உஸ்மானியா பல்கலைக்குள் துணை ராணுவம் :சுப்ரீம் கோர்ட் அனுமதி

புதுடில்லி:"உஸ்மானியா
பல்கலைக் கழக வளாகத்தில் இருந்து மத்திய துணை ராணுவப் படையினரை வாபஸ் பெற
வேண்டும்' என, ஆந்திர ஐகோர்ட் பிறப்பித்த உத்தரவுக்கு சுப்ரீம் கோர்ட் தடை
விதித்துள்ளது. படையினர் வரும் 23ம் தேதி வரை அங்கு தொடர அனுமதி
அளித்துள்ளது.தெலுங்கானா தனி மாநில கோரிக்கையை வலியுறுத்தி, ஐதராபாத்
உஸ்மானியா பல்கலைக்கழக வளாகத்தில், கடந்த 13 மற்றும் 14ம் தேதிகளில்,
மாணவர்கள் போராட்டம் நடத்தினர்.அப்போது, மத்திய துணை ராணுவப் படையினர்,
அவர்கள் மீது தடியடி நடத்தினர். பின்னர் கண்ணீர் புகை குண்டுகளை வீசினர்;
ரப்பர் புல்லட்களாலும் வானத்தை நோக்கி சுட்டனர்.


போலீசாரின்
இந்த நடவடிக்கையில் மாணவர்கள் மட்டுமின்றி, பத்திரிகையாளர்களும்
காயமடைந்தனர். மாணவர்கள் மீதான இந்த தாக்குதலுக்கு, தெலுங்கானா ஆதரவு
அமைப்புகள் கடும் கண்டனம் தெரிவித்தன. இந்நிலையில், போலீசாரின் இந்த
நடவடிக்கை தொடர்பாக, சி.பி.ஐ., விசாரணைக்கு உத்தரவிடக் கோரி, ஆந்திர
ஐகோர்ட்டில் வழக்கு தொடரப்பட்டது.வழக்கை விசாரித்த நீதிபதிகள், "போராட்டம்
நடத்திய மாணவர்களை கையாண்டதில், போலீசார் அத்துமீறி நடந்து கொண்டுள்ளனர்.
அமைதியாக போராட்டம் நடத்திய மாணவர்கள் இரக்கமற்ற முறையில்
தாக்கப்பட்டுள்ளனர். பல்கலை வளாகத்திற்குள் துணை ராணுவப் படையினர் செல்ல
அனுமதித்தது யார்? நடந்த சம்பவம் தொடர்பாக ஐதராபாத் போலீஸ் கமிஷனர்,
கோர்ட்டில் ஆஜராகி விளக்கம் அளிக்க வேண்டும். உஸ்மானியா பல்கலை வளாகத்தில்
உள்ள துணை ராணுவப் படையினரை உடனே வாபஸ் பெற வேண்டும்' என உத்தரவிட்டனர்.


இந்த
உத்தரவை எதிர்த்து, சுப்ரீம் கோர்ட்டில் ஆந்திர மாநில அரசு அப்பீல் மனு
தாக்கல் செய்தது. இந்த மனு நீதிபதிகள் சிங்வி, தாக்கூர் ஆகியோர் அடங்கிய
சுப்ரீம் கோர்ட் பெஞ்ச் முன், நேற்று விசாரணைக்கு வந்தது. அப்போது, ஆந்திர
அரசு சார்பில் ஆஜரான வக்கீல் கூறியதாவது:தெலுங்கானா ஆதரவு போராட்ட
இயக்கத்தவர்கள் மத்தியில் மாவோயிஸ்ட்கள் ஊடுருவியிருக்கலாம் என்ற பலமான
சந்தேகம், ஆந்திர அரசுக்கு எழுந்துள்ளது. அனேகமாக மாணவர்கள் மத்தியில்
அவர்கள் ஊடுருவி இருக்கலாம். பல்கலை வளாகத்திற்குள் பாதுகாப்புப் படையினர்
போதுமான அளவில் இருக்க வேண்டியது, சட்டம் ஒழுங்கை பராமரிக்க அவசியமாகும்.
தெலுங்கானா ஆதரவு போராட்ட மையமாக உஸ்மானியா பல்கலை வளாகம் மாறியுள்ளது.
அங்குள்ள நிலைமை மிக மோசமாக உள்ளது.உஸ்மானியா பல்கலைக் கழக வளாகத்திலும்,
ஐதராபாத்திலும் பல முறை வன்முறைகள் வெடித்துள்ளன. பல்கலை வளாகத்தில்
நிலைமை மேம்பட்டால், துணை ராணுவப் படையினரை அங்கிருந்து வாபஸ் பெற்று
விடுவோம்.இவ்வாறு ஆந்திர அரசு தரப்பில் தெரிவிக்கப்பட்டது. இருந்தாலும்,
ஆந்திர மாநில அரசின் இந்தக் குற்றச்சாட்டை, உஸ்மானியா பல்கலை மாணவர்கள்
சார்பில் ஆஜரான பிரசாந்த் பூஷன் கூறினார்.


பின்னர்
நீதிபதிகள் பிறப்பித்த உத்தரவு விவரம் வருமாறு:உஸ்மானியா பல்கலைக் கழக
வளாகத்தில் இருந்து துணை ராணுவப் படையினரை வாபஸ் பெற வேண்டும் என்ற ஆந்திர
ஐகோர்ட்டின் உத்தரவுக்கு, வரும் 23ம் தேதி வரை தடை விதிக்கிறோம்.
அதேநேரத்தில், பல்கலை வளாகத்தில் உள்ள துணை ராணுவப் படையினர்,
மாணவர்களிடம் எந்த வகையிலும் முறைகேடாக நடந்து கொள்ளாமல் இருக்க வேண்டும்.
அப்படி இருப்பதை ஆந்திர மாநில உள்துறை செயலர் உறுதி செய்ய வேண்டும்.
உள்துறை செயலரின் தனிப்பட்ட மேற்பார்வையில், துணை ராணுவப் படையினர்
கட்டுப்பாட்டுடன் செயல்பட வேண்டும்.இவ்வாறு நீதிபதிகள் உத்தரவிட்டனர்.