ஊழல்வாதிகளைத் தூக்கில் போடவேண்டும் – அன்னா ஹசாரே

அன்னா ஹசாரே

மும்பை,
ஆக 10: ஊழல்வாதிகளைத் தூக்கில் போடவேண்டும் என்று சமூக சேவகர் அன்னா ஹசாரே
கூறியுள்ளார். எந்த வகையிலும் அப்பழுக்கற்ற தம்மை, மத்திய அரசு தேவையானால்
சோதித்துக் கொள்ளலாம் என்றும் அவர் தெரிவித்துள்ளார்.
ஊழலுக்கு
எதிராக குரல் கொடுத்து வருகிறார். ஊழல் வாதிகளை தண்டிக்க வலிமையான லோக்பால்
மசோதா கொண்டு வர வேண்டும் என்று வலியுறுத்தி வருகிற 16-ந்தேதி டெல்லியில்
தொடர் உண்ணாவிரதம் இருக்கப்போவதாக அன்னா ஹசாரே அறிவித்துள்ளார்.
அவரது
உண்ணாவிரதத்தை தடுத்து நிறுத்த மத்திய அரசு பல வழிகளில் முயற்சி
மேற்கொண்டு வருகிறது. உண்ணாவிரதத்துக்கு ஆதரவு திரட்டும் வகையில்
மும்பையில் அவரது ஆதரவாளர்கள் பேரணி நடத்தினார்கள். இதில் அன்னா ஹசாரே
கலந்து கொண்டார்.
பின்னர் மும்பை பத்திரிகையாளர் சங்கம் ஏற்பாடு
செய்து இருந்த கூட்டத்தில் அன்னா ஹசாரே நிருபர்களுக்கு பேட்டி அளித்தார்.
அவர் கூறியதாவது:
நான் ஊழலை எதிர்த்து போராட்டம் நடத்துவதால் மத்திய
அரசு எனக்கு குறி வைத்துள்ளது. இதற்காக கவலைப்படவில்லை. ராணுவத்தில் வீரனாக
15 ஆண்டுகள் பணியாற்றியுள்ளேன். ராணுவத்தில் பணிபுரிந்த போது என்மீது எந்த
குற்றச் சாட்டும் இல்லை. தேவைப்பட்டால் மத்திய அரசு ஆட்களை அனுப்பி எனது
சர்வீஸ் ஆவணங்களை சரிபார்த்துக் கொள்ளலாம்.
மராட்டிய மாநிலத்தில்
உள்ள எனது சொந்த கிராமத்துக்கு யாரை வேண்டுமானாலும் அனுப்பி சோதனை
செய்யலாம். என் வாழ்நாளில் நான் எந்த தவறும் செய்யவில்லை. அப்பழுக்கற்றவன்.
எனது வங்கி கணக்கில் எந்த பணமும் இல்லை. சொந்த கிராமத்தில் கோவிலில் உள்ள
8-க்கு 10 அடி கொண்ட அறையில் வசிக்கிறேன். சாப்பிட ஒரு தட்டும்,
தூங்குவதற்கு ஒரு படுக்கையும்தான் இருக்கிறது. அங்கு சோதனையிடுவதற்கு
எதுவும் இல்லை.
அங்கு நான் நடத்திவரும் இயக்கத்தை மக்கள் சென்று
பார்வையிடலாம். வலிமையான லோக்பால் சட்டம் கொண்டு வரக்கோரி டெல்லியில்
திட்டமிட்டபடி வருகிற 16-ந்தேதி உண்ணா விரதம் தொடங்குவேன். இதில் எந்த
மாற்றமும் இல்லை. நான் யாருக்கும் எதிரி அல்ல. எனது போராட்டம் எந்த
தனிப்பட்ட நபருக்கோ, கட்சிக்கோ எதிரானது அல்ல. ஊழலை ஒழிக்கவே போராடுகிறேன்.
ஊழலால்
தனி மனிதன் பாதிக்கப்படுகிறான். விலைவாசி ஏற்றத்துக்கும், பணவீக்கம்
அதிகரிப்பதற்கும் ஊழல்தான் காரணம். பணவீக்கத்தின் ஆணிவேர் ஊழல்தான். ஊழலை
அடியோடு ஒழிக்க முடியாது. ஆனால் 80 சதவீதம் முதல் 90 சதவீதம் அளவுக்கு அதை
கட்டுப் படுத்த முடியும்.
ஊழலை ஒழிப்பது நமது 2-வது சுதந்திர
போராட்டமாக இருக்கும். நமது நாட்டை ஆங்கிலேயரின் பிடியில் இருந்து மீட்க
நடந்த சுதந்திர போராட்டத்தில் லட்சக்கணக்கான மக்கள் உயிர்த் தியாகம்
செய்தனர். ஆனால் இந்த 65 ஆண்டு கால சுதந்திர நாட்டில் எந்த மாற்றமும்
ஏற்படவில்லை.
2ஜி ஸ்பெக்ட்ரம் ஊழல், காமன்வெல்த் போட்டி ஊழல் என
அடுக்கடுக்கான ஊழல்கள் நடைபெற்றுக் கொண்டு இருக்கின்றன. ஊழல்வாதிகளை
தண்டிக்க தற்போதுள்ள சட்டம் கடுமையானதாக இல்லை. ஊழல் பேர்வழிகளை சிறையில்
அடைக்கும் அதிகாரம் சட்டத்துக்கு இல்லை. அதற்கான அதிகாரம் நான்
தயாரித்துள்ள “மக்கள் லோக்பால்” சட்டத்தில் உள்ளது. அதை மக்கள் மன்றத்தில்
(பாராளுமன்றம், சட்டமன்றம்) நிறைவேற்ற வேண்டும் என்று நாம் மத்திய அரசை
வற்புறுத்த வேண்டும்.
ஊழல் பேர்வழிகளை நாம் ஏன் பாதுகாக்க வேண்டும்?
இன்னும் சொல்லப்போனால் அவர்களை தூக்கில் போட வேண்டும். ஊழல் பணத்தை
பறிமுதல் செய்ய வேண்டும். குறைந்தபட்சம் ஊழல்வாதிகளை சிறையில் தள்ளி
அவர்களிடம் இருந்து பணத்தை கைப்பற்ற வேண்டும்.
இவ்வாறு அன்னாஹசாரே கூறினார்.