சம்பந்தன், மாவை உட்பட எதிர்க்கட்சி தலைவர்கள் பலரின் பாதுகாப்பு திடீரென நீக்கம்

தமது
அரசியல் செயற்பாடுகளை முடக்கும் நோக்கத்துடனேயே எதிர்க்கட்சிப்
பிரமுகர்களின் பாதுகாப்பை அரசாங்கம் முன்னறிவித்தல் எதுவும் இன்றி
நீக்கியிருப்பதாக எதிர்க் கட்சிப் பிரதிநிதிகள் குற்றஞ்சாட்டியுள்ளனர்.

நாடாளுமன்ற்
பொதுத் தோ்தலுக்கான நியமனப்பத்திரம் தாக்கல் செய்வதற்கான தினம்
நெருங்கிக்கொண்டிருக்கும் நிலையில், பிரதான எதிர்க்கட்சித் தலைவர்களுக்கான
பாதுகாப்பு அரசாங்கத்தினால் திடீரென நேற்று திங்கட்கிழமை இரவு
நீக்கப்பட்டிருக்கின்றது.

தோ்தல் நடவடிக்கைகளில் தம்மை ஈடுபடாமல்
தடுக்கும் நோக்கத்துடனேயே இந்த நடவடிக்கையை அரசாங்கம் அதிரடியாக
மேற்கொண்டிருப்பதாக எதிரணி வட்டாரங்கள் குற்றஞ்சாட்டியுள்ளன.

சிறிலங்கா
முஸ்லிம் காங்கிரஸ் தலைவர் ரவூப் ஹக்கீம், பொதுச் செயலாளர் ஹஸன் அலி,
தமிழ்த் தேசிய கூட்டமைப்பு தலைவர் இரா.சம்பந்தன், மாவை சேனாதிராஜா,
மற்றும் சிறிலங்கா சுதந்திரக் கட்சி மக்கள் பிரிவின் தலைவர் மங்கள சமரவீர
ஆகியோருடைய பாதுகாப்பே அராங்கத்தின் அவசர உத்தரவுக்கமைய நேற்றிரவு
நீக்கப்பட்டுள்ளது.

ரவூப் ஹக்கீமுக்கு அமைச்சரவைப் பாதுகாப்பு
அதிகாரிகள் எட்டு பேரின் பாதுகாப்பு வழங்கப்பட்டிருநதது. இதனைவிட இரண்டு
பாதுகாப்பு வாகனங்களும் அவருக்கு கொடுக்கப்பட்டிருந்தது.
அச்சுறுத்தல் மிக்க ஒரு கட்சித் தலைவர் என்ற முறையிலும், எம்.பி. என்ற முறையிலுமே இந்தப் பாதுகாப்பு அவருக்கு வழங்கப்பட்டிருந்தது.

பொலிஸ்
மா அதிபரின் உத்தரவின் பேரில் இந்தப் பாதுகாப்பு அதிகாரிகள் உடனடியாக
திரும்ப அழைக்கப்பட்டுள்ளதுடன், இரண்டு பாதுகாப்பு வாகனங்களையும்
உடனடியாகத் திருப்பி ஒப்படைக்குமாறும் உத்தரவிடப்பட்டுள்ளது.

இதே
போல முஸ்லிம் காங்கிரஸ் பொதுச் செயலாளர் ஹஸன் அலிக்கு வழங்கப்பட்டிருந்த
அமைச்சரவைப் பாதுகாப்பு அதிகாரிகள் ஐவரும் உடனடியாக வாபஸ்
பெறப்பட்டுள்ளார்கள்.

தமிழ்த் தேசியக் கூட்டமைப்பின் தலைவர்
இரா.சம்பந்தனுக்கு சந்திரிகா குமாரதுங்க ஜனாதிபதியாக இருந்த காலத்திலேயே
அமைச்சரவை பாதுகாப்பு அதிகாரிகளின் பாதுகாப்பு வழங்கப்பட்டிருந்தது. அதனை
உடனடியாக மீளப் பெறுவதாக அரசாங்கம் அறிவித்திருக்கின்றது.
இதே போல மாவை சேனாதிராஜாவின் பாதுகாப்பு அதிகாரிகளும் நீக்கப்பட்டுள்ளனர்.

அச்சுறுத்தலை
எதிர்கொண்டுள்ள தலைவர்கள் என்ற முறையிலேயே இவர்களுக்கு பாதுகாப்பு
வழங்கப்பட்டிருந்தது எனத் தெரிவிக்கும் எதிர்க்கட்சி வட்டாரங்கள், தமது
பாதுகாப்பை நீக்கியதன் மூலம் - தேர்தல் கால அரசியல் செயற்பாடுகளில் ஈடுபட
முடியாமல் எதிர்க் கட்சித் தலைவர்களை முடக்கி வைப்பதற்கு அரசு
திட்டமிடுவதாகவும் குற்றஞ்சாட்டியுள்ளனர்.
தமி்ழ் தேசிய கூட்டமைப்பின் முதன்மை உறுப்பினர் ஒருவர்
புதினப்பலகையிடம் பேசும் போது - தமது உயிர்களுக்கு அரச தரப்பாலேயே ஆபத்தை
ஏற்படுத்துவதற்கான ஒரு முன்னேற்பாடாகவும் இது இருக்கலாம் என அச்சம்
வெளியிட்டார்.