காவிரி நடுவர் மன்ற இறுதித் தீர்ப்பை கெஜட்டில் வெளியிட வேண்டும்

சென்னை :காவிரி நடுவர் மன்றம், 2007ல் பிறப்பித்த இறுதித் தீர்ப்பை,
மத்திய அரசின் கெஜட்டில் வெளியிட நடவடிக்கை எடுக்க வேண்டும் என, பிரதமர்
மன்மோகன் சிங்கிற்கு, தமிழக முதல்வர் ஜெயலலிதா கடிதம் எழுதியுள்ளார்.

இது தொடர்பாக, பிரதமர் மன்மோகன் சிங்கிற்கு, முதல்வர் ஜெயலலிதா எழுதியுள்ள கடித விவரம் வருமாறு:தமிழகத்தின்
வாழ்வாதாரம் காவிரி நதிநீர் என்பதை நீங்கள் நன்கு அறிவீர்கள். தமிழகத்தின்
கால்வாய் பாசனத்தில், 80 சதவீதம் இதன்மூலம் பூர்த்தியாகிறது. தமிழக
மக்களின் வாழ்க்கை மற்றும் உணவு பாதுகாப்பு போன்றவை, குறித்த நேரத்தில்
காவிரி நதி நீர் திறந்து விடப்படுவதை பொறுத்தே அமைகிறது.பாசனக் காலத்தில்,
மாதந்தோறும் தமிழகத்திற்கு திறந்து விட வேண்டிய தண்ணீரின் அளவை உறுதி செய்ய
வேண்டியது கர்நாடக அரசின் கடமை. இதைச் செய்ய தவறினால், தமிழகத்தின்
விவசாயம் பாதிக்கப்படுவதோடு, பொருளாதாரமும் பாதிக்கப்படும்.
தமிழகம்
மற்றும் கர்நாடகா இடையே, காவிரி நதி நீரை பங்கீட்டுக் கொள்வது தொடர்பான
பிரச்னை, 1960லிருந்து உள்ளது. தமிழகத்தின் ஒப்புதல் இல்லாமல், பாசன
திட்டங்களை கர்நாடக அரசு செயல்படுத்தியதில் இருந்து, இப்பிரச்னை உள்ளது.
சுப்ரீம் கோர்ட் உத்தரவின் அடிப்படையில், காவிரி நடுவர் மன்றத்தை, 1990ல்
மத்திய அரசு அமைத்தது.

காவிரி நடுவர் மன்றம், 1991, ஜூன் 25ல் இடைக்கால உத்தரவு பிறப்பித்தது.
இந்த உத்தரவு, இந்திய அரசின் கெஜட்டில், 1991, டிசம்பர் 10ல்
வெளியிடப்பட்டது. அதே நேரத்தில், இந்த நடுவர் மன்றம், மாநிலங்களுக்கு
இடையேயான நதி நீர் தகராறுகள் சட்டம், 1956ன் கீழ், 2007, பிப்ரவரி 5ல்
இறுதி உத்தரவு பிறப்பித்தது. கர்நாடகம், தமிழகம், கேரளா மற்றும் புதுச்சேரி
யூனியன் பிரதேசம் பலன் பெறும் வகையில், போதிய அளவு தண்ணீர் ஒதுக்கீடு
செய்து உத்தரவு பிறப்பித்தது.காவிரி நடுவர் மன்றத்தின் இந்த இறுதித்
தீர்ப்பை எதிர்த்து, கர்நாடகா மற்றும் கேரள மாநிலங்கள், சுப்ரீம்
கோர்ட்டில் வழக்குத் தொடர்ந்துள்ளன. அதே நேரத்தில், காவிரி நடுவர்
மன்றத்தின் இறுதித் தீர்ப்பில் உள்ள சில அம்சங்களை எதிர்த்து, தமிழக அரசும்
சுப்ரீம் கோர்ட்டில் அப்பீல் செய்துள்ளது.

காவிரி நடுவர் மன்றத்தின் இறுதித் தீர்ப்பை எதிர்த்து, சுப்ரீம்
கோர்ட்டிலும், நடுவர் மன்றத்திலும் சிவில் அப்பீல் மனுக்கள் நிலுவையில்
இருந்தாலும், காவிரி நடுவர் மன்றம், 2007, பிப்ரவரி 5ல் பிறப்பித்த இறுதித்
தீர்ப்பை, மத்திய அரசு கெஜட்டில் வெளியிட வேண்டும்.மாநிலங்களுக்கு
இடையேயான நதி நீர் தகராறுகள் சட்டம், 1956 பிரிவு 6(1)ன் கீழ் இதைச் செய்ய
வேண்டும். இறுதித் தீர்ப்பை கெஜட்டில் வெளியிடுவதற்கான ஏற்பாடுகளைச்
செய்யும்படி, மத்திய நீர்வளத்துறை அமைச்சகத்திற்கு உத்தரவிடும்படி, உங்களை
கேட்டுக் கொள்கிறேன். அத்துடன், காவிரி மேலாண்மை வாரியத்தையும் உடனடியாக
அமைக்க வேண்டும்.இவ்வாறு, பிரதமர் மன்மோகன் சிங்கிற்கு எழுதியுள்ள
கடிதத்தில், ஜெயலலிதா குறிப்பிட்டுள்ளார்.