விவசாயிகளுக்கு கொடுப்பது உயர்ரக ஜெர்சி பசுவா, நாட்டு கலப்பின பசுவா?

சென்னை: அதிகளவு பால் கொடுக்கும் ஜெர்சி வகை பசுக்களுக்கு நோய் எதிர்ப்பு
சக்தி குறைவுடன், பராமரிப்பு மற்றும் தீவன செலவு அதிகம். குறைந்தளவு பால்
கொடுக்கும் நாட்டு பசுக்களுக்கு நோய் எதிர்ப்பு சக்தி அதிகமாக
இருப்பதுடன், பராமரிப்பு மற்றும் தீவன செலவு குறைவு. இந்த வேறுபாடுகளை
ஆராய்ந்து விவசாயிகளுக்கு இலவச மாடுகள் வழங்க வேண்டுமென்ற எதிர்பார்ப்பு
விவசாயிகளிடம் எழுந்துள்ளது.
தமிழகத்தில் வறுமைக் கோட்டிற்கு கீழ் உள்ள
குடும்பங்களுக்கு இலவச ஆடுகள் மற்றும் பசுமாடு வழங்கப்படுமென, சட்டசபை
தேர்தல் அறிக்கையில் முதல்வர் ஜெயலலிதா அறிவித்தார். இத்திட்டத்தின்
நோக்கமே, தமிழகத்தில் பால் உற்பத்தியை பல மடங்கு அதிகரிப்பது தான்.
அத்துடன் விவசாயிகளின் பொருளாதாரத்தை உயர்த்தவும் திட்டமிடப்பட்டுள்ளது.
இத்திட்டத்தை நிறைவேற்றுவதற்கான தேதி மற்றும் காரணிகள் குறித்து,
சமீபத்தில் முதல்வர் விரிவான அறிவிப்பை வெளியிட்டார். அதில்,
"விவசாயிகளின் திருப்தியை உறுதி செய்யும் வகையில் கலப்பின ஜெர்சி பசுக்கள்
வழங்கப்படும். அதற்கு அரசு அதிகாரிகள் உதவியாக இருப்பார்கள்' என,
தெரிவிக்கப்பட்டிருந்தது. தற்போது தமிழகத்தில் விவசாயிகளிடம் கலப்பின
நாட்டு பசுக்கள் அதிகளவில் உள்ளன. அரசின் அறிவிப்பில், உயர்ரக ஜெர்சி இன
பசுக்கள் வழங்கப்படும் என தெரிவிக்கப்பட்டுள்ளது.

இது குறித்து
கால்நடைத்துறை அதிகாரி ஒருவர் கூறியதாவது: எந்த வகையான பசுக்களை
விவசாயிகளுக்கு வழங்க வேண்டும் என்ற ஆலோசனை நடந்து வருகிறது. தமிழகத்தில்
பசுக்கள் பற்றாக்குறை இருந்தால், அண்டை மாநிலத்தில் வாங்க
முடிவெடுக்கப்பட்டுள்ளது. அம்மாநில சீதோஷ்ண நிலையில் வளர்ந்த பசுக்கள்,
தமிழகத்தில் வறட்சியான மாவட்டங்களில் தாக்குப்பிடித்து வளருமா? அப்படியே
வளர்ந்தாலும் நல்ல முறையில் பால் கொடுக்குமா? என, பல்வேறு காரணிகள்
குறித்து ஆய்வு செய்து வருகிறோம். இவ்வாறு, அவர் கூறினார்.


வர்த்தக
லாபத்திற்கு ஜெர்சி : உயர்ரக ஜெர்சி பசுமாட்டிற்கும், தமிழகத்தில் அதிகம்
புழக்கத்தில் உள்ள கலப்பின பசுமாட்டிற்கும் உள்ள வேறுபாடுகள்
வகைப்படுத்தப்பட்டுள்ளன. இதிலுள்ள பெரும்பாலான காரணிகள் சாதகமாக
இருப்பதால் தான், கலப்பின நாட்டு பசுக்களை தமிழக விவசாயிகள் வளர்த்து
வருகின்றனர்.
அதே நேரத்தில், வர்த்தக நோக்கத்தில் பால் பண்ணை
வைத்திருக்கும் தமிழக விவசாயிகள், உயர்ரக ஜெர்சி இன பசுக்களை அதிகளவில்
வளர்த்து வருகின்றனர்.