உதயனின் இரட்டை வேடம் அம்பலம்!

தமிழ் தேசிய நாளிதழ் என்று தன்னைத் தானே கூறிக் கொள்ளும் உதயன் பத்திரிகையின் வெளிச்சத்துக்கு வராத சங்கதி தான் இது.

வரிக்கு வரி தேசியம் கதைக்கும் உதயனின் உண்மை முகம் இங்கே அம்பலம் ஆகின்றது.

நாடாளுமன்ற தேர்தல் காலத்தில் மஹிந்தரின் அருந்தவப் புதல்வரான நாமல் ராஜபக்ஸ உதயனுக்கு வந்துள்ளார்.

சிங்கள அமைச்சர்களும் சிங்கள அரசியல்வாதிகளும் உதயனுக்கு வருவதும்
அவர்களை உதயன் தலையில் தூக்கி வைத்துக் கொண்டாடுவதும் இது முதன்
முறையல்ல... தொடர்ந்து இடம்பெற்ற வண்ணம் உள்ளது.



உதயனின் நிர்வாக இயக்குனரும் தமிழ் தேசியக் கூட்டமைப்பின் நாடாளுமன்ற
உறுப்பினருமான சரவணபவனின் இரட்டை வேடம் இங்கே தெளிவாகத் தெரிகின்றது.

தங்களின் சொந்த வியாபார நோக்கத்துக்காக சிங்கள அரசியல்வாதிகளைப்
பயன்படுத்துவதும், தமிழ் மக்களை சிங்களத்திடம் மண்டியிடச் செய்யும்
நடவடிக்கையாகத் தான் தமிழ் மக்கள் இந்தச் சம்பவத்தை நோக்க வேண்டி உள்ளது.

இதற்கு முன்பும் உதயனின் வெள்ளி விழாக் கொண்டாட்டங்களின் போது யாழ்
இராணுவத் தளபதி மஹிந்த ஹத்துரு சிங்கவை கெளரவ விருந்தினராக அழைத்தமையும்,
சிவில் நிர்வாகத்துக்குப் பொறுப்பான கேணல் பெரேரா என்பவர் கொல்லப்பட்ட
உதயன் ஊடகவியலாளர்களுக்கு முதற் சுடரை ஏற்றி அஞ்சலி செலுத்த வைத்தமை
யாவரும் அறிந்ததே.

தமிழீழத் தேசியத் தலைவர் பிரபாகரனின் தாயான பார்வதி அம்மாளின் இறுதி
நிகழ்வின் போது உதயனின் வெள்ளிவிழாக் கொண்டாட்டங்கள் கோலாகலமாக இடம்பெற்றதை
தமிழ் மக்கள் யாரும் இலேசில் மறந்திருக்க மாட்டார்கள்.

ஏராளமான தமிழ் ஊடகவியலாளர்கள் கொல்லப்படுவதற்குத் துணை போன இராணுவத்தை
அழைத்து சரவணபவன் அரங்கேற்றிய நாடகமானது இலங்கையில் இருந்து கொண்டு
உண்மைகளை உலகுக்கு எழுதும் ஊடகவியலாளர்களை தலை குனிய வைப்பதாக
அமைந்திருந்தது.

இது ஆட்டுக் குட்டிக்கு ஓநாய் காவல் இருந்த கதையாகத் தான் உள்ளது.

அரசுக்கும், இராணுவத்துக்கும் தலையைக் காட்டி தமிழ்மக்களுக்கு வாலைக்
காட்டுகின்ற உதயனின் சுத்துமாத்துக்கள் இன்னும் எவ்வளவு நாளைக்கு என்று
பார்ப்போம்?

உதயனின் நெருங்கியவர்களாக ஆளும் கட்சி அரசியல்வாதிகளும், அமைச்சர்களும்,
இராணுவ அதிகாரிகளும் இருக்கும் போது உதயனின் ஊடகவியலாளர்கள் கொல்லப்படுவது
எப்படி?

உதயனின் நிர்வாகி இந்த சாதாரண தமிழனின் கேள்விக்கு விடை சொல்வாரா?

எது எவ்வாறெனினும், சரவணபவனின் சுயநல வியாபாரத்துக்கு பலியாக்கப்பட்ட
ஊடகவியலாளர்களின் குடும்பங்கள் தான் இன்று நடுத்தெருவில் நிற்கிறார்கள்.
இவர்களின் அவலம் புரியுமா உதயனின் நிர்வாகிக்கு?