விரல்களை அசைக்க இயலாமை மற்றும் நிற்க முடியாமை ஆகியனவும்
ஏற்படக்கூடும். உடனடியாக கணுக்காலின் பின்புறம் பனிக்கட்டியை வைத்து காலை
மேலே தூக்கி அசைக்காமல் இருக்குமாறு முதலுதவி அளிக்க வேண்டும். முறிந்துபோன
நாணை இணைத்துத் தைக்க அறுவை சிகிச்சை தேவைப்படலாம். காலை இயல்பாக
நீட்டுவதற்கும் பயிற்சி பெறுவதற்கும் ஆகும் காலம் வரை காயமடைந்த காலில்
தமது உடல் எடை விழாதவாறு முன்னெச்சரிக்கையுடன் இருக்க வேண்டும்.

பின்மண்டை சார்ந்த எலும்பு (occipital bone) எங்கு அமைந்துள்ளது?

தசைகள்
மற்றும் நாண்கள் (tendons) சேர்ந்த அமைப்பானது முதுகுத்தண்டு (spinal
column), காரை எலும்பு (collar bone) மற்றும் தோள்பட்டைகள் ஆகியவற்றைத்
தலையுடன் இணைக்கிறது. இந்தத் தசைகளும் நாண்களுமே தலையின் அசைவைக்
கட்டுப்படுத்துகின்றன. பின்மண்டை சார்ந்த எலும்பானது பெயருக்கேற்ப மண்டை
ஓட்டின் பின்புறம் அமைந்துள்ளது. இந்த எலும்பு முதுகுத்தண்டில் தங்கி ஒரு
மூட்டாக (joint) விளங்குவதோடு இதன் மீதே தலை அசைகிறது. தலை எடையின்
பெரும்பகுதி பின்மண்டை சார்ந்த எலும்பின் முன்புறமே இருக்கிறது; மேலும்
கழுத்திலுள்ள தசைகளே தலையை நேராக நிறுத்தச் செய்பவை. ஒருவர் தூங்கி
வழியும்போது, இத்தசைகள் தளர்வுற்ற நிலையில் இருப்பதால், அவரது தலை
முன்னோக்கி அசைந்து விழுவதைப் பார்க்கலாம். தலையிலுள்ள பிற பெரிய
எலும்புகளில் மேல் தாடை எலும்பு (maxilla), கீழ்த்தாடை எலும்பு (mandible),
மண்டையுச்சிப் பக்க எலும்புகள் (parietal), முன்பக்க எலும்புகள்
(frontal), ஆப்பு எலும்பு (sphenoid), மற்றும் பொட்டு எலும்புகள் (temporal
bones) ஆகியவை அடங்கும். தலையிலுள்ள தசைகள், நமது மெல்லுதல், விழுங்குதல்
ஆகிய செயல்பாடுகளுக்கு முக்கியத்துவம் வாய்ந்தவை. புன்னகை செய்தல், சினத்தை
வெளிப்படுத்தல் போன்ற முகத் தோற்றங்களுக்கும் கூட அவையே காரணமாக
அமைகின்றன.

முகத் தசைகளின் தொடர்ந்த செயல்பாடுகள்,
தோலுக்கடியிலுள்ள கொழுப்பு அட்டைப் பகுதிகளின் (fat pads) தளர்ச்சி, தோலின்
நெகிழ்திறன் (elasticity) இழப்பு ஆகியவற்றின் காரணமாக வயதானவர்களின்
முகத்தில் சுருக்கங்கள் ஏற்படுகின்றன.