சொத்துக்காக வெறிச்செயல் 3 வயது சிறுமியை கடத்தி கொன்ற அண்ணன் கைது

சொத்துக்காக சித்தப்பாவின் 3
வயது மகளை கடத்தி கொன்றதாக வாலிபரை போலீசார் கைது செய்தனர். விழுப்புரம்
மாவட்டம் மரக்காணம் அருகே கரிப்பாளையம் பகுதியை சேர்ந்தவர் அய்யனார்(40).
கூலித்தொழிலாளி. இவரது மனைவி ராதா(37). இவர்களது மகள் ரோசா என்கிற
கல்பனா(3).

நேற்றுமுன்தினம் மாலை, ராதா வீட்டில் சமையல் செய்து
கொண்டிருந்தார். அப்போது சிறுமி ரோசா வெளியே விளையாடி கொண்டிருந்தாள்.
சிறிது நேரத்தில் மகள் மாயமானதால் அதிர்ச்சி அடைந்த ராதா அக்கம்
பக்கத்தில் தேடியும் கிடைக்கவில்லை.

இதுகுறித்து உறவினர்கள்
மரக்காணம் போலீசுக்கு தெரிவித்தனர். ஆனால் போலீசார் அலட்சியப்படுத்தினர்.
இந்நிலையில் கரிப்பாளையம் அருகே உப்பளம் பகுதியில் உள்ள ஒரு குளத்தில் ரோசா
மிதந்தார்.

உடனே அவளை மரக்காணம் அரசு மருத்துவமனைக்கு கொண்டு சென்று பரிசோதித்தபோது ரோசா ஏற்கனவே இறந்துவிட்டதாக தெரிவித்தனர்.
தகவல்
அறிந்து சென்ற போலீசார் குழந்தையின் உடலை கைப்பற்றி பிரேத பரிசோதனைக்காக
கனகசெட்டிக்குளம் பிம்ஸ் மருத்துவமனைக்கு அனுப்பி வைத்தனர்.

இதுகுறித்து
மரக்காணம் போலீசில் ரோசாவின் தந்தை அய்யனார் புகார் செய்தார். அதில்,
தனது மகள் ரோசாவை, தனது அண்ணன் கிருஷ்ணன் மகன் எலி என்கிற
லட்சுமிநாராயணன்(22) நகைக்காகவும், தனது சொத்துக்காகவும் கடத்தி கொலை
செய்துள்ளார், அவரை உடனே கைது செய்ய வேண்டும், என கூறியுள்ளார்.

போலீசார்
நடத்திய விசாரணையில், தனது சித்தப்பாவின் ஒரே மகளை கொன்றால் அவருடைய
சொத்துக்கள் தனக்கே சொந்தமாகிவிடும் என கருதி, குழந்தையை கடத்தி சென்று
கொலை செய்ததை ஒப்புக்கொண்டார். இதையடுத்து எலி என்கிற லட்சுமிநாராயணனை
போலீசார் கைது செய்தனர்.