யோகா குரு ராம்தேவ்விடம் மத்திய அமைச்சர்கள் கெஞ்சல்: ஊழல் எதிர்ப்பு போரை கைவிட வலியுறுத்தல்

by **மாலதி** Fri Jun 03, 2011 7:38 am

புதுடில்லி: ஊழலுக்கு எதிராக யோகா குரு பாபா ராம்தேவ் நாளை துவக்க
உள்ள, சாகும் வரை உண்ணாவிரதப் போராட்டத்திற்கு, சமூக சேவகர் அன்னா
ஹசாரேயும் ஆதரவு தெரிவித்துள்ளார். உண்ணாவிரதப் போராட்டத்தில் வரும் 5ம்
தேதி பங்கேற்பதா கவும் உறுதி அளித்துள் ளார். அதே நேரத்தில்,
உண்ணாவிரதத்தை கைவிட வலியுறுத்தி, ராம்தேவிடம் மத்திய அமைச்சர்கள்
கெஞ்சுவது இன்றும் தொடரும் என, எதிர்பார்க்கப்படுகிறது.
ஊழலுக்கு எதிராக அன்னா ஹசாரே உண்ணாவிரதம் இருந்த போது, அவரை நேரில்
சந்தித்து ஆதரவு தெரிவித்தவர், பிரபல யோகா குரு பாபா ராம்தேவ். ஊழலுக்கு
எதிரான விழிப்புணர்வு பிரசாரத்தை, முழுவீச்சில் மேற்கொண்டு வருகிறார்.
ஊழலை ஒழிக்கவும், வெளிநாடுகளில் டிபாசிட் செய்யப்பட்டுள்ள கறுப்புப்
பணத்தை மீட்கவும், மத்திய அரசு தீவிர நடவடிக்கை எடுக்க வலியுறுத்தி, நாளை,
டில்லியில் சாகும் வரை உண்ணாவிரதப் போராட்டத்தை துவக்க உள்ளார். இதற்காக
நேற்று முன்தினம் அவர், உஜ்ஜயினியிலிருந்து தனி விமானத்தில் டில்லி
வந்தார். அப்போது, மத்திய அரசு சார்பில், டில்லி விமான நிலையத்தில் அவரை
சந்தித்துப் பேசிய மத்திய அமைச்சர்கள் பிரணாப் முகர்ஜி, கபில் சிபல்,
பவன்குமார் பன்சால், சுபோத்காந்த் சகாய் ஆகியோர் உண்ணாவிரதப் போராட்டத்தை
கைவிட வேண்டும் என, வலியுறுத்தினர். விமான நிலைய விருந்தினர் அறையில்
இரண்டரை மணி நேரத்திற்கும் மேலாக நடந்த பேச்சுவார்த்தையில், எந்த விதமான
சுமுக உடன்பாடும் எட்டப்படவில்லை. அறிவித்தபடி உண்ணாவிரதம் தொடரும் என,
பாபா ராம்தேவ் அறிவித்தார். ராம்லீலா மைதானத்தில் உண்ணாவிரதம் நடக்கும்
என்றும் அறிவிக்கப்பட்டது. அதே நேரத்தில், பாபா ராம்தேவை அரசு தரப்பில்
அமைச்சர்கள் சிலர் இன்று மீண்டும் சந்தித்துப் பேசுவர். "உண்ணாவிரதம்
வேண்டாம்' என, அவரிடம் கெஞ்சி கேட்டுக் கொள்வர் என, தெரிகிறது.
இந்நிலையில், உண்ணாவிரதப் போராட்டம் தொடர்பான செயல் திட்டத்தை இறுதி
செய்யவும், உண்ணாவிரதத்தை கைவிட வேண்டுமென, வலியுறுத்தும் அரசு
தரப்பினருடன் என்ன பேச வேண்டும் என்பதை முடிவு செய்யவும், தனது நெருங்கிய
ஆதரவாளர்களுடன் பாபா ராம்தேவ் நேற்று ஆலோசனை நடத்தினார். இதற்காக, நேற்று
மாலை நடத்தவிருந்த பத்திரிகையாளர் சந்திப்பையும் ரத்து செய்தார். முழு
ஆதரவு: இதற்கிடையில், லோக்பால் மசோதாவை உடனே நிறைவேற்ற வேண்டும் என
வலியுறுத்தி ஏற்கனவே உண்ணாவிரதப் போராட்டம் நடத்திய பிரபல சமூக சேவகர்
அன்னா ஹசாரேயும், யோகா குரு பாபா ராம்தேவின் உண்ணாவிரதப் போராட்டத்திற்கு
ஆதரவு தெரிவித்துள்ளார்.
இது தொடர்பாக அவர் கூறியுள்ளதாவது: பாபா ராம்தேவுக்கும்,
எங்களுக்கும் இடையே எந்த விதமான கருத்து வேறுபாடும் இல்லை. ஊழலுக்கு
எதிரான அவரின் சாகும் வரை உண்ணாவிரதப் போராட்டத்திற்கு, நாங்கள் ஆதரவு
தெரிவிக்கிறோம். ராம்தேவின் உண்ணாவிரதப் போராட்டத்தில் வரும் 5ம் தேதி
நானும் பங்கேற்பேன்; சில மணி நேரங்கள் அங்கிருப்பேன். முதலில் கோரிக்கைகளை
ஏற்றுக்கொள்வதாக மத்திய அரசு தெரிவிக்கும்; பின்னர் அதிலிருந்து
பின்வாங்கி விடும். அரசின் சமாதான பேச்சுவார்த்தைகளை ராம்தேவ் நம்பி
விடக்கூடாது. வாய் மொழியாக மத்திய அரசு அளிக்கும் உறுதி மொழிகளில்,
ஊழலுக்கு எதிராக போராட்டம் நடத்துவோர் திருப்தி அடையக்கூடாது. பாபா
ராம்தேவை நேற்று முன்தினம் பல மத்திய அமைச்சர்கள் சந்தித்துப்
பேசியுள்ளனர்; உண்ணாவிரதத்தை கைவிடும்படி கேட்டுக் கொண்டுள்ளனர். அப்படி
பல அமைச்சர்கள் சென்றிருக்க வேண்டிய அவசியம் இல்லை. ஒன்று அல்லது இரண்டு
அமைச்சர்கள் போயிருந்தாலே போதுமானது. பல அமைச்சர் சென்றாலே, அது மோசடி
செய்ய முற்படும் வேலையாகும். ஒப்பந்தங்கள் போடுவது, உறுதி மொழிகள்
அளிப்பது எல்லாமே காலம் கடத்தும் வேலை. காலம் கடந்து விட் டாலே, அரசு என்ன
நினைக்கிறதோ, அதைத்தான் செய்யும்.
நான் உண்ணாவிரதம் இருந்தபோது, எங்களின் கோரிக்கைகளை எல்லாம் ஏற்றுக்
கொள்வதாக மத்திய அரசு அறிவித்தது. அரசை காப்பாற்ற இப்படி செய்தது. தற்போது
அதிலிருந்து பின்வாங்கி விட்டது. லோக்பால் மசோதா வரம்பிற்குள் பிரதமரை
கொண்டு வர மத்திய அரசு சம்மதம் தெரிவித்தால், அரசின் கவுரவம் அதிகரிக்குமே
அன்றி குறையாது. லோக்பால் விசாரணை வரம்பிற்குள் பிரதமர் வர வேண்டும்
என்பதே எங்களின் விருப்பம். அப்போது தான் தெளிவான நிர்வாகத்தை தர
முடியும். ஊழலை முற்றிலும் ஒழிக்க அரசு விரும்பினால், அரசில் முக்கிய
பொறுப்பில் உள்ளவர்கள் எல்லாம், தங்களின் பொறுப்பை ஏற்றுக்கொள்ள வேண்டும்.
இவ்வாறு அன்னா ஹசாரே கூறினார். அதே நேரத்தில், உண்ணாவிரதப் போராட்டத்தை
கைவிட வேண்டும் என்ற அரசின் வேண்டுகோளை, பாபா ராம்தேவ் நிராகரித்து
விட்டதால், அவரின் உண்ணாவிரதத்தால் எழும் சூழ்நிலைகளை சமாளிப்பது குறித்து
விவாதிப்பதற்காக, காங்கிரஸ் உயர்மட்டக் குழு கூட்டம் நேற்று மாலை நடந்தது.
பிரதமர் மன்மோகன் சிங் வீட்டில் நடந்த இந்தக் கூட்டத்தில், காங்கிரஸ்
தலைவர் சோனியா மற்றும் மத்திய அமைச்சர்கள் பலர் பங்கேற்றனர்.