தமிழக மக்களின் உணர்வுகளுக்கு மதிப்பளிக்கப்படும்: நிருபமா ராவ்

கொழும்பு:"இலங்கையில் தமிழ் மொழி பேசும் மக்களுக்கு
ஏற்படும் இன்னல்களை களைய தமிழக அரசு, தமிழக மக்கள் மற்றும்
அரசியல்வாதிகளின் உணர்வுகளுக்கு மதிப்பளிக்கப்படும்' என்று இந்திய
வெளியுறவுத்துறை செயலர் நிருபமா ராவ் தெரிவித்துள்ளார்.
இலங்கை மற்றும் மாலத்தீவு பத்திரிகையாளர்களுக்கு, இந்திய
வெளியுறவுத்துறை செயலர் நிருபமா ராவ் டில்லியில் சிறப்புப் பேட்டி
அளித்தார்.
அப்போது அவர் கூறியதாவது: இலங்கையில் தமிழ் மொழி
பேசுபவர்களுக்கு இழைக்கப்படும் அநீதிகள் பற்றி தமிழக அரசு, தமிழக மக்கள்
மற்றும் அரசியல்வாதிகள் கூறி வருவதை ஒதுக்கி விட முடியாது. இலங்கை
தமிழர்கள் தொடர்பான இவர்களது உணர்வுகளை மதிக்காமல், இந்திய அரசால்
உணர்ச்சியற்ற நிலையில் இருக்க முடியாது.இலங்கையில் போரால் பாதிக்கப்பட்ட
பகுதிகளில், தமிழ் மக்களை குடியமர்த்த நாங்கள் என்ன செய்து
கொண்டிருக்கிறோம் மற்றும் அந்த அரசுடன் நடத்தப்படும் பேச்சு குறித்து,
தமிழக அரசிடம் தெரிவிக்க தொடர்பு கொண்டு வருகிறோம். எந்தளவிற்கு சிறப்பான
மறுவாழ்வு அளிக்க முடியும், அவர்களது வாழ்க்கையை மறுசீரமைப்பு செய்ய
முடியும் என்பது குறித்து பேசி வருகிறோம். போரால் பாதிக்கப்பட்ட
பகுதிகளில் தமிழர்களுக்கான உள்கட்டமைப்பு பணிகள் நடந்து வருகின்றன.
அந்நாட்டில் அரசியல் ரீதியான தீர்வுகள் குறித்து இலங்கை அரசும், தமிழ்
அரசியல் கட்சிகளும் பேசி வருகின்றன. வெளிநாட்டு உறவுகளுக்கு பொறுப்பு
வகிக்கும் இந்திய அரசு, இலங்கை தமிழ் மக்கள் நலனில் அதிக அக்கறை செலுத்தி,
சிறப்பாக செயல்பட்டு வருகிறது என்ற விஷயத்தை தமிழக அரசுக்கும், தமிழக
மக்களுக்கும் தெரிவிக்க நாங்கள் கடமைப்பட்டுள்ளோம். இந்திய அரசும் இந்த
உணர்வுபூர்வமான விஷயத்தில் முடிந்த வரை, அதிக அக்கறையுடன், பொறுப்புடன்
செயல்பட்டு வருகிறது என்பதை தமிழக அரசும், தமிழக மக்களும் புரிந்து
கொண்டுள்ளனர்.இலங்கை தமிழர் தொடர்பான விஷயம் தொடர்ந்து வலியுறுத்தப்படும்.
ஜனநாயக நாட்டில் நம்மைப் போன்று தான், தமிழ் மொழி பேசும் மக்களும் தங்களது
கருத்துக்களை எடுத்துரைக்கின்றனர். இது இயற்கையானது. உங்கள் நாட்டில்
எப்படி கருத்துக்கள் சுதந்திரமாக சொல்லப்படுகிறதோ அதுபோன்றது தான். இவை
அனைத்தையும் நாம் கருத்தில் எடுத்துக் கொள்ள வேண்டும்.இவ்வாறு நிருபமா
ராவ் பேட்டியில் தெரிவித்துள்ளார்.