விடுதலைப் புலிகளின் காணொலி: கனடாவை விட்டு வெளியேற சன்சீ கப்பல் பயணிக்கு உத்தரவு

கனடாவின்
குடிவரவாளர் மற்றும் அகதிகளுக்கான சபையானது சண் சீ [MV Sun Sea] கப்பலில்
வந்த இன்னுமொரு ஈழத்தமிழ் குடிவரவாளரையும் நாட்டை விட்டு அனுப்பும்படி
உத்தரவு பிறப்பித்துள்ளது.

ஏனெனில், பயங்காரவாத அமைப்பென
பட்டியலிடப்பட்ட விடுதலைப்புலிகளால் பரப்புரைக்கென எடுக்கப்பட்ட
காணொலியில் [Tamil Tiger propaganda video] இந்த பயணியும்
பங்கேற்றிருப்பதை குடிவரவாளர் மற்றும் அகதிகளுக்கான சபை இனங்கண்டதனால்
அவரது அகதிநிலைக் கோரிக்கையை நிராகரித்துள்ளது.

சன்சீ கப்பலானது
கடந்த ஓகஸ்டில் ஐநூறுக்கும் மேற்பட்ட ஈழத்தமிழ் குடிவரவாளரை ஏற்றிக்கொண்டு
கனடாவின் மேற்குக் கரையை அடைந்ததிலிருந்து இன்றுவரை, அதில் பயணித்த நான்கு
பேர் குடிவரவு அதிகாரிகளால் புலி உறுப்பினர்கள் என சந்தேகிக்கப்பட்டு
அவர்களது கோரிக்கைகள் நிராகரிக்கப்பட்டுள்ளன.

ஆனால், தற்போது
காணொலியில் அடையாளம் காணப்பட்டவர், தடைசெய்யப்பட்ட விடுதலைப் புலிகள்
அமைப்பின் முறைசார் உறுப்பினர் இல்லை என்றும், இவர் நேரடியாக இந்த
அமைப்பின் ஆயுதப் போராட்டத்தில் பங்களிக்கவில்லை என்றும் குடிவரவு
திணைக்களத்தின் நீதிபதி Geoff Rempel எழுத்து மூலமாக
உறுதிப்படுத்தியுள்ளார்.

இந்தக் காணொலியானது நேரடியான போர்க்
காட்சிகளை உள்ளடக்காதபோதும், சிறிலங்காப் படைகள் மீது தாக்குதல்
நடாத்தப்படுவது, விடுதலைப் புலிகளின் பயிற்சியிலும் சண்டையிலும் ஈடுபடுவது
போன்ற போலியான காட்சி அமைப்புகள் கொண்ட திரைப்பட பாணி தயாரிப்பாகும்
என்றும் அதில் இவரும் பங்கேற்றுள்ளார் என்றும் நீதிபதி
குறிப்பிட்டுள்ளார்.

அதேவேளையில் அகதிநிலை கோரிக்கையாளருக்காக
வாதாடிய சட்டவாளர், இந்தக் காணொலியானது உண்மையானது அல்ல என்றும் இது வேறு
தேவைகளுக்காகவும் (பொழுதுபோக்கு) எடுத்திருக்கலாம் என்றும் சுட்டிக்காட்டி
தனது வாதத்தை முன்வைத்தார்.

இதனை மறுத்துரைத்த நீதியாளர் Rempel,
"இது புலிகளின் நலனை நோக்காக் கொண்டு எடுக்கப்பட்ட ஒரு திரைப்படம் என்பதை
நிரூபிப்பததற்கான சாட்சியங்கள் என்னிடம் இல்லை. அதேவேளையில், John Wayne,
Tom Cruise போன்ற நடிகர்கள் நடித்த அமெரிக்க கொலிவூட் திரைப்படங்கள்
போன்ற ஒரு திரைப்படமாகவும் நான் இதனைப் பார்க்கவில்லை.

அதேவேளையில்,
கனடாவின் பொது மக்களின் பாதுகாப்பு விவகாரங்களுக்கான அமைச்சர்
குறிப்பட்டது போன்று இது புலிகளின் யுத்த இலக்கை வெற்றியடையச் செய்வதற்காக
தயாரிக்கப்பட்ட ஒரு பரப்புரை நோக்கான திரைப்படம் என்பதை நான் ஏற்றுக்
கொள்கிறேன்" எனவும் தெரிவித்தார்.

விடுதலைப் புலிகள் தமக்கான
சுதந்திரத்தைப் பெற்றுக் கொள்வதற்காக, சிறிலங்கா இராணுவப் படையுடன் நீண்ட
காலமாக யுத்தத்தில் ஈடுபட்டிருந்தனர். இந்த உள்நாட்டுப் போரானது 2009ல்
புலிகளை தோற்கடித்ததன் மூலம் நிறைவுக்கு வந்தது.

சண்சீ கப்பலில்
பயணித்த இந்நபர், விடுதலைப் புலிகளின் யுத்த முயற்சிகளுக்கு மேலும்
வலுச்சேர்க்கும் வகையில் கராத்தே [karate] என்னும் தற்காப்பு கலையின்
பயிற்சியாளரில் ஒருவராக செயற்பட்டுள்ளார் என Rempel முடிவெடுத்துள்ளார்.

"விடுதலைப்
புலிகளின் கட்டுப்பாட்டின் கீழ் சாதாரண பொதுமக்களுக்கும் விடுதலைப்
புலிகளுக்கும் இடையில் ஏற்படும் தவிர்க்க முடியாத உறவுக்கப்பால், சன்சீ
கப்பலில் பயணித்து வந்த இந்த நபருக்கும் புலிகளுக்கும் இடையில்
உயர்ந்தளவிலான தொடர்பு நிலவியுள்ளது" என Rempel மேலும்தெரிவித்துள்ளார்.

தற்போது
தடுப்புக் காவலில் வைக்கப்பட்டிருக்காத இந்நபரிடம் அவரது கோரிக்கைகள்
நிராகரிக்கப்பட்டு திருப்பி அனுப்பப்படவுள்ள செய்தியை திங்களன்று
அறிவித்தபோது, அவர் அது தொடர்பாக எந்தவொரு உணர்வையும் வெளிக்காட்டவில்லை.

இவ்வாறு
திருப்பி அனுப்பப்பட முடிவு செய்யப்படும் யாராக இருந்தாலும் அவர்கள்
மத்திய நீதிமன்றம் உள்ளடங்கலாக எந்தவொரு நீதிமன்றிலும் மனுத்தாக்கல் செய்ய
முடியும் என அகதிகள் குடிவரவு சபை பேச்சாளர் Melissa Anderson
தெரிவித்துள்ளார்.

சன்சீ கப்பலில் கனடாவிற்குள் குடிவந்த இந்நபர்
பற்றிய மேலதிக தகவல்களை அறிய ஊடகங்களிற்கு அனுமதி வழங்கப்படவில்லை.
இக்கப்பலில் பயணித்த 15 பேர் இன்னமும் தடுப்புக்காவலில்
வைக்கப்பட்டுள்ளனர்.

செய்தி வழிமூலம்: Ottawa Citizen