2-ஜி ஆவண நகலை சுவாமிக்கு அளிக்க சிபிஐ-க்கு நீதிமன்றம் உத்தரவு

by **ஜனனி** Wed Nov 09, 2011 7:39 am

புது தில்லி, நவ.8: 2-ஜி ஸ்பெக்ட்ரம் ஒதுக்கீடு தொடர்பான ஆவணங்களின் நகலை
ஜனதா கட்சித் தலைவர் சுப்பிரமணியன் சுவாமிக்கு அளிக்குமாறு சிபிஐக்கு தில்லி
நீதிமன்றம் உத்தரவிட்டது.
இந்த வழக்கில் மத்திய அமைச்சர் ப. சிதம்பரத்துக்கும் தொடர்பு உள்ளது, அதை
நிரூபிக்க தனக்கு ஆவணங்களின் நகல் தேவை என நீதிமன்றத்தில் சுப்பிரமணியம் சுவாமி மனு
தாக்கல் செய்திருந்தார்.
இதன் மீதான விசாரணை சிபிஐ சிறப்பு நீதிமன்றத்தில் செவ்வாய்க்கிழமை
விசாரணைக்கு வந்தது. அப்போது வாதாடிய சுப்பிரமணியன் சுவாமி, ""2-ஜி ஒதுக்கீடு
வழக்கு தொடர்பாக ஒருங்கிணைந்த அணுகு சேவை லைசென்ஸ் (யுஏஎஸ்எல்) கொள்கை விவரம்
வழங்கப்பட வேண்டும். லைசென்ஸ் வழங்கப்பட்டபோது கடைப்பிடிக்கப்பட்ட நடைமுறைகளை ஆராய
இது மிகவும் அவசியமாகும். 2009-ம் ஆண்டு அக்டோபரில் இந்த வழக்கு தொடர்பான ஆவணத்தை
சிபிஐ கைப்பற்றியது. ஆனால் அதை நீதிமன்றத்தில் தாக்கல் செய்த குற்றப்
பத்திரிகையுடன் இணைத்து அளிக்கவில்லை. எனவே அந்த ஆவண நகல் இருந்தால் அதில்,
அலைக்கற்றை ஒதுக்கீட்டில் சிதம்பரம் அளித்த ஒப்புதல் மற்றும் அவரது கையெழுத்து
இருக்கும். அதைக் கொண்டு வழக்கை மேலும் தொடர வசதியாக இருக்கும்,'' என்று
குறிப்பிட்டார்.
இந்த ஆவணத்தில்தான் ஆ. ராசா, ப. சிதம்பரம் இடையே நடந்த கடித பரிவர்த்தனை
எழுத்துப்பூர்வமாக உள்ளது.
சிபிஐயால் கைப்பற்றப்பட்ட ஆவணத்தின் சான்றளிக்கப்பட்ட நகல் இருப்பின்
போதுமானது என்றார் சுவாமி. இதை விசாரித்த நீதிபதி ஒ.பி. சைனி, இது தொடர்பான ஆவண
நகலை சுவாமிக்கு அளிக்க வேண்டும் என்று சிபிஐ-க்கு உத்தரவிட்டார்.இந்த மனு மீதான
விசாரணையை டிசம்பர் 3-ம் தேதிக்கு நீதிபதி ஒத்திவைத்தார்.
சிதம்பரம் மீது சிபிஐ விசாரணை நடத்த வேண்டும் என்ற தனது கோரிக்கை மனு உச்ச
நீதிமன்றத்தில் நிலுவையில் உள்ளதாக சுப்பிரமணியன் சுவாமி கூறினார்.
""முன்னதாக 2-ஜி அலைக்கற்றை ஒதுக்கீடு தொடர்பான வழக்கில் ப. சிதம்பரத்தையும்
ஒரு எதிரியாகச் சேர்க்க வேண்டும் என சுவாமி வலியுறுத்தி வந்தார். அலைக்கற்றை விலை
நிர்ணயம் தொடர்பாக அமைச்சர் சிதம்பரத்தின் பங்கு குறித்து விசாரிக்க வேண்டும் என
அவர் வலியுறுத்தினார். இந்த வழக்கில் சிதம்பரம் மற்றும் ஆ. ராசாவை நீதிமன்றத்தில்
ஆஜர்படுத்தி விசாரிக்க வேண்டும். அலைக்கற்றைக்கான நுழைவுக் கட்டணத்தை
நிர்ணயித்ததில் இவர்களிருவருக்கும் பங்கு உள்ளது. 2007-08-ம் ஆண்டு லைசென்ஸ்
வழங்கியபோது 2001-ம் ஆண்டு நிர்ணயிக்கப்பட்ட விலைக்கே வழங்கலாம் என இவர்கள் முடிவு
எடுத்துள்ளனர். இதைப் பிரதமரும் அனுமதித்துள்ளார்,'' என்று சுவாமி
குறிப்பிட்டுள்ளார்.
ஆனால் இந்த மனுவை நீதிபதி சைனி நிராகரித்தார். இந்த வழக்கில் சிதம்பரத்தை
எதிரியாகச் சேர்க்க உத்தரவிட முடியாது என்று குறிப்பிட்டு தள்ளுபடி செய்தார்.
2-ஜி அலைக்கற்றை ஒதுக்கீடு தொடர்பாக சுப்பிரமணியன் சுவாமி தனிப்பட்ட முறையில்
வழக்கு தொடர்ந்துள்ளார். அதில் இந்த வழக்கில் குற்றம் சாட்டப்பட்டவர்களுடன்
மற்றவர்களுக்கு உள்ள தொடர்பை சிபிஐ ஆராய வேண்டும் என்று வலியுறுத்தியுள்ளார்.
சிலரது பெயர்கள் வேண்டுமென்றே விடப்பட்டுள்ளதாக சுவாமி குறிப்பிட்டார்.