மாஜி அமைச்சர் ராஜா மீது மீண்டும் நடவடிக்கை பாயுமா?

ஈரோடு: நிலத்தை அபகரிக்க, குடும்பத்தை கடத்தியது, எம்.எல்.ஏ., வுக்கு
கொலை மிரட்டல் விடுத்தது, சொத்துக் குவிப்பு என, பல்வேறு புகார்களுக்கு
உள்ளான, ஈரோடு மாவட்ட, தி.மு.க., செயலர், ராஜா மீது மீண்டும் நடவடிக்கை
பாயுமா என்ற கேள்வி எழுந்துள்ளது.
தி.மு.க., முன்னாள் அமைச்சர் பெரியசாமியின் இளைய மகன் ராஜா; இவர்,
2005ல், தி.மு.க., ஈரோடு மாவட்ட செயலரானார். வடக்கு, தெற்கு என, இரு
மாவட்டங்களாக பிரிந்து கிடந்த ஈரோட்டை, ஒருங்கிணைந்த தி.மு.க.,
மாவட்டமாக்கினார். கட்சியில் இருந்த கோஷ்டி பூசல்களைத் தாண்டி வளர்ந்தார்.
கடந்த, 2006 தேர்தலில், ஈரோட்டில் இருந்த, 11 தொகுதிகளில், 9 தொகுதிகளில்,
தி.மு.க., அணி வெற்றி பெற்றது; ராஜாவும், ஈரோடு தொகுதியில் வெற்றி
பெற்றார். அவருக்கு கைத்தறித் துறை அமைச்சர் பதவி கிடைத்தது. கட்சி
நடத்திய மாநாடுகள் பலவற்றுக்கும், ஈரோட்டில் இருந்து பெருந்தொகை
நன்கொடையாக வழங்கப்பட்டது. பல லட்சம் ரூபாய் செலவில் கட்சிக்கு அலுவலகம்
கட்டினார். கட்சித் தலைமையிடம் ராஜாவுக்கு செல்வாக்கு வளர்ந்தது. அவரது
அதிரடி அரசியலால், மூத்த நிர்வாகிகள் பலரும் பாதிக்கப்பட்டனர்; ஆனால்,
கட்சியின் வளர்ச்சியைக் கருத்தில் கொண்டு அமைதி காத்தனர். பஸ்
டிரான்ஸ்போர்ட், சுத்திகரிக்கப்பட்ட தண்ணீர், கல்லூரி, "டிவி' என, பல
துறைகளிலும் ராஜா கால் பதித்தார். தாளவாடி மலையில் இருந்து தாராபுரம் வரை
சொத்துக்கள் வாங்கி குவித்துள்ளார் என, அவரது கட்சியினரே கூறி வந்தனர்.
இவை எல்லாவற்றுக்கும், "செக்' வைத்தது போல அமைந்தது, 2008ல் நடந்த
பெருந்துறை ஆள்கடத்தல் சம்பவம். பெருந்துறை, கல்லாங்குத்து தோட்டத்தைச்
சேர்ந்தவர் பழனிச்சாமி ,62; இவரது தம்பி குகமணி ,62; இவர்களுக்கு
சொந்தமான, 6.25 ஏக்கர் நிலத்தில், 250 தென்னை மரங்கள் வைத்து விவசாயம்
செய்து வந்தனர். சொத்தை அபகரிக்கும் நோக்கில் பழனிசாமி, அவரது மனைவி
மலர்விழி, மகன் சிவபாலன், தம்பி குகமணி ஆகியோர் கடத்தப்பட்டனர். அவர்களது
வீடு, தென்னந்தோப்பு ஆகியவை ஒரே நாள் இரவில் தரைமட்டமாக்கப்பட்டன.
ஐகோர்ட்டில் பழனிசாமியின் மைத்துனர் சுப்பிரமணி, ஆள் கொணர்வு மனு தாக்கல்
செய்தார். அதன் பிறகே, இவர்கள் விடுவிக்கப்பட்டனர். "இந்த வழக்கில் ராஜா
மீதான புகாருக்கு முகாந்திரம் இருக்கிறது' என, அப்போதைய முதல்வர்
கருணாநிதி கூறினார். அமைச்சர் பதவியிலிருந்து ராஜா நீக்கப்பட்டார்.
இவ்வழக்கில் எவ்வித நடவடிக்கையும் எடுக்காத பெருந்துறை போலீசாருக்கு,
ஐகோர்ட் கடும் கண்டனம் தெரிவித்தது. இந்த வழக்கை, சி.பி.சி.ஐ.டி., போலீஸ்
விசாரணைக்கு மாற்றி உத்தரவிட்டது. சி.பி.சி.ஐ.டி., தாக்கல் செய்த
குற்றப்பத்திரிகையில், ஆள் கடத்தல் வழக்கில், 14வது குற்றவாளியாக ராஜா
சேர்க்கப்பட்டார்; அவரே, சொத்தை சேதப்படுத்திய வழக்கில், 11வது
குற்றவாளியாக சேர்க்கப்பட்டார். அவருக்கு நீதிமன்றம், "பிடிவாரன்ட்'
பிறப்பித்தது. ராஜா முன்ஜாமின் பெற்றார்.
வழக்கை வாபஸ் பெற, காஞ்சி கோவிலில் உள்ள ராஜாவின் பண்ணை வீட்டில்,
சிவபாலனுடன் பேரம் பேசப்பட்டது. இருவருக்கும் இடையே ஏற்பட்ட வாய்த்தகராறு
முற்றி, சிவபாலன் கடுமையாக தாக்கப்பட்டார். இரு தரப்பும் பரஸ்பரம் புகார்
கூறியது. இப்பிரச்னையை தொடர்ந்து ராஜாவின் மாவட்ட செயலர் பதவி
பறிக்கப்பட்டு, கட்சியின் அடிப்படை உறுப்பினர் பதவியில் இருந்தும்
நீக்கப்பட்டார். தி.மு.க., மாவட்ட பொறுப்பாளராக, ராஜாவின் தந்தை, முன்னாள்
அமைச்சர் பெரியசாமி நியமிக்கப்பட்டார்; தி.மு.க., இரண்டாக உடைந்தது.
பெரியசாமி தரப்பில் ஒரு கோஷ்டியும், துணை பொறுப்பாளர் சச்சிதானந்தம்,
ஈரோடு மாநகராட்சி மேயர் குமார் முருகேஷ் ஆகியோர் மற்றொரு கோஷ்டியாகவும்
அணி சேர்ந்தனர். நம்பியூர் அருகே கட்டப்பட்ட சமத்துவபுரம் திறப்பு
விழாவுக்கு, அப்போதைய துணை முதல்வர் வருவதாக இருந்தது. விழா ஏற்பாடுகளை
கவனிக்கச் சென்ற, அப்போதைய பவானிசாகர் எம்.எல்.ஏ., ஜீவா
சுப்பிரமணியத்துக்கு, கொலை மிரட்டல் விடுத்ததாக ராஜா மீது புகார்
பதிவானது. தங்கள் வீடுகளுக்கு வந்த ராஜா, தங்களை மிரட்டியதாக, அப்போதைய
முதல்வர் மற்றும் துணை முதல்வரிடம், மேயர் குமார் முருகேஷ், சச்சிதானந்தம்
ஆகியோர் புகார் கூறினர். தொடர் புகார்களால் கட்சித் தலைமை கோபமடைந்தது.
எம்.எல்.ஏ., ஜீவா சுப்பிரமணியம் அளித்த புகாரை அடுத்து, ராஜா கைது
செய்யப்பட்டு, கோவை சிறையில் அடைக்கப்பட்டார். மூன்று நாட்களுக்கு பின்
அவருக்கு ஜாமின் வழங்கப்பட்டது.
தொடர்ந்து, 2010ல் கருணாநிதியின் பிறந்த நாளன்று, ராஜாவுக்கு மாவட்ட
செயலர் பதவி வழங்கப்பட்டது. சிவபாலனை தாக்கிய வழக்கில் ராஜாவை விடுவித்து,
ஈரோடு நீதிமன்றம் தீர்ப்பளித்துள்ளது. சிவபாலன் தரப்பினர் ஐகோர்ட்டில்
மேல் முறையீடு செய்துள்ளனர்.
சிவபாலனின் தாய் மலர்விழி கூறியதாவது: கடந்த, 2008 ஜூலை 22ம் தேதி,
அதிகாலை, 3 மணியளவில் நானும், என் கணவர் பழனிசாமி, சிவபாலன் ஆகியோர்
வீட்டில் தூங்கிக் கொண்டிருந்தோம். அப்போது, தி.மு.க., மாவட்ட துணைச்
செயலர் ஓ.சி.விஸ்வநாதன், நகரச் செயலர் கோபிநாத், ஒன்றிய செயலர் சாமி,
மாணவரணி மாவட்ட செயலர் ரங்கசாமி, பெருந்துறை இளைஞர் அணி நகர செயலர் பாலாஜி
ஆகியோர் தலைமையில் ஒரு கும்பல், கதவை உடைத்து வீட்டுக்குள் நுழைந்தது.
எங்களை அந்த கும்பல் இழுத்துச் சென்றது; எங்கள் வீட்டை இடித்தனர்.
நிலத்தில் இருந்த தென்னை மரங்களை வேருடன் பிடுங்கினர். காரில் கடத்திச்
சென்று, பத்திரத்தில் கையெழுத்து போடும்படி மூன்று பேரையும் மிரட்டினர்.
நத்தக்காடையூர் அருகே வெங்கரையாம்பாளையத்தில் உள்ள ஒரு வீட்டில் அடைத்து
வைத்தனர். பெருந்துறை பத்திர எழுத்தாளர் கருணாகரன், சார் பதிவாளர்
அன்பழகன் ஆகியோர் அங்கிருந்தனர். பத்திரத்திலும், வெற்று காகிதத்திலும்
கையெழுத்து மற்றும் விரல் ரேகை பதிவு செய்தனர். விரல் ரேகையில் இருந்த
மையை அங்குள்ள சுவரில் தேய்த்தேன். அதை, சி.பி.சி.ஐ.டி., போலீசார் ஆதாரமாக
பதிவு செய்துள்ளனர். அதன்பின், மூன்று நாள் எங்களை அங்கேயே அடைத்து
வைத்திருந்தனர். என் மாமனார், மாமியாரிடமும் மிரட்டி, அடித்து, கையெழுத்தி
வாங்கி விட்டனர். இந்த அதிர்ச்சியால், என் மாமனார், 2008 செப்., 13ல்
இறந்துவிட்டார். இவ்வாறு மலர்விழி கூறினார்.
சிவபாலனின் தாய்மாமன் சுப்பிரமணியன் கூறியதாவது: ராஜா தரப்பினரால்
கடத்தப்பட்டவர்களை மீட்கக்கோரி, 2008 ஜூலை 25ல் சென்னை ஐகோர்ட்டில்
ஆள்கொணர்வு மனு தாக்கல் செய்தேன். "தான் கடத்தப்படவில்லை' என,
பத்திரிகையாளர்களுக்கு சிவபாலனை பேட்டி கொடுக்க வைத்தனர். அதன்பின், 2008
ஆக., 7ல், ராஜாவை அமைச்சர் பதவியில் இருந்து கருணாநிதி நீக்கினார். 2008
செப்., 12ம் தேதி பெருந்துறை போலீசாருக்கு, சென்னை ஐகோர்ட் கடும் கண்டனம்
தெரிவித்தது. "உண்மை நிலவரத்தை விசாரித்து நீதிமன்றத்துக்கு ஏன்
தெரிவிக்கவில்லை?' என, பெருந்துறை போலீசாரிடம், நீதிமன்றம் கேள்வி
எழுப்பியது. "போலீஸ் மீது எங்களுக்கு நம்பிக்கை இல்லை' என, நீதிமன்றத்தில்
நாங்கள் தெரிவித்ததால், அதே தேதியில் இந்த வழக்கை, நீதிமன்றம்,
சி.பி.சி.ஐ.டி.,க்கு மாற்றி உத்தரவிட்டது. 20ம் தேதி இந்த வழக்கு
சி.பி.சி.ஐ.டி., கைக்கு மாறியது. சி.பி.சி.ஐ.டி., எஸ்.பி., அருண்,
டி.எஸ்.பி., சாம்பசிவம் இந்த வழக்கை துரிதமாக விசாரித்தனர். இவ்வழக்கில்
ராஜாவின் ஜாமின் மனுவை ரத்து செய்து, அவரை சிறையில் அடைத்து, அதன் பின்
வழக்கு விசாரணை செய்யுமாறு, 2009 நவ., 17ல் சுப்ரீம் கோர்ட்டில்
கேட்டுள்ளோம். "தமிழகத்தில், நீதி கிடைக்கும் என்ற நம்பிக்கை எங்களுக்கு
இல்லை; வழக்கை வேறு மாநிலத்துக்கு மாற்றுங்கள்' என, 2010 ஜூலை 19ல்
சுப்ரீம் கோர்ட்டில் முறையிட்டோம். அதற்கான தீர்ப்பு இன்னும்
வெளியாகவில்லை. இவ்வாறு சுப்பிரமணியன் கூறினார்.
சிவபாலன் கூறுகையில், "முதல்வர் ஜெயலலிதாவை பார்க்க அனுமதி
கேட்டுள்ளோம். ஜெ., ஆட்சியில் நீதி கிடைக்கும் என நம்பிக்கையாக உள்ளோம்'
என்றார். ஏற்கனவே, 2001 அ.தி.மு.க., ஆட்சியின் போது, பெரியசாமி, ராஜா,
ராஜாவின் மனைவி பரிமளம் ஆகியோர் மீது சொத்துக்குவிப்பு வழக்கு பதிவு
செய்யப்பட்டது. இந்த வழக்கில் இருந்து, 2006ல், தி.மு.க., ஆட்சியின் போது
இவர்கள் விடுவிக்கப்பட்டனர் என்பது குறிப்பிடத்தக்கது.