சன் "டிவி'க்கு முறைகேடாக இணைப்பு : ஆவணங்களை ஆய்வு செய்கிறது சி.பி.ஐ.,

புதுடில்லி: முன்னாள் மத்திய அமைச்சர் தயாநிதியின் வீட்டிற்கு 300 தொலைபேசி
இணைப்புகள் வழங்கப்பட்டது தொடர்பாக, பாரத் சஞ்சார் நிகாம் நிறுவனத்தின்
(பி.எஸ். என்.எல்.,) ஆவணங்களை, சி.பி.ஐ., ஆய்வு செய்து வருகிறது. மத்திய
தொலைத்தொடர்புத் துறை அமைச்சராக தயாநிதி இருந்தபோது, அவரின் சென்னை
வீட்டிற்கு 300 தொலைபேசி இணைப்புகள் வழங்கப்பட்டதாகவும், இந்த தொலைபேசி
இணைப்புகளில் பல ஐ.எஸ்.டி.என்., லைன்கள் என்றும், இவை எல்லாம் தயாநிதி
வீட்டிற்கும், சன் "டிவி' நிறுவனத்திற்கும் இடையே அமைக்கப்பட்ட ரகசிய
கேபிள்கள் மூலம் முறைகேடாக பயன்படுத்தப்பட்டதாகவும், வெளிநாடுகளில் இருந்து
தகவல்களையும், படக்காட்சிகளையும் பெற பயன்படுத்தப்பட்டதாகவும் புகார்கள்
எழுந்தன. இது தொடர்பாக, சி.பி.ஐ., ஏற்கனவே ஆரம்பக்கட்ட விசாரணை நடத்தியது.
இந்நிலையில், 300 தொலைபேசி இணைப்புகள் வழங்கப்பட்டது தொடர்பாக,
பி.எஸ்.என்.எல்., நிறுவனத்திடம் இருந்து ஆவணங்களைப் பெற்று அவற்றை தற்போது
பரிசீலித்து வருகிறது. இந்த ஆய்வு நடவடிக்கைகள் இரண்டு மாதங்கள் வரை
தொடரும். அதன் பின்னரே முறையான வழக்குகள் பதிவு செய்யப்படும் என, சி.பி.ஐ.,
வட்டாரங்கள் கூறியுள்ளன. தற்போது நடத்தப்படும் ஆய்வின் போது, தயாநிதியின்
வீட்டிற்கு எப்படி அதிக அளவில் ஐ.எஸ். டி.என்., தொலைபேசி இணைப்புகள்
வழங்கப்பட்டன; அவை எப்படி சன் "டிவி'க்கு இணைக்கப்பட்டன என்ற விவரங்களைத்
தருமாறு தகவல் தொடர்புத் துறையை சி.பி.ஐ., கேட்டிருக்கிறது. இதனால்,
பி.எஸ். என்.எல்., நிறுவனத்திற்கு ஏற்பட்ட நஷ்டம் எவ்வளவு என்பது குறித்து
பரிசீலிக்கப்பட உள்ளது. மேலும், தயாநிதியின் வீட்டிற்கு வழங்கப்பட்ட
லைன்கள், எப்படி சன் "டிவி'யால் பயன்படுத்தப்பட்டன. எந்த தொழில்நுட்பம்
அதற்கு பயன்படுத்தப்பட்டது போன்றவை குறித்தும் சி.பி.ஐ., விசாரிக்கும்.
அமைச்சர் வீட்டிற்கு இணைப்பு என்று தரப்பட்டாலும், எப்படி முற்றிலும்
வேறுபட்ட தனியார் "டிவி' சேவைக்கு பயன்படுத்தப்பட்டன என்ற தொழில்நுட்ப
விவரங்கள் சேகரிக்கப்படுகின்றன. நான்காண்டுகள் ஆகிவிட்டன. கடந்த 2007ல்
இது தொடர்பாக நடவடிக்கை குறித்து, தகவல் தொடர்புத் துறைச் செயலருக்கு
அறிவுறுத்தப்பட்டும், அப்போது நடவடிக்கை எடுக்கப்படவில்லை என்றும்
சி.பி.ஐ., தன் குறிப்பில் தெரிவித்திருக்கிறது.