பெட்ரோல், டீசல் விலை உயர்த்தினால் என்னவாகும்?:பிரதமரின் பொருளாதார ஆலோசகர் பேட்டி

உணவுப்பொருட்கள்
மீதான பணவீக்கம் தற்போது 18 சதவீதம் வரை உள்ளது. இது, வரும் மார்ச் மாத
இறுதிக்குள் 8.5 சதவீதமாகக் குறையும் என்று ரிசர்வ் வங்கி கணித்துள்ளது.
இந்த கணிப்பு சரியானதே; இது நிச்சயம் நிறைவேறும் என்று பிரதமரின்
பொருளாதார ஆலோசனைக் குழு நம்பிக்கை தெரிவித்துள்ளது.பிரதமர் மன்மோகன்
சிங்கின் பொருளாதார விஷயங்களுக்கான ஆலோசனைக் குழு, நேற்று டில்லியில்
ஆலோசனை நடத்தியது.


மேலும்,
பொருளாதார ஆய்வறிக்கையையும் சமர்ப்பித்தது. இன்றைய பொருளாதார நிலை
குறித்து இந்த குழுவின் தலைவரான சி.ரங்கராஜன் கூறியதாவது:தற்போது 18
சதவீதமாக உள்ள உணவுப்பொருட்களுக்கான பணவீக்கம், வரும் மார்ச் மாத
இறுதிக்குள் 8.5 சதவீதமாகக் குறையும் என்று ரிசர்வ் வங்கி கணித்துள்ளது.
இந்த கணிப்பு மிகவும் சரியானது. வரும் ராபி பருவத்தில் விளைச்சல்
நல்லபடியாக இருக்கும் என்று எதிர்பார்க்கப்படுகிறது. இதனால்,
உணவுப்பொருட்கள் மீதான பணவீக்கம் நிச்சயம் குறையும். ஆயினும் பெட்ரோல்,
டீசல் விலை உயர்த்தப்பட்டால், உணவுப் பொருட்களின் விலை ஏறுமா என்பது பற்றி
யூகமாக பதிலளிக்க முடியாது.இப்போது 25.6 மில்லியன் டன் அளவு அரிசியும்,
20.62 மில்லியன் டன் அளவு கோதுமையும் கையிருப்பு உள்ளது. இவற்றை
குறிப்பிட்ட கால இடைவெளியில் சீரான முறையில் வினியோகம் செய்திட வேண்டும்.
தற்போதுள்ள பொது வினியோக கடைகள் மூலம் உணவுப் பொருட்கள் வழங்குவது போல,
நடுத்தர வர்க்க மக்களுக்கு வினியோகிப்பதற்காக இன்னொரு திட்டமும்
அறிமுகப்படுத்த வேண்டும்.


உணவுப்பொருட்கள்
உற்பத்தியில் தேக்க நிலை ஏற்பட்டால், முன்கூட்டியே கணித்து இறக்குமதிக்கு
ஆர்டர் செய்திட வேண்டும். அப்போது தான் நிலைமையை சமாளிக்க முடியும். இந்த
காரிப் பருவத்தில் அரிசி கொள்முதல் 27 மில்லியன் டன்னுக்கு குறைவாக
உற்பத்தி செய்யப்படுமானால், உடனடியாக இறக்குமதிக்கு ஆர்டர் செய்திட
வேண்டும். ஆனாலும், குறிப்பிட்ட இலக்கான 27 மில்லியன் டன் அரிசி கொள்முதல்
இருக்கும் என்றே எதிர்பார்க்கப் படுகிறது.2009-2010ம் ஆண்டில் விவசாயத்
துறை வளர்ச்சி என்பது மைனஸ் 2 சதவீதம் உள்ளது. இதற்கு விவசாய உற்பத்தியை
அதிகரிக்க வேண்டும். விவசாய ஆராய்ச்சி முடிவுகளை விவசாயிகளிடம் கொண்டு
செல்லும் பிரசாரத் திட்டத்தை விரிவாக்க வேண்டும். பொருளாதார வளர்ச்சி
என்பது 7.2 சதவீதம் அளவுக்கு 2009-10ம் ஆண்டில் இருக்கும் என்று
எதிர்பார்க்கிறோம். இது, 2010-11ல் 8.2 சதவீதமாகவும், 2011-12ம் ஆண்டில் 9
சதவீதமாகவும் உயரும் என்று எதிர்பார்க்கிறோம். அப்படிபட்ட சூழ்நிலையில்
விவசாயத் துறையின் வளர்ச்சி என்பது 9 சதவீதம் அளவுக்கு இருக்கும். உலக
அளவில் நிலவும் பொருளாதார மந்த நிலை மெதுவாக, சீராக சரியாகிக்
கொண்டிருக்கிறது. இது நல்ல அறிகுறியாகும்.உணவு தானிய உற்பத்தி கடந்த
2009-10ம் ஆண்டில் 216.9 மில்லியன் டன் இருந்தது. ஆனால், இந்த ஆண்டு 17.6
மில்லியன் டன் குறைந்துள்ளது. அரிசியின் அளவு மட்டும் 11 மில்லியன் டன்
குறைந்துள்ளது.


ஏற்றுமதி துறையில்
168 முதல் 169 பில்லியன் டாலர் வரையும், இறக்குமதி துறையில் 296 பில்லியன்
டாலர் வரையிலும் வருமானம் கிடைத்துள்ளது.அன்னிய முதலீட்டுத் துறையில் 20
பில்லியன் டாலர் வரை இந்த ஆண்டு கிடைத்துள்ளது. பதினோராவது ஐந்தாண்டுத்
திட்டத்தின் கீழ் மின்சார உற்பத்தி என்பது 78 ஆயிரம் மெகா வாட் அளவுக்கு
இருந்திட வேண்டுமென்று இலக்கு நிர்ணயிக்கப்பட்டது. ஆனால், இப்போது 62
ஆயிரம் மெகா வாட் தான் உற்பத்தி ஆகியுள்ளது. இன்னும் இரண்டு ஆண்டுகள் தான்
பாக்கி உள்ளன.எனவே, இன்னும் கூடுதலாக கவனம் செலுத்தி, குறைந்தபட்சம் 70
ஆயிரம் மெகா வாட் அளவாவது மின்சாரம் உற்பத்தி செய்திட வேண்டும். இதற்காக
பெல் நிறுவனம் உட்பட மின்சார உற்பத்தி நிறுவனங்களை மேம்படுத்துவது, அவற்றை
விரிவாக்கம் செய்வது, போதுமான மின்சார உற்பத்தி உபகரணங்களை வாங்குவது
உள்ளிட்ட நடவடிக்கைகளை மேற்கொள்ள வேண்டும்.இவ்வாறு ரங்கராஜன் தெரிவித்தார்.