மனநிலை பாதித்த மகளை விசம் வைத்துக் கொன்ற தந்தை! கொலையாளிக்கு ஜாமின் வழங்கியது ஏன்?

by **அருள்** Sun Nov 13, 2011 9:23 am

மனநிலை பாதிக்கப்பட்ட மகளை
விஷம் வைத்து கொலை செய்ததாக தொடரப்பட்ட வழக்கில், தந்தைக்கு சென்னை
செஷன்ஸ் நீதிமன்றம் நிபந்தனை ஜாமீன் வழங்கியது.

சென்னை மயிலாப்பூர் பகுதியை சேர்ந்தவர் கன்னியப்பன் (38). இவரது மனைவி
தெய்வநாயகி (34) இவர்களின் குழந்தைகள் சந்தோஷ்குமார் (10), ஜனனி (3).

ஜனனி மனநிலை பாதிக்கப்பட்ட பெண். ஜனனிக்கு எவ்வளவோ சிகிச்சை அளித்தும்
எந்த முன்னேற்றமும் ஏற்படவில்லை. இதனால் குடும்பத்தினர் மிகுந்த கவலையில்
இருந்தனர்.

இதையடுத்து, கடந்த 2010 அக்டோபர் 12ம் தேதி திருவல்லிக்கேணி வாலாஜா
சாலையில் உள்ள ஓட்டலுக்கு மனைவி மற்றும் குழந்தைகளை கன்னியப்பன் கூட்டி
சென்றார். அங்கு அறை எடுத்து தங்கினர்.

அவர்கள் தங்கியிருந்த அறை நீண்ட நேரம் திறக்கப்படாததை பார்த்த ஓட்டல்
ஊழியர்கள், கதவை உடைத்து திறந்தபோது கன்னியப்பனும் அவரது மனைவி மற்றும்
குழந்தைகள் விஷம் அருந்திய நிலையில் உயிருக்கு போராடிக் கொண்டிருந்தனர்.
அவர்கள் உடனடியாக தனியார் மருத்துவமனையில் சேர்க்கப்பட்டனர். அங்கு
சிகிச்சை பலனளிக்காமல் ஜனனி மரணமடைந்தார். மற்றவர்கள் தீவிர சிகிச்சைக்கு
பின்னர் குணமடைந்தனர்.

குழந்தையை கொலை செய்ததாகவும், தற்கொலைக்கு முயன்றதாகவும் கன்னியப்பன்
மீது திருவல்லிக்கேணி போலீசார் வழக்கு பதிவு செய்தனர். விசாரணையில்,
கன்னியப்பன் தனது குழந்தைகளுக்கு தூக்க மாத்திரைகளை கொடுத்துவிட்டு,
மனைவியுடன் விஷம் குடித்தது தெரியவந்தது.

இந்நிலையில், இந்த வழக்கில் தனக்கு முன் ஜாமீன் கேட்டு கன்னியப்பன்
மனுத் தாக்கல் செய்தார். அந்த மனு செஷன்ஸ் நீதிமன்றத்தில் தள்ளுபடி
செய்யப்பட்டது. இதையடுத்து, அவர் கடந்த 6ம் தேதி போலீசில் சரணடைந்தார்.
அவரை போலீசார் புழல் சிறையில் அடைத்தனர்.

செஷன்ஸ் நீதிமன்றத்தில் ஜாமீன் கேட்டு கன்னியப்பன் தாக்கல் செய்த மனு,
முதன்மை செஷன்ஸ் நீதிபதி தேவதாஸ் முன்னிலையில் நேற்று முன்தினம்
விசாரணைக்கு வந்தது. வழக்கை விசாரித்த நீதிபதி நேற்று அளித்த உத்தரவு
வருமாறு:

கன்னியப்பனின் கதை பரிதாபமானது. வளர்க்க வசதியில்லாததால் தனது
பிள்ளைகளை கிணற்றில் தள்ளிக் கொலை செய்த நல்லதங்காள் கதை போல் உள்ளது.
தனது மகளை இந்த நிலையில் வாழ்நாள் முழுவதும் பார்க்க வேண்டியிருக்கிறதே
என்ற மனப்போராட்டத்தில் அவர் இந்த முடிவை எடுத்துள்ளார்.

விஷம் கொடுத்து அவர் கொலை செய்ததை நாம் கருணைக் கொலையாக கருதலாம்.
வெளிநாடுகளில் கருணைக் கொலை சாத்தியமாகும். அமெரிக்காவில் சில
மாநிலங்களில் இது போன்ற கருணைக் கொலைகள் நடந்துள்ளன. ஆனால், இந்தியாவில்
கருணைக் கொலைக்கு அனுமதி இல்லை. அது நமது பண்பாட்டுக்கும் எதிரானது.

அதே நேரத்தில் இந்த வழக்கை நாம் கவனமாக பார்க்க வேண்டும். நீதிமன்றம்
வெறும் செங்கல், மணலால் கட்டப்பட்டது என்று கருதக் கூடாது.
நீதிமன்றத்துக்கும் மனசாட்சி உள்ளது. இதுபோன்ற அரிதான பிரச்னைகளை மிகுந்த
கவனத்துடன் கையாள வேண்டும்.

எனக்கு ஜாமீன் வழங்க தனி அதிகாரம் உள்ளது. சட்டத்துக்கும்
நெறிமுறைகளுக்கும் தூரம் இருந்தா லும், சட்டம்தான் எப்போதும் உச்சமாக
கருதப் படுகிறது. இந்த வழக்கில் மனிதர்களின் உணர்வுகளையும் நீதிமன்றம்
கவனிக்க வேண்டும். இந்த வழக்கில் கன்னியப்பனுக்கு குழந்தையைக் கொலை
செய்யும் உள்நோக்கம் இல்லை என்று கூற முடியாது. அவர் கொலை செய்துள்ளார்.
வழக்கில் உள்நோக்கம்தான் ஆணிவே ராக உள்ளது.

போலீஸ் தரப்பில் விசாரணை முடியவில்லை என்று கூறப்படுகிறது. மனுதாரர்
எங்கேயும் போய்விட மாட்டார் என்று வாதிடப்பட்டுள்ளது. அவருக்கு சொந்தமாக,
நிரந்தரமான வீடு உள்ளது. அவர் தப்பியோடி சாட்சிகளை கலைக்க மாட்டார் என்றே
கருத வேண்டும்.

அவர் தொடர்ந்து சிறையில் இருந்தால் அவரது மனைவி மற்றும் மகன் தெருவில்
நிற்க வேண்டிய நிலை உள்ளது. அவர் மட்டுமே குடும்பத்துக்காக சம்பாதிப்பவர்
என்று கூறப்பட்டுள்ளது.

மகள் இறந்த விஷயத்தில் அவர் ஏற்கனவே பாதி மரணமடைந்து விட்டார். இது,
ஒரு பரிதாபமான விஷயம். எனவே, அவருக்கு 2 நபர் உத்தரவாதத்தில் நிபந்தனை
ஜாமீன் வழங்குகிறேன். அவர் திங்கள் மற்றும் வெள்ளிக்கிழமைகளில் காலை 10.30
மணிக்கு, திருவல்லிக்கேணி போலீஸ் நிலையத்தில் ஆஜராக வேண்டும். இவ்வாறு
நீதிபதி உத்தரவிட்டார்.