காமன்வெல்த் முறைகேடு: பிரதமருக்கும் பொறுப்பு

by **piraba** Sat Aug 06, 2011 6:50 am

Last Updated :

காமன்வெல்த் முறைகேடு: பிரதமருக்கும் பொறுப்பு Kamavelth

நாடாளுமன்றத்துக்கு வெள்ளிக்கிழமை எடுத்து வரப்படும் காமன்வெல்த்
விளையாட்டு ஏற்பாடுகள் குறித்தத் தணிக்கை அறிக்கை.

புதுதில்லி,ஆக 5: காமன்வெல்த் விளையாட்டுப் போட்டியை நடத்தும் பொறுப்பு சுரேஷ்
கல்மாடியிடம் போனதற்கு பிரதமரே பொறுப்பு என்கிறது தலைமை கணக்கு தணிக்கையாளரின்
அறிக்கை.
2010 ஆம் ஆண்டு தில்லியில் காமன்வெல்த் விளையாட்டுப் போட்டிகள் நடந்தன.
அப்போது மிகப் பெரிய அளவில் முறைகேடுகள் நடந்ததாக புகார் எழுந்தன. இதுகுறித்து
அமைக்கப்பட்ட சுங்லு கமிட்டி அரசுக்கு அறிக்கை அளித்துள்ளது. சிபிஐ விசாரணை நடத்தி
வருகிறது. இதையடுத்து காமன்வெல்த் விளையாட்டுப் போட்டிகளின் ஒருங்கிணைப்புக் குழுத்
தலைவர் சுரேஷ் கல்மாடி கைது செய்யப்பட்டு சிறையில் அடைக்கப்பட்டுள்ளார்.
இந்நிலையில், இந்த முறைகேடுகள் குறித்து ஆய்வு நடத்திய மத்திய தலைமைக்
கணக்குத் தணிக்கையாளரின் அறிக்கை வெள்ளிக்கிழமை நாடாளுமன்றத்தில் தாக்கல்
செய்யப்பட்டது. சுமார் 743 பக்க அறிக்கையில், போட்டி ஏற்பாடுகளில் மிகப் பெரிய
அளவில் முறை கேடுகளும், வீண் செலவுகளும் செய்யப்பட்டுள்ளதுடன், ஒப்பந்தங்கள்
வழங்குவதில் வேண்டப்பட்டவர்களுக்கு சலுகைகளும் காட்டப்பட்டுள்ளதாக
தெரிவிக்கப்பட்டுள்ளது. அறிக்கையில் இடம் பெற்றுள்ள சில முக்கிய விவரங்கள் :
பிரதமருக்கு பங்கு : அப்போதைய மத்திய விளையாட்டுத் துறை அமைச்சர் சுநீல்
தத்தின் கடும் எதிர்ப்பையும், ஆட்சேபணையையும் மீறி காமன்வெல்த் போட்டி
ஒருங்கிணைப்புக் குழுத் தலைவராக சுரேஷ் கல்மாடி நியமிக்கப்பட்டார். பிரதமர் அலுவலகப்
பரிந்துரையின் பேரிலேயே 2004 ஆம் ஆண்டு அவர் இப்பதவிக்கு நியமிக்கப்பட்டார். அவர்
ஒருங்கிணைப்புக் குழுத் தலைவராக நியமனம் செய்யப்பட்டதற்கு பிரதமர் அலுவலகம்தான்
பொறுப்பு.
2004 ஆம் ஆண்டு டிசம்பர் மாதம் 6 ஆம் தேதி பிரதமர் அலுவலகத்தின் கடிதத்தில்,
""2010 ஆம் ஆண்டுக்கான காமன்வெல்த் விளையாட்டுப் போட்டிகளை நடத்துவதற்கான
அதிகாரபூர்வ நடவடிக்கைகள் தொடங்கிவிட்டன. ஒருங்கிணைப்புக் குழுவின் தலைவராகவும்,
செயல் குழுவின் தலைவராகவும் சுரேஷ் கல்மாடி நியமிக்கப்படுவார் என
தெரிவிக்கப்பட்டுள்ளது ''.
2005 ஆம் ஆண்டு ஜனவரி மாதம் 29 ஆம் தேதி நடந்த 3வது அமைச்சர் குழுக்
கூட்டத்தில் சுரேஷ் கல்மாடியின் நியமனத்துக்கு ஒப்புதல் அளிக்கப்பட்டது. பிரதமர்
அலுவலகத்துக்கு இது தொடர்பாக அப்போதைய விளையாட்டுத் துறை அமைச்சர் சுநீல் தத்
எழுதிய கடிதத்தில் அதிர்ச்சி தெரிவித்துள்ளார். இது மத்திய அமைச்சர்கள் குழு
கூட்டத்தில் எடுக்கப்பட்ட முடிவுகளுக்கு எதிராக உள்ளதாகவும் அவர் அதில்
தெரிவித்துள்ளார்.
விளையாட்டுத் துறை அமைச்சகம் தயாரித்த அமைச்சர் குழுக் கூட்டத்தின் வரைவு
முடிவுகளுக்கும், அமைச்சரவை செயலகம் இறுதி செய்ததற்கும் இடையே பெருத்த வேறுபாடுகள்
உள்ளன.
பிரதமர் அலுவலகத்தின் முடிவு காரணமாக, அரசுக் கட்டுப்பாட்டில் செயல்படும்
வகையில் திட்டமிடப்பட்ட ஒருங்கிணைப்புக் குழு அரசின் கட்டுப்பாடு எதுவும் இல்லாத
தனியார் அமைப்பாக மாறியது.
ஒருங்கிணைப்புக் குழுவின் மீது எவ்விதக் கட்டுப்பாட்டையும் மத்திய
விளையாட்டுத்துறை அமைச்சகம் விதிக்கமுடியாத நிலை ஏற்பட்டதாக அப்போதைய
விளையாட்டுத்துறை அமைச்சர் மணி சங்கர் அய்யர், அத்துறை செயலர் எஸ்.கே. அரோரா ஆகியோர்
பிரதமர் அலுவலகத்திடம் தெரிவித்துள்ளனர். இதற்கு ஒருங்கிணைப்புக் குழு கடும்
எதிர்ப்பை தெரிவித்ததால், அவர்கள் தெரிவித்த கருத்து எடுபடாமல் போனது.
விளையாட்டுப் போட்டிகளை நடத்துவதற்கான நிதி, உத்தரவாதம் போன்றவற்றை மத்திய
அரசு அளிக்கும் நிலையில், அதை செயல்படுத்துபவர் அரசின் கட்டுப்பாட்டில் இருக்க
வேண்டியது மிக முக்கியம். ஆனால், இதுபோன்ற நிர்வாக முறையும், நிதிக்
கட்டுப்பாடுகளும் காமன்வெல்த் விளையாட்டுப் போட்டிக்கு பின்பற்றப்படவில்லை.
ஒப்பந்தங்களை முடிவு செய்வது, தேர்வு செய்வது, அளிப்பது, போட்டிகளை நடத்துவது
உள்ளிட்டவற்றில், அதிகாரமும், பொறுப்பும் யாருக்கு என்பது தெளிவாக
வரையறுக்கப்படவில்லை. தெளிவான நிர்வாக அமைப்பு இல்லாத நிலை, பல நிலைகளில் பல்வேறு
ஒருங்கிணைப்புக் குழுக்கள் அமைக்கப்பட்டது, மாற்றி அமைக்கப்பட்டது, திருத்தி
அமைக்கப்பட்டது போன்ற பல தவறுகளுக்கு அரசே பொறுப்பு.
ஷீலா தீட்சித்தின் தேவையற்ற செலவுகள் : காமன்வெல்த் விளையாட்டுப்
போட்டிகளுக்காக, தெரு விளக்குகள் அமைக்கப்பட்டதில் சுமார் ரூ.101 கோடி அளவுக்கு வீண்
செலவுகள் செய்யப்பட்டுள்ளது. இறக்குமதி செய்யப்படும் மற்றும் உள்நாட்டு
தயாரிப்புகளையும் ஒப்பிட்டு அதன் செயல்பாடு,விலை போன்றவை குறித்த தொழில் நுட்ப
அறிக்கை தயாரிக்கப்படவில்லை. ஒப்பந்தங்கள் தவறானவர்களுக்கு அளிக்கப்பட்டது.
ரூ.5000க்கு தரமற்ற விளக்குகள் பொருத்தப்பட்டன. ஒரு விளக்கிற்கு ரூ.25,000 வீதம்
அரசுப் பணம் முறைகேடாக செலவிடப்பட்டுள்ளது. விளையாட்டு அரங்கு பகுதிகளில் உள்ள
சாலைகளை அழகுபடுத்துவது, உள்கட்டமைப்பு வசதிகள், போன்றவற்றிற்கான ஒப்பந்தங்கள்
தவறானவர்களுக்கு அளிக்கப்பட்டுள்ளது. தாழ்தள பேருந்துகள் வாங்கியது, காமன்வெல்த்
நகரம், உணவு, நாற்காலி பெறப்பட்டது வரை அனைத்திலும் முறைகேடுகள் நடந்துள்ளன.
இவற்றுக்கு எல்லாம் தில்லி முதல்வர் ஷீலா தீட்சித்தே பொறுப்பு என்கிறது அறிக்கை.