தமிழக காங்., புதிய தலைவர் தேர்வில் தாமதம்: கோஷ்டி தலைவர்களால் ஏற்பட்ட தோல்வி கண்டு எரிச்சல்

புதுடில்லி:தலைவர் பதவியிலிருந்து தங்கபாலு ராஜினாமா செய்துவிட்ட
பிறகும், இன்னும் புதிய தலைவர் யார் என்பதில் மர்மம் நீடிப்பதால், தமிழக
காங்கிரஸ் குழப்பத்தில் உள்ளது. மிக முக்கிய தலைவர்களாக அறியப்படுபவர்கள்
தங்களது ஆதரவாளர்களுக்காக அடித்து பிடித்து தொகுதிகளை வாங்கியும் கூட,
பல்லாயிரக்கணக்கான ஓட்டுகள் வித்தியாசத்தில், அந்த தொகுதிகளில், காங்கிரஸ்
வேட்பாளர்கள் அடைந்த படுதோல்வியை மேலிடம் கவனத்தில் எடுத்துள்ளது. இதனால்,
கோஷ்டி தலைவர்களது ஆதரவாளர்களை நியமிக்கும் முடிவை கைவிடும் யோசனையில்
உள்ளது.
தமிழக சட்டசபை தேர்தலில், காங்கிரஸ் கட்சி சார்பில் போட்டியிட்ட, 63
வேட்பாளர்களில், வெறும் ஐந்து பேர் மட்டுமே வெற்றி பெற்று
எம்.எல்.ஏ.,க்களாகி உள்ளனர். இந்த படுதோல்வியை அடுத்து தமிழக காங்கிரஸ்
தலைவர் பொறுப்பில் இருந்த தங்கபாலு தனது பதவியை ராஜினாமா செய்வதாக
அறிவித்தார்.தமிழக காங்கிரசுக்கு, தங்கபாலுவுக்கு அடுத்து தலைவர் பதவியை
ஏற்கப்போகும் நபர் யார் என்பதில், காங்கிரஸ் மேலிடம் சஸ்பென்ஸ்
வைத்துள்ளது. இதனால், தமிழகத்தின் முக்கிய கோஷ்டி தலைவர்களும் டில்லியில்
முகாம் அடித்த வண்ணமும், ஒரு சிலர் வந்து போய் கொண்டிருப்பதை கடந்த சில
நாட்களாக காண முடிகிறது.
தமிழக சட்டசபை தேர்தலில், தி.மு.க.,வுடன் கூட்டணி என முடிவானவுடன்,
அந்த கட்சியுடன் பேச்சுவார்த்தை நடத்தி தொகுதிகளை பெறுவதற்கு ஐந்து பேர்
கொண்ட குழு அமைக்கப்பட்டது. தமிழக காங்கிரசில் செல்வாக்கு இருப்பதாக
கூறப்படும் முக்கிய தலைவர்கள் அனைவரும் இடம் பெற்றிருந்தனர். இப்படி
செல்வாக்கு மிகுந்த தலைவர்களை கொண்ட குழுவுக்கு காங்கிரஸ் மேலிடம் முழு
அதிகாரத்தையும் அளித்திருந்தது. தமிழக தேர்தல் விஷயத்தில் இந்த குழு
பார்த்து என்ன முடிவுகள் எடுத்தாலும், அதை ஏற்பதாகவும்
தெரிவிக்கப்பட்டிருந்தது. இதனால், தொகுதிகள் எண்ணிக்கை மற்றும்
தொகுதிகளின் பெயர்கள் உட்பட அனைத்தையும் இறுதி செய்யவும் அதிகாரம்
அளிக்கப்பட்டிருந்தது. தலைவர்களும் தங்களது ஆதரவாளர்களுக்காக தொகுதிகளை
குறிவைத்து பிடிப்பதிலும் மிகுந்த ஆர்வம் காட்டினர். தொகுதிகள் கிடைத்த
பிறகும், தனது ஆதரவாளரை தவிர வேறு யாருக்கும் தொகுதி கிடைத்து விடக்கூடாது
என்றும் கடைசி வரை போராடி பெற்றனர். ஆனால், தேர்தல் முடிவுகள் வெளியான
பிறகு அந்த முடிவுகள் பெரும் அதிர்ச்சியை அளித்தன.
ஒரு மோசமான, கேவலமான தோல்வியை தமிழக காங்கிரஸ் சந்தித்ததை, மேலிடம்
முக்கிய கவனத்தில் எடுத்துள்ளது. வெற்றி பெற்ற ஐந்து பேரில், கேரளாவை
சேர்ந்த காங்கிரஸ் தலைவரான சென்னிதாலா தயவில் பிரின்சும், மணிசங்கர்
தயவில் விஜயதாரணியும், தங்கபாலு தயவில் கோபிநாத்தும், வாசன் தயவில்
ரங்கராஜனும் சீட் பெற்று வெற்றி பெற்றவர்கள். ஜெயபால் என்பவரும் வாசனின்
ஆதரவில் வந்ததாக கூறப்படுகிறது. ஆனால், தேர்தலில் 20க்கும் மேற்பட்ட
தொகுதிகள் வாசன் அணிக்கும், 10க்கும் மேற்பட்ட தொகுதிகள்
சிதம்பரத்துக்கும் ஒதுக்கப்பட்டும், முடிவில் இதுதானா ரிசல்ட் என்ற கேள்வி
மேலிடத்தில் சற்று பலமாக எழுந்துள்ளது.
இது தவிர பார்த்து பார்த்து தேர்ந்தெடுத்ததாக கூறப்படும் ராகுலின்
ஆட்கள் அனைவருமே படுதோல்வி அடைந்துள்ளனர். இவர்கள் கடைசியில் பூஜ்யமாகி
விட்டதையும் மேலிடம் உணர்ந்துள்ளது. 7 பேர் மட்டுமே 1,300 ஓட்டுகளில்
இருந்து, 10 ஆயிரம் ஓட்டுகள் வித்தியாசத்தில் தோல்வியை தழுவியுள்ளனர்.
மீதமுள்ள அனைவருமே 10 ஆயிரம் ஓட்டுகளில் இருந்து, 45 ஆயிரம் ஓட்டுகள்
வரையிலான வித்தியாசத்தில் படுதோல்வியை அடைந்துள்ளனர். இதனால், எவ்வித
கோஷ்டியும் சாராத நடுநிலையான ஒருவர் தான் அடுத்த தலைவர் என்ற யோசனையில்,
காங்கிரஸ் மேலிடம் தீவிரமாக உள்ளதென தகவல்கள் தெரிவிக்கின்றன.