தமிழக ஊடக விபச்சாரத்தால் திரிசங்கு நிலையில் ஈழத் தமிழர்கள்!

தமிழ்
நாட்டில் மீண்டும் ஈழத் தமிழர்களை வைத்து ஜோராக வியாபாரம் செய்ய
ஆரம்பித்து விட்டார்கள். ஈழத்தமிழ் மக்களை அடி முட்டாளாக நினைத்து
பிரச்சாரம் செய்கின்றன தமிழக ஊடகங்கள்.

அதிலும் குறிப்பாக இன்னுமொருபடி மேலே போய் தமிழகத்தின் முதன்மை நாளிதழ்
என்று தங்களைக் கூறிக்கொள்ளும் மாலை நாளிதழ் ஒன்றில் கடந்த வாரம்
முழுவதும் வெளியான சரமாரி விளம்பரங்கள் உலகெங்கும் வாழும் ஈழத் தமிழ்
மக்கள் மத்தியில் கடும் கோபத்தையும் அதிர்ச்சியையும் ஏற்படுத்தியுள்ளன.



ஈழத்தமிழ் மக்களை பகடைக்காய்களாகப் பயன்படுத்தி குறித்த நாளிதழ் பக்கம் பக்கமாக செய்த மாபெரும் விளம்பரப் புரட்சி தான் அது.

இலங்கை மீது பொருளாதாரத் தடையை வலியுறுத்தி தமிழக முதல்வர் ஜெயலலிதா
தமிழக சட்டமன்றில் தீர்மானம் ஒன்று நிறைவேற்றியமை யாவரும் அறிந்ததே.

அதனை தனக்கு சாதகாமாகப் பயன்படுத்திய குறித்த நாளிதழ் தமிழக அரசு
இலங்கை மீது பொருளாதாரத் தடை விதிக்க தீர்மானம் நிறைவேற்றியமை மூலம்
அமெரிக்காவும் இலங்கை மீது பொருளாதாரத் தடை விதித்ததாக பொய்ப் பிரச்சாரம்
செய்தது.



குறித்த பொய்ச்செய்தியை அ.தி.மு.க அமைச்சர்கள், நிர்வாகிகள்,
தொண்டர்கள் மற்றும் அபிமானிகளிடமிருந்து விளம்பரமாகப் பெற்று
இலட்சக்கணக்கில் கொள்ளை இலாபம் சம்பாதித்தது.

தமிழகம் பொருளாதாரத் தடை விதித்ததன் மூலம் அமெரிக்காவும் பொருளாதாரத்
தடை விதித்ததாக பொய் வதந்தியைப் பரப்பியமையானது ஈழத்தமிழர்களுக்கு ஆதரவாக
கருணாநிதி நடாத்திய மூன்று மணிநேர சாகும் வரையிலான உண்ணாவிரத நாடகத்தை
அப்படியே கண் முன் கொண்டு வந்து நிறுத்தியது.

அமெரிக்கா இதுவரை இலங்கை மீது பொருளாதாரத் தடை விதிக்கவில்லை என்பது குறிப்பிடத்தக்கது.



இப்படியாகச் செய்திகளை திரிபுபடுத்தி வெளியிட்டு பொறுப்பற்ற முறையில்
நடந்து கொள்ளும் ஊடகங்களால் தமிழக முதல்வர் ஜெயலலிதா ஈழத்தமிழர்கள் நலன்
கருதிச் செய்யப்படும் உதவிகள் கூட கொச்சைப் படுத்தப்படுகின்றன.

தமிழக அரசால் தமிழக மக்களுக்கு வழங்கப்படும் கூடுதலான சலுகைகள்
ஜெயலலிதா அவர்களால் தமிழக முகாம்களில் வாடும் ஈழத் தமிழர்களுக்கும்
வழங்கப் பட்டுக் கொண்டிருக்கின்றன.

கடந்த சில தினங்களுக்கு முன்னரும் கூட முகாம்களில் உள்ள ஈழத் தமிழ்
மக்களுக்கு மாதாந்தம் 1000 ரூபாய் வழங்கும் திட்டத்தை
அமுல்படுத்தியிருந்தார்.

தமிழகத்தின் கட்சிகளாலும், ஊடகங்களாலும் ஈழத்தமிழர்கள்
பகடைக்காய்களாகப் பயன்படுத்தப்படும் போக்கு வெந்த புண்ணில் வேலைப்
பாய்ச்சுகின்ற ரணத்தை ஏற்படுத்துகின்றது.

இதேவேளை ஜெயலலிதா ஈழத்தமிழர்களுக்கு 1000 ரூபாய் வழங்கும் நடவடிக்கையை
வரவேற்ற கருணாநிதி தான் ஈழத்தமிழர்களுக்குச் செய்த உதவிகளை மீண்டும்
ஒருமுறை வரிசைப்படுத்தி தானும் தமிழ்நாட்டில் இருப்பதை ஊடகங்களுக்கு
உறுதிப்படுத்திக் கொண்டார்.