"பெற்றோரின் கடனுக்காக மகளுக்கு கல்விக் கடனை மறுக்கக் கூடாது

சென்னை, ஜூலை 28:
பெற்றோர் செலுத்த வேண்டிய கடன் நிலுவைக்காக மகளுக்கு கல்விக் கடன் வழங்க
மறுத்த வங்கிக்கு உயர் நீதிமன்றம் கண்டனம் தெரிவித்தது. கல்விக் கடனை
உடனடியாக வழங்கவும் நீதிமன்றம் உத்தரவிட்டது.சென்னை அருகே தண்டலத்தில் இயங்கி வரும் ராஜலட்சுமி பொறியியல் கல்லூரியில் இறுதி ஆண்டு பயிலும் மாணவி ஆர். சஹானா.இவர் உயர் நீதிமன்றத்தில் தாக்கல் செய்த மனு விவரம்: 2008-ம்
ஆண்டு முகப்பேரில் உள்ள ஓரியண்டல் பேங்க் ஆப் காமர்ஸ் வங்கியில் கல்விக்
கடன்பெற விண்ணப்பித்தேன். ஆண்டுக்கு ரூ.98 ஆயிரம் வீதம் நான்கு
ஆண்டுகளுக்கு நான் கல்லூரிக்கு கல்விக் கட்டணம் செலுத்த வேண்டும். எனினும்,
எனக்கு ஆண்டுக்கு ரூ.55 ஆயிரம் வீதம் 4 ஆண்டுகளுக்கு மொத்தம் ரூ.2
லட்சத்து ரூ.20 ஆயிரம் மட்டுமே கடனாக வழங்க வங்கி முன்வந்தது.2008,
2009 ஆகிய ஆண்டுகளில் தலா ரூ.55 ஆயிரம் வழங்கிய வங்கி நிர்வாகம், மூன்றாம்
கல்வியாண்டான 2010 - 2011-ம் ஆண்டுக்கான கடனை வழங்க மறுத்து விட்டது. எனது
பெற்றோர் வியாபாரத்துக்காக ஏற்கெனவே வங்கியில் வாங்கிய கடன் நிலுவையில்
இருப்பதால் எனக்கு கல்விக் கடன் வழங்க முடியாது என்று வங்கி நிர்வாகம் கூறி
விட்டது. எனவே, எனது பெற்றோரே சமாளித்து மூன்றாம் ஆண்டுக்கான கல்விக் கட்டணம் ரூ.98 ஆயிரத்தை ஏற்பாடு செய்து கல்லூரியில் செலுத்தினர். எனினும், படிப்பின் இறுதியாண்டான நடப்பு கல்வியாண்டுக்கான கட்டணம் ரூ.98 ஆயிரத்தை செலுத்த இயலாமல் எனது பெற்றோர் தவிக்கின்றனர். எனவே,
ஏற்கெனவே எனக்கு வழங்க ஒப்புக்கொண்ட கல்விக் கடன் தொகையை வழங்க வங்கி
நிர்வாகத்துக்கு நீதிமன்றம் உத்தரவிட வேண்டும் என்று சஹானா தனது மனுவில்
வலியுறுத்தியிருந்தார். இந்த மனு மீது நீதிபதி டி. ஹரிபரந்தாமன்
முன்னிலையில் விசாரணை நடைபெற்றது. அப்போது மாணவிக்கு வழங்க வேண்டிய கல்விக்
கடனின் மீதி தொகையை உடனடியாக வழங்குமாறு நீதிபதி உத்தரவிட்டார். எந்த உத்தரவாதமும் இல்லாமல் மாணவர்களுக்கு ரூ.4 லட்சம் வரை வங்கிகள் கல்விக் கடன் வழங்க வேண்டும். ஆனால்,
இந்த விவகாரத்தில் வெறும் ரூ.2 லட்சத்து 20 ஆயிரம் கடனுக்காக மாணவியின்
பெற்றோரும் இணை கடன்தாரராக சேர்த்துக் கொள்ளப்பட்டுள்ளார். அதன் பின்
பெற்றோரின் கடன் நிலுவைக்காக மாணவிக்கு கல்விக் கடன் மறுக்கப்பட்டுள்ளது. எந்த
நோக்கத்துக்காக கல்விக் கடன் வழங்கும் திட்டம் கொண்டு வரப்பட்டதோ, அதற்கு
முரணாக வங்கி நிர்வாகத்தின் செயல்பாடு உள்ளது. மேலும், இறுதியாண்டு
படிக்கும் மாணவிக்கு கடன் மறுத்தது சரியானது அல்ல. பெற்றோரின் கடன்
நிலுவைக்காக மகளுக்கு கல்விக் கடன் வழங்க மறுக்கக் கூடாது.எனவே,
மாணவி சஹானாவுக்கு வழங்க வேண்டிய கல்விக் கடனின் மீதித் தொகையை உடனடியாக
கல்லூரி நிர்வாகத்துக்கு வங்கி நிர்வாகம் வழங்க வேண்டும் என்று நீதிபதி
உத்தரவிட்டார்.