ஆட்டோ டிரைவர்கள் திடீர் மறியல் ஒரு மணி நேரம் காத்திருந்த விநாயகர்!

ராமேஸ்வரம்: ராமேஸ்வரத்தில் ராமநாதசுவாமி கோயில் புகழ்பெற்றது.
இக்கோயிலுக்கு இந்தியா முழுவதும் இருந்து தினமும் ஏராளமான பக்தர்கள் வந்து
செல்கின்றனர். கோயில் விக்கிரகங்கள் பராமரிப்பின்றி இருந்ததால் அவற்றை
புதுப்பிக்கவும், ரதவீதிகளை மேம்படுத்தவும் மதுரை ஐகோர்ட் கிளை
உத்தரவிட்டது. இதையடுத்து பணிகள் தொடங்கி நடந்து வருகிறது. மேலும்
ரவீதிகளில் ஆட்டோ உள்ளிட்ட வாகனங்கள் நிறுத்த கோயில் நிர்வாகம் தடை
விதித்தது.

இதற்கு ஆட்டோ டிரைவர்கள் கடும் எதிர்ப்பு
தெரிவித்துள்ளனர். இந்த உத்தரவால் தங்கள் வாழ்வாதாரம் பாதிக்கப்படுவதாக
குற்றம் சாட்டி கடந்த சில நாட்களாக போராட்டம் நடத்தி வருகின்றனர். நேற்று
ராமேஸ்வரம் நகராட்சியை முற்றுகையிட்டனர். இந்நிலையில் இன்று காலை தடையை
மீறி கீழ ரதவீதியில் ஆட்டோ நிறுத்த முயன்றனர். போலீசார் தடுத்ததால்,
நூற்றுக்கும் மேற்பட்ட ஆட்டோ டிரைவர்கள் மேல ரதவீதியில் ஆட்டோக்களை
நிறுத்தி மறியலில் ஈடுபட்டனர். திமுக, மதிமுக, நாம் தமிழர் கட்சியினரும்
ஆட்டோ டிரைவர்களுக்கு ஆதரவாக போராட்டத்தில் ஈடுபட்டனர்.

இதையடுத்து
ராமேஸ்வரம் தாசில்தார் கதிரேசன், டிஎஸ்பி மணிவண்ணன், இன்ஸ்பெக்டர்கள்
சண்முகம், கண்ணன் ஆகியோர் விரைந்து வந்து பேச்சுவார்த்தை நடத்தினர். இதில்
சமரசம் ஏற்பட்டு ஆட்டோ ஓட்டுனர்கள் கலைந்து சென்றனர்.
மறியலால் சுமார்
ஒரு மணிநேரம் போக்குவரத்து பாதிக்கப்பட்டது. விநாயகர் சதுர்த்தியை
முன்னிட்டு ராமேஸ்வரம் கோயிலில் இருந்து விநாயகர் ஊர்வலம் நடந்தது. மேல
ரதவீதியில் வந்தபோது, மறியல் காரணமாக விநாயகர் ஊர்வலம் தடைபட்டது. ஒரு மணி
நேரத்துக்கு பிறகு விநாயகர் காட்டுப்பிள்ளையார் கோயிலுக்கு எழுந்தருளினார்.