புதுச்சேரியில் பயங்கரம்: பார்சல் குண்டு அனுப்பி இளம் பெண் கொலை; காதல் தகராறில் தொழில் அதிபர் வெறிச்செயல்

புதுச்சேரி, ஜூன்.29-

புதுவை அரியாங்குப்பம் சோலை கவுண்டர்
வீதியை சேர்ந்தவர் பன்னீர்செல்வம். இவரது மகள் ஜோதி (வயது 24) அந்த
பகுதியில் உள்ள ஒரு மெழுகுவர்த்தி கம்பெனியில் வேலை பார்த்து வந்தார்.
இந்த நிலையில் நேற்று மதியம் ஜோதி மெழுகுவர்த்தி கம்பெனிக்கு சென்று
விட்டு வீட்டுக்கு வந்தார்.

மாலை 3.30 மணி அளவில் ஜோதியின்
செல்போனுக்கு ஒரு போன் வந்தது. போனில் பேசியவர் பன்னீர்செல்வம் பெயருக்கு
கூரியர் பார்சல் வந்துள்ளது என்று கூறினார். இதையடுத்து ஜோதி வீட்டை
விட்டு வெளியே வந்தார்.

அப்போது ஜோதியின் வீட்டருகே ஒரு ஆட்டோ
வந்து நின்றது. ஆட்டோவில் வந்த வாலிபர் உங்களது அப்பா பெயருக்கு பார்சல்
வந்துள்ளது என்று கூறி ஜோதியிடம் பார்சலை கொடுத்தார். அதனை வீட்டுக்குள்
எடுத்து சென்றார். படுக்கை அறைக்குள் பார்சலை எடுத்து சென்ற ஜோதி அதனை
பிரித்தார்.

அப்போது கூரியர் பார்சல் பயங்கர சத்தத்துடன் வெடித்து
சிதறியது. இதில் ஜோதியின் உடல் முழுவதும் பலத்த காயம் ஏற்பட்டது. முகம்,
கை, கால்கள் கருகி சிதைந்த நிலையில் உயிருக்கு போராடிக் கொண்டிருந்தார்.
வெடிகுண்டு பார்சல் வெடித்து சிதறியதில் ஜோதியின் வீட்டு கூரையும்
பெயர்ந்து விழுந்தது.

வெடிச்சத்தம் கேட்டதும் அக்கம் பக்கத்தினர்
அங்கு ஓடி வந்தனர். அங்கு காணப்பட்ட கோரக்காட்சியை கண்டு அதிர்ச்சியில்
உறைந்து போனார்கள். உயிருக்கு போராடிய ஜோதியை அந்த பகுதியை சேர்ந்தவர்கள்
புதுவை அரசு ஆஸ்பத்திரிக்¢கு கொண்டு சென்றனர். அங்கு டாக்டர்கள் தீவிர
சிகிச்சை அளித்தும் சிகிச்சை பலனின்றி பரிதாபமாக இறந்து போனார்.

இந்த
சம்பவம் பற்றிய தகவல் அறிந்ததும் சட்டம்-ஒழுங்கு சீனியர் போலீஸ்
சூப்பிரண்டு சந்திரன், போலீஸ் சூப்பிரண்டுகள் சிவதாசன், தெய்வசிகாமணி
ஆகியோர் அங்கு விரைந்து சென்றனர். ஜோதியின் வீட்டை பார்வையிட்டனர்.
வெடிகுண்டு நிபுணர்கள் பார்சல் வெடிகுண்டு குறித்து ஆய்வு மேற்கொண்டனர்.
போலீஸ் மோப்ப நாயும் வரவழைக்கப்பட்டது. ஜோதியின் தந்தை பன்னீர்செல்வம்,
தாயார் சரோஜா ஆகியோரிடம் போலீசார் தீவிர விசாரணை மேற்கொண்டனர்.

போலீஸ்
விசாரணையில் புதுவை வெங்கட்டா நகரில் உள்ள ஒரு கொரியர் நிறுவனத்தில்
அன்பு, கடலூர் என்ற பெயரில் பன்னீர்செல்வத்துக்கு பார்சல் புக்
செய்யப்பட்டதும் தெரிய வந்தது. வெடிகுண்டு பார்சலை அனுப்பிய அன்பு யார்?
அவருக்கும் ஜோதி குடும்பத்துக்கும் என்ன தொடர்பு என்பது குறித்தும்
வெடிகுண்டு பார்சல் அனுப்பியது ஏன் என்பது குறித்தும் பல்வேறு கோணங்களில்
விசாரணை நடத்தினர்.

அரியாங்குப்பம் எஸ்.டி.டி. பூத்தில் வேலை
பார்த்த ஜோதி அந்த வேலையில் இருந்து கடந்த சில மாதங்களுக்கு முன்பு நின்று
கொண்டார். இதையடுத்து அதே பகுதியில் உள்ள ஒரு மெழுகுவர்த்தி கம்பெனியில்
வேலை பார்த்து வந்தார். ஜோதிக்கும் மெழுகுவர்த்தி கம்பெனியின் உரிமையாளர்
மனைவிக்கும் இடையே ஆழமான நட்பு ஏற்பட்டது. இருவரும் நெருங்கிய
தோழிகளாயினர்.

இதனை தொடர்ந்து கம்பெனி உரிமையாளர் வீட்டுக்கு ஜோதி
அடிக்கடி சென்று வந்துள்ளார். அப்போது ஜோதியின் அழகில் மெழுகுவர்த்தி
கம்பெனி உரிமையாளர் மயங்கியதாக தெரிகிறது.

இதையடுத்து தனது
ஆசைக்கு இணங்குமாறு ஜோதியை கட்டாயப்படுத்தியதாக கூறப்படுகிறது. ஆனால் ஜோதி
இதற்கு சம்மதிக்கவில்லை. மேலும் இனிமேல் தொந்தரவு செய்தால் தோழியிடம் கூறி
விடுவதாகவும் அவர் மிரட்டி உள்ளார். தனது மனைவிக்கு இந்த சம்பவம்
தெரிந்தால் அவமானமாகி விடும் என்று கருதிய கம்பெனி உரிமையாளர் கூரியர்
பார்சல் மூலம் வெடிகுண்டு அனுப்பி இருக்கலாம் என்று போலீசார்
கருதகின்றனர். இதையடுத்து போலீசார் மெழுகுவர்த்தி கம்பெனி உரிமையாளரை
பிடித்து விசாரணை நடத்தி வருகின்றனர்.

இதற்கிடையே ஜோதியின்
தந்தை பன்னீர்செல்வத்துக்கும் அதே பகுதியை சேர்ந்த ஒரு அரசியல்கட்சி
பிரமுகருக்கும் இடையே நில தகராறு இருந்து வந்ததும் போலீஸ் விசாரணையில்
தெரிய வந்துள்ளது. பன்னீர்செல்வத்துக்கு சொந்தமான நிலத்தை அந்த அரசியல்
பிரமுகர் அபகரித்து வீடு கட்டி இருப்பதால் இரு தரப்புக்கும் நீண்டகாலமாக
பகை இருந்து வருகிறது.

நிலத்தகராறில் பன்னீர்செல்வத்திடம் விரோதம்
கொண்டுள்ள அரசியல் பிரமுகருக்கும் லெடிகுண்டு சம்பவத்துக்கும் தொடர்பு
உள்ளதா? என்பதும் குறித்தும் போலீசார் தீவிர விசாரணை நடத்தி வருகிறார்கள்.


இதுதொடர்பாக புதுவை ரூரல் போலீஸ் சூப்பிரண்டு தெய்வசிகாமணியிடம்
கேட்ட போது இந்த சம்பவத்தில் தொடர்புடைய குற்றவாளிகள் குறித்து தீவிர
விசாரணை மேற்கொண்டு வருகிறோம். காதல் பிரச்சினையில் வெடிகுண்டு பார்சல்
அனுப்பப்பட்டதா? அல்லது நில தகராறு காரணமா? என்பது குறித்து விசாரணை
நடத்தி வருகிறோம் என்று கூறினார்.