பட்டமரம் பூக்குமா?

பட்டமரம் அழுகிறது அட்டமியின் ஒளிநிலவு
.. விட்டமழைத் தூறலடி தங்கமே தங்கம் - இது
..... விதிஎழுதும் ஒருகவிதை தங்கமே தங்கம்
கட்டைவிரல் எழுகிறது தொட்டெடுக்க விழைகிறது
... ஒற்றைவிரல் பற்றிடுமோ தங்கமே தங்கம் - நல்
..... ஓசைஒரு கையசைவில் உள்ளதோ தங்கம்
திட்டுமணல் மேடைதனில் சின்னவிதை காய்கிறது
... கொட்டி வெயில் எறிக்கையிலே தங்கமே தங்கம் - அதில்
.....குருத்தெழுமோ வெடித்துமுகை கொள்ளுமோ தங்கம்
தட்டிநிலம் நடைபழகும் தளர்வுகொண்ட காலிரண்டும்
...முட்டியெழும் அலைகடலில் தங்கமே தங்கம் - அவை
..... மூழ்கிடாது மேல்நடந்து செல்லுமோ தங்கம்

நட்டநடு வீதியிலே நாலுபேர்கள் முன்னிலையில்
... சத்தியமும் பட்டபாடு தங்கமே தங்கம் - அது
.....நித்தியமோ நின்றிடுமோ தங்கமே தங்கம்
தொட்டவரும் வெட்டவரும் தீயவரால் துன்பமதைப்
...பட்டவரும் கொண்டவலி கொஞ்சமோ தங்கம் - அப்
.....பட்டுமலர் கொட்டி ரத்தம் பார்த்தையோ தங்கம்
எட்டவரும் கட்டைதனை ஏறிஉயிர் காக்கவென
... முட்டவழிந்தோடும் ஆற்றில் தங்கமே தங்கம் - நீர்
.....மூழ்கமுதல் எண்ணியவன் தங்கமே தங்கம்
கிட்டவரக் கட்டையல்ல கொத்தும் பெரும் அரவமெனில்
... எப்படிநீ தப்பிடுவாய் தங்கமே தங்கம் - இந்த
..... ஏழைவாழ்வு மப்படியே தங்கமே தங்கம்

சுட்டுநிலா எரிவதில்லை தோன்றும் வெயில் கறுப்புமில்லை
... குட்டிடவும் குனிந்தொருவன் நிற்பதேயில்லை -அந்தக்
.....குணமறிந்து நீயும் எழு தங்கமே தங்கம்
முட்டையிலே குதிரைவரும், முந்திரியில் பொன்விளையும்
... குட்டியானை பறந்துபோகும் என்றவர் தங்கம் - இப்போ
.....கூரையிலே கோழிகொள்ளப் படுவதோ துன்பம்
கட்டிச்சிறை யிடநினைந்து கையிலொரு விலங்கு கொண்டு
...எத்தனைதான் ஓடினாலும்தங்கமே தங்கம் - பொய்
..... இட்டுக் கட்டும்வித்தை கற்றோன் ஏய்க்கிறான் தங்கம்
தட்டிவாசல் கூட்டிவைத்து தண்ணிதெளித் தூபமிடு
... முத்துஒளித் தீபமொன்று ஏறுமாம் தங்கம் - இனி
..... முன்னெழுந்து விடியல் வரும் தங்கமே தங்கம்

பட்டமரம் பூக்குமடி பௌர்ணமியும் தோன்றுமடி
... விட்ட மழை இடி முழக்கம் காணுவோம் தங்கம் - இனி
..... விடியலெண்ணி பாய் சுருட்டி போடடி தங்கம்
தொட்டதெலாம் துலங்குமடி தூரஒளி தோன்றுமடி
...சட்டப்படி எங்கள்தமிழ் வெல்லுமாம் தங்கம் - அது
......எட்டியுயர் வான் வளரச்செய்குவோம் தங்கம்
கெட்டபகை கைபிடித்து கீழிருட்டு சிறையிருத்தி
...மற்றவர்கள் கேள்வி கேட்கத் தங்கமே தங்கம் - நாம்
..... மண்ணைத் தொட்டு வணங்கிடலாம் தங்கமே தங்கம்
பொட்டுமின்றிப் பூவுமின்றிப் போவதெங்கே நில்லுகொஞ்சம்
... சத்தியமே வெல்லுமடி தங்கமே தங்கம் - நீ
..... சத்தியமாய் கண்டிடுவாய் நம்தமிழீழம்


நீண்ட நாட்கள் வரவில்லை. இடையில் நிறைய கவிதைகள் எழுதிவிட்டேன். ஒவ்வொன்றாகப் பகிர்ந்து கொள்கிறேன்
அன்புடன்
கிரிகாசன்

நீண்ட நாட்கள் வரவில்லை. இடையில் நிறைய கவிதைகள் எழுதிவிட்டேன். ஒவ்வொன்றாகப் பகிர்ந்து கொள்கிறேன்
அன்புடன்
கிரிகாசன்

கவிதை நல்லாருக்கு! வாழ்த்துக்கள்...