கல்விக் கட்டண நிர்ணயக் குழுத் தலைவரை இரு வாரங்களுக்குள் நியமிக்க வேண்டும்: உயர் நீதிமன்றம்

சென்னை, ஆக. 5: தனியார் பள்ளிகள் மாணவர்களிடம் வசூலிக்க வேண்டிய கட்டணத்தை
முடிவு செய்யும் கல்விக் கட்டண நிர்ணயக் குழுவுக்கான தலைவரை இரண்டு வாரங்களுக்குள்
நியமிக்க வேண்டும் என்று தமிழக அரசுக்கு சென்னை உயர் நீதிமன்றம் உத்தரவிட்டது.
இது தொடர்பாக கடலூர் மாவட்டம், பண்ருட்டி ஜான் தேவே மெட்ரிகுலேஷன் பள்ளியில்
பயிலும் ஜெயஸ்ரீனிவாசன் என்ற மாணவரின் தந்தை எம். சேஷாசலம் சென்னை உயர்
நீதிமன்றத்தில் பொது நல மனு தாக்கல் செய்தார்.
மனுவில் கூறியுள்ளதாவது:
தமிழ்நாட்டில் இயங்கி வரும் தனியார் பள்ளிகள் கல்விக் கட்டணத்தைத் தவிர
நன்கொடை, சேர்க்கைக் கட்டணம், கட்டட நிதி என்று பல்வேறு பெயர்களில் மாணவர்கள்
மற்றும் பெற்றோர்களிடம் இருந்து மிக அதிகப்படியான கட்டணத்தை வசூலித்து வருகின்றன.
பெற்றோர்கள் கடன் வாங்கியும், நகைகளை அடமானம் வைத்தும் மற்றும் பல்வேறு வழிகளில்
சிரமப்பட்டு அந்தக் கட்டணங்களை செலுத்தி வருகின்றனர்.
இவ்வாறு பள்ளிகள் வசூலிக்கும் இந்த நியாயமற்ற கட்டண வசூலை ஒழுங்குபடுத்த சட்ட
ரீதியான எந்த அமைப்பும் இல்லாத நிலை இருந்து வந்தது. இந்நிலையில், தனியார் பள்ளிகள்
வசூலிக்கும் கல்விக் கட்டணத்தை ஒழுங்குபடுத்தும் நோக்கில் தமிழ்நாடு கல்விக் கட்டண
வசூல் ஒழுங்குமுறைச் சட்டம் கடந்த 2009-ம் ஆண்டு இயற்றப்பட்டது.
கடந்த 7.12.2009 அன்று நடைமுறைக்கு வந்த அந்த சட்டத்தின்படி, தனியார் பள்ளிகள்
வசூலிக்க வேண்டிய கட்டணத்தை முடிவு செய்வதற்காக கல்வி கட்டண நிர்ணயக் குழு
அமைக்கப்பட்டது. நீதிபதி கே. கோவிந்தராஜன் அதன் தலைவராக நியமிக்கப்பட்டார்.
தமிழ்நாட்டில் உள்ள எல்லா தனியார் பள்ளிகள் பற்றிய விவரங்களையும் சேகரித்து,
ஒவ்வொரு பள்ளியும் வசூலிக்க வேண்டிய கட்டணத்தை அந்தக் குழு நிர்ணயம் செய்தது.
இவ்வாறு 10 ஆயிரத்து 233 பள்ளிகளுக்கான கட்டணத்தை நிர்ணயித்து 7.5.2010 அன்று
நீதிபதி கோவிந்தராஜன் குழு உத்தரவிட்டது. இந்த கட்டண நிர்ணயத்தை 4 ஆயிரத்து 534
பள்ளிகள் ஏற்றுக் கொண்டன. 6,400 பள்ளிகள் இதனை எதிர்த்து மேல்முறையீடு செய்தன.
இதற்கிடையே நீதிபதி கோவிந்தராஜன் தனது பதவியை 8.10.2010 அன்று ராஜிநாமா
செய்தார். இதனைத் தொடர்ந்து கட்டண நிர்ணயக் குழுவின் அடுத்த தலைவராக நீதிபதி கே.
ரவிராஜ பாண்டியன் 30.10.2010 அன்று நியமிக்கப்பட்டார். மேல் முறையீடு செய்த பள்ளிகள்
குறித்த விவரங்களை ஆராய்ந்த அவர், அந்தப் பள்ளிகளுக்கான கட்டணத்தை மறு நிர்ணயம்
செய்து 13.6.2011 அன்று அறிவித்தார். அதன் பிறகு அவர் தனது பதவியை ராஜிநாமா செய்தார்.

அதன் பின்னர் காலியான கட்டண நிர்ணயக் குழு தலைவர் பதவி நிரப்பப்படவில்லை.
குழுவின் உறுப்பினர் - செயலர் பதவியிடமும் காலியாக உள்ளது.
இந்நிலையில், எனது மகன் படிக்கும் பள்ளி உள்பட பல தனியார் பள்ளிகள் கல்விக்
கட்டண நிர்ணயக் குழு நிர்ணயித்த கட்டணத்தை மட்டும் வசூலிக்காமல், மிக அதிகக்
கட்டணங்களை வசூலித்து வருகின்றன.
இது தொடர்பான புகாரை அளிக்க நான் கட்டண நிர்ணயக் குழு அலுவலகத்துக்கு சென்றேன்.
ஆனால், குழுவின் தலைவர், உறுப்பினர் - செயலர் உள்ளிட்ட பதவிகள் காலியாக உள்ளதால்,
அதிகக் கட்டணம் வசூலிக்கும் பள்ளிகள் குறித்து என்னால் புகார் அளிக்க முடியவில்லை.

எனவே, கல்விக் கட்டண நிர்ணயக் குழுவின் தலைவர் மற்றும் பிற பதவியிடங்களை
உடனடியாக நிரப்புமாறு தமிழக அரசுக்கு நீதிமன்றம் உத்தரவிட வேண்டும் என்று மனுவில்
வலியுறுத்தப்பட்டது.
இந்த மனு தலைமை நீதிபதி எம்.ஒய். இக்பால், நீதிபதி டி.எஸ். சிவஞானம் ஆகியோரைக்
கொண்ட முதன்மை அமர்வு முன்னிலையில் வெள்ளிக்கிழமை விசாரணைக்கு வந்தது.
அப்போது, மனுதாரர் சார்பில் ஆஜரான மூத்த வழக்கறிஞர் பி. வில்சன், தனியார்
பள்ளிகளுக்கான கட்டணத்தை நிர்ணயிப்பது மட்டுமே குழுவின் பணி அல்ல. குழு நிர்ணயித்த
கட்டணத்தைவிட கூடுதல் கட்டணம் வசூலிக்கும் பள்ளிகள் தொடர்பாக புகார்கள் வந்தால்,
அந்தப் புகார்களை விசாரித்து தவறு செய்யும் பள்ளிகள் மீது நடவடிக்கை எடுக்குமாறு
அரசுக்கு பரிந்துரை செய்ய வேண்டியதும் குழுவின் முக்கியப் பணியாகும்.
ஆனால், இப்போது குழுவின் தலைவர் பதவியிடம் காலியாக இருப்பதால், அதிகக் கட்டணம்
வசூலிக்கும் பள்ளிகள் மீதான புகார்களை தெரிவிக்க இயலாமல் பெற்றோர்கள்
பாதிக்கப்பட்டுள்ளனர் என்றார்.
தமிழக அரசு சார்பில் ஆஜரான அரசு தலைமை வழக்கறிஞர் ஏ. நவநீதகிருஷ்ணன், கட்டண
நிர்ணயக் குழுவுக்கான புதிய தலைவரை நியமிக்கும் நடவடிக்கை அரசின் பரிசீலினையில்
உள்ளதாகவும், விரைவில் குழுவின் தலைவர் நியமிக்கப்படுவார் என்றும் தெரிவித்தார்.
இந்த வாதங்களைக் கேட்ட நீதிபதிகள், கல்விக் கட்டண நிர்ணயக் குழுவின் தலைவரை
இரண்டு வாரங்களுக்குள் நியமித்து, அது பற்றிய விவரத்தை நீதிமன்றத்தில் தாக்கல்
செய்ய வேண்டும் என்று அரசுக்கு உத்தரவிட்டனர். அடுத்த விசாரணை ஆகஸ்ட் 19-ம் தேதிக்கு
ஒத்திவைக்கப்பட்டது.
thanks:dinamanai