330 அடி உயரத்துக்கு கூட்டு குடும்ப ‘பிளாட்’!

கொல்கத்தா: இந்தியாவின் கூட்டு குடும்ப பாரம்பரியத்தை பாதுகாக்கும்
நோக்கில் கொல்கத்தாவில் 330 அடி உயர பிரமாண்ட அடுக்குமாடி குடியிருப்பு
கட்டப்பட உள்ளது. தாத்தா, பாட்டி, பெரியப்பா, பெரியம்மா, சித்தப்பா,
சித்தி, குழந்தைகள் என்று கூட்டு குடும்பமாக வசிப்பது இந்தியாவின்
பாரம்பரியம். இது சுதந்திரத்துக்கு தடை என்ற கருத்து இளைஞர்கள் மத்தியில்
அதிகரித்து வருவதால் தனி குடும்பங்கள் எண்ணிக்கை அதிகரித்து வருகிறது.
கூட்டு குடும்பங்கள் அரிதாகி வருகின்றன.

இந்நிலையில், கூட்டு
குடும்ப பாரம்பரியத்தை வலியுறுத்தும் நோக்கில் மேற்குவங்க தலைநகர்
கொல்கத்தாவில் பிரமாண்ட ‘கூட்டு குடும்ப’ அடுக்குமாடி குடியிருப்பு ஒன்று
அமைக்கப்பட உள்ளது. ‘அட்மாஸ்பியர்’ (வளிமண்டலம்) என்ற பெயரில் இந்த
குடியிருப்பு 330 அடி உயர பிரமாண்ட கட்டிடமாக கட்டப்படுகிறது. இதில் 80
கூட்டு குடும்பங்கள் வசிக்க முடியும். பெரிய நகரங்களில் திறந்தவெளியில்
காற்றோட்டமான இடத்தில் விளையாடும் வாய்ப்பு பல குழந்தைகளுக்கு
கிடைப்பதில்லை. இந்த குறையும் ‘அட்மாஸ்பியர்’ குழந்தைகளுக்கு இருக்காது.

அவரவர்
பிளாட்டில் திறந்தவெளி மைதானம் போலவே ‘இன்டோர் மைதானங்கள்’
அமைக்கப்படுகின்றன. இதுதவிர, எல்லா பிளாட்காரர்களும் மகிழ்ச்சியாக
பொழுதுபோக்கவும் பெரியவர்கள் ஓய்வெடுக்கவும் மொட்டை மாடியில் பிரமாண்ட
பூங்கா அமைக்கப்படுகிறது. மரங்கள், புல்தரையுடன் கூடிய இந்த பூங்காவில்
நீச்சல் குளம், கோல்ப் மைதானம் ஆகியவையும் அமைகின்றன. ஸ்பெயினின்
பார்சிலோனா நகரில் விரைவில் நடக்கவுள்ள உலக கட்டிட தொழில்நுட்ப
திருவிழாவுக்காக இந்த பிரமாண்ட டிசைன் உருவாக்கப்பட்டுள்ளது.

சிறந்ததாக
தேர்வு செய்யப்படும் டிசைனுக்கு ‘பீப்பிள்ஸ் சாய்ஸ்’ விருது
வழங்கப்படுகிறது. இந்த போட்டியில் கொல்கத்தா அட்மாஸ்பியர் தவிர பல்வேறு
நாடுகளில் இருந்த கட்டிட வடிமைப்பாளர்கள் கலந்துகொள்கின்றனர். சாக்லேட்
ரிப்பன் கேக் போல ஹெலிபேட் வசதியுடன் கூடிய பிரமாண்ட கட்டிடம் ஒன்று
துருக்கியில் கட்டப்படுகிறது. இதற்கான டிசைனும் போட்டியாளர்கள் மத்தியில்
பெரும் வரவேற்பை பெற்றுள்ளது. கட்டிட டிசைன் உருவாக்கும் பணிகள்
முடிவடைந்துவிட்டன. கட்டுமானத்துக்கான ஏற்பாடுகள் விரைவில் தொடங்கும் என்று
ஆர்கிடெக் நிறுவன அதிகாரிகள் தெரிவித்தனர்