மக்கள் நலப்பணியாளர் நீக்கத்திற்கு ஐகோர்ட் தடை: வரும் 21ம் தேதி வழக்கு மீண்டும் விசாரணை

by **அருள்** Sat Nov 12, 2011 7:27 am

சென்னை: மக்கள் நலப்பணியாளர்கள் நீக்கப்பட்டதற்கு சென்னை ஐகோர்ட் இடைக்கால தடை விதித்து, விசாரணையை 21ம் தேதிக்கு ஒத்தி வைத்துள்ளது.

கடந்த தி.மு.க., ஆட்சியில் நியமிக்கப்பட்ட மக்கள் நலப்பணியாளர்கள் 13
ஆயிரம் பேரை, 8.11.2011ம் தேதியிட்ட அரசாணை படி இப்போதைய அரசு நீக்கியது.
இதையடுத்து, தமிழ்நாடு மக்கள் நலப்பணியாளர்கள் முன்னேற்ற சங்கம் மற்றும்
தமிழ்நாடு மக்கள் நலப்பணியாளர்கள் சங்கம் ஆகியன, மக்கள் நலப்பணியாளர்கள்
பணி நீக்கத்தை ரத்து செய்யக் கோரி சென்னை ஐகோர்ட்டில் மனு செய்தனர்.
வழக்கு, நீதிபதி சுகுணா முன் நேற்று விசாரணைக்கு வந்தது.

அவர் பிறப்பித்த இடைக்கால தடை விவரம்: மக்கள் நலப்பணியாளர்களின்
வயதைக் கருத்தில் கொண்டும், அவர்களது பணிக் காலம் 2012 மே மாதம் வரை
இருப்பதை கவனத்தில் கொண்டும், அரசின் பணி நீக்கத்துக்கு இடைக்கால தடை
விதிக்கப்படுகிறது. பணி நீக்கத்துக்கு தடை கோரி, தமிழ்நாடு மக்கள்
பணியாளர்கள் முன்னேற்ற சங்கம் மற்றும் தமிழ்நாடு மக்கள் நலப்பணியாளர்கள்
சங்கம் ஆகியன, கோர்ட்டுக்கு வந்துள்ளன. இந்த சங்கத்தில் உறுப்பினர்களாக
உள்ளவர்களின் பட்டியலை, சனிக்கிழமை மாலை 3 மணிக்குள் நீதிமன்றத்தில்
சமர்ப்பிக்க வேண்டும். சமர்ப்பிக்கத்தவறினால், அவர்களுக்கு இடைக்கால தடையை
அமல் செய்யத் தேவையில்லை. வழக்கு விசாரணை, வரும் 21ம் தேதிக்கு ஒத்தி
வைக்கப்படுகிறது. இவ்வாறு இடைக்கால தடையில் கூறப்பட்டுள்ளது. கோர்ட்
உத்தரவு, வழக்கு விசாரணை முடியும் வரை செல்லும் என்பதால், அதுவரை மக்கள்
நலப்பணியாளர்கள் பணியில் நீடிப்பர். வழக்கம் போல், அவர்களது பணிகளை
நிறைவேற்றும் நிலை ஏற்பட்டு உள்ளது.

2012, மே வரை தான் பதவி: பணியாளர்கள் மனு: மக்கள்
நலப்பணியாளர்கள் கொடுத்துள்ள மனு விவரம்: தி.மு.க., ஆட்சியில் 1989ம் ஆண்டு
மக்கள் நலப்பணியாளர்கள் நியமிக்கப்பட்டனர். 1991ம் ஆண்டு அ.தி.மு.க.,
ஆட்சி பொறுப்புக்கு வந்த போது, மக்கள் நலப்பணியாளர்கள் நீக்கப்பட்டனர்.
அடுத்தடுத்து ஆட்சி மாறியபோது, 1996ம் ஆண்டு தி.மு.க., ஆட்சியில்,
நீக்கப்பட்ட மக்கள் நலப்பணியாளர்கள் மறு நியமனம் செய்யப்பட்டனர். 2001ம்
ஆண்டு அ.தி.மு.க., ஆட்சியில் மீண்டும் நீக்கப்பட்டனர். 2006ம் ஆண்டு
தி.மு.க., ஆட்சி வந்ததும், மக்கள் நலப்பணியாளர்கள் நியமிக்கப்பட்டனர்.
தொகுப்பூதியம் பெற்று வந்தவர்கள் கால முறை ஊதியத்துக்கு மாற்றபட்டனர்.
ஒவ்வொரு ஆண்டும் மக்கள் நலப்பணியாளர்களின் நியமனம் அரசால் நீட்டிக்கப்பட்டு
வந்தது. 2011 மே மாதம் சட்டசபைத் தேர்தல் நடைபெற இருந்ததால், மக்கள்
நலப்பணியாளர்களின் பதவிக் காலத்தை 2012 மே மாதம் இறுதி வரை அனுமதித்து,
அரசு உத்தரவு பிறப்பித்தது. ஊராட்சிகளின் அடிப்படை தேவைகளுக்கு மக்கள்
நலப்பணியாளர்கள் பயன்படுத்தப்பட்டனர். மேலும், மத்திய அரசின் திட்டமான
தேசிய ஊரக வேலை உறுதியளிப்புத் திட்டத்திலும் பயன்படுத்தப்பட்டனர். மக்கள்
நலப்பணியாளர்கள் அனைவரும் நடுத்தர வயதைக் கடந்தவர்கள். இவர்கள் முந்தைய
அரசால் நியமிக்கப்பட்டவர்கள் என்பதால், காழ்ப்புணர்ச்சியில் பணி நீக்கம்
செய்யப்பட்டுள்ளனர். இந்த சூழ்நிலையில், இவர்களது வாழ்வாதாரம் பெரிதும்
பாதிக்கப்பட்டுள்ளது. எனவே, அரசின் பணி நீக்க உத்தரவுக்கு, இடைக்கால தடை
விதிக்க வேண்டும். இவ்வாறு மனுவில் கூறி யிருந்தனர்.

மக்கள் நலப் பணியாளர் வேலை: கிராமங்களில் உள்ள நூலகங்கள், தெரு
விளக்குகள், சத்துணவுக் கூடங்களைப் பராமரித்தல், கிராமங்களில் பிறப்பு,
இறப்புகளின் பதிவுகளைக் கண்காணித்தல், தேசிய கிராமப்புற வேலை
உறுதியளிப்புத் திட்டத்தில் பணியாற்றுபவர்களின் அன்றாடப் பட்டியலைத்
தயாரித்து, அரசுக்குக் கொடுத்தல் உள்ளிட்ட பணிகளைச் செய்கின்றனர்.