தலைநகரில் தி.மு.க., வீழ்ச்சிக்கு காரணம் என்ன?

by **மாலதி** Mon May 16, 2011 12:31 pm

சட்டசபை தேர்தல் முடிவுகளில், தலைநகரான சென்னை மீண்டும் அ.தி.மு.க.,
கோட்டையானது.சென்னையில் கடந்த தேர்தலின்போது, 14 தொகுதிகள் இருந்தன.
தொகுதி சீரமைப்புக்கு பிறகு, 16 தொகுதிகளாக எண்ணிக்கை உயர்ந்தது.
தலைநகரில் ஆளுங்கட்சிக்கு எதிராக அதிருப்தி அலை வீசுவதாக, உளவுத்துறை
கொடுத்த அறிக்கை காரணமாக சென்னையில் ஒன்பது தொகுதிகளில் மட்டும் தி.மு.க.,
போட்டியிட்டன.
தி.மு.க., கூட்டணியில், காங்கிரஸ் ஐந்து தொகுதியிலும், பா.ம.க.,
பெருந்தலைவர் மக்கள் கட்சி ஆகியவை தலா ஒரு தொகுதியிலும் போட்டியிட்டது.
அ.தி.மு.க., கூட்டணியில் அ.தி.மு.க., 12 தொகுதிகளிலும், தே.மு.தி.க., இரு
தொகுதிகளிலும், மார்க்சிஸ்ட், மனிதநேய மக்கள் கட்சி ஆகியவை தலா ஒரு
தொகுதியிலும் போட்டியிட்டன.தி.மு.க., தலைவர் கருணாநிதி சேப்பாக்கம்
தொகுதியில் போட்டியிடாமல், தனது சொந்த ஊரான திருவாருக்கு இடம்
பெயர்ந்தார். துணை முதல்வர் ஸ்டாலின் கொளத்தூரிலும், நிதியமைச்சர்
அன்பழகன் வில்லிவாக்கத்திலும், அமைச்சர் பரிதி இளம்வழுதி எழும்பூரிலும்,
தமிழக காங்கிரஸ் தலைவர் தங்கபாலு மயிலாப்பூரிலும்
போட்டியிட்டனர்.தி.மு.க., தலைமை எதிர்பார்த்தபடி, சென்னை நகர தொகுதிகளில்
தி.மு.க., கூட்டணி படுதோல்வியை தழுவியுள்ளது. ஓட்டு எண்ணிக்கை துவங்கியது
முதல், அ.தி.மு.க., கூட்டணி வேட்பாளர்கள் தொடர்ந்து முன்னிலை பெற்றனர்.
எழும்பூர் தொகுதியில் போட்டியிட்ட அமைச்சர் பரிதி இளம்வழுதிக்கும்,
தே.மு.தி.க., வேட்பாளர் நல்லதம்பிக்கும் இடையே சில நூறு ஓட்டுகள் மட்டுமே
வித்தியாசம் தொடர்ந்ததால், பரபரப்பு ஏற்பட்டது. ஆனால், இறுதியில்
தே.மு.தி.க.,வே வெற்றி பெற்றது.
கொளத்தூர் தொகுதியில் போட்டியிட்ட துணை முதல்வர் ஸ்டாலின்,
துவக்கத்தில் 1000 ஓட்டுக்கள் வித்தியாசத்தில் முன்னிலை பெற்றிருந்தார்.
12வது ரவுண்ட் முடிவில், 400 ஓட்டுக்கள் மட்டுமே ஸ்டாலின் முன்னிலை
பெற்றிருந்தார்.
ஆனால், அடுத்தடுத்த ரவுண்டுகளில் வித்தியாசம்
குறைந்து, அ.தி.மு.க., வேட்பாளர் சைதை துரைசாமி முன்னிலை பெற்றார். மாறி,
மாறி இருவரும் முதலிடத்துக்கு வந்ததால், எதிர்பார்ப்பு அதிகரித்தது.
பழுதான மின்னணு ஓட்டுப்பதிவு இயந்திரம் காரணமாக, முடிவை அறிவிப்பதில்
குழப்பம் ஏற்பட்டது.
தி.மு.க.,விற்கு ஆறுதல் அளிக்கும் வகையில், சேப்பாக்கம்-
திருவல்லிக்கேணி தொகுதியின் தேர்தல் முடிவுகள் அமைந்திருந்தது. தென்சென்னை
மாவட்ட தி.மு.க., செயலர் அன்பழகன், இத்தொகுதியில் போட்டியிட்டார். தன்னை
எதிர்த்து போட்டியிட்ட, மனித நேய மக்கள் கட்சி வேட்பாளரை விட தொடர்ந்து
முன்னிலை பெற்று, இறுதியில் வெற்றி பெற்றார்.
பின்னடைவு ஏன்? சென்னை தி.மு.க.,வின் கோட்டை என்ற எதிர்பார்ப்பு, கடந்த
சட்டசபை தேர்தலிலேயே தகர்க்கப்பட்டது. அப்போது மொத்தமிருந்த 14
தொகுதிகளில், ஏழு தொகுதிகளை அ.தி.மு.க., கைப்பற்றியது. அந்த எண்ணிக்கை
தற்போது உயர்ந்துள்ளது.கடந்த 2001-06ம் ஆண்டுவரையிலான, அ.தி.மு.க.,
ஆட்சிக்காலத்தில் சென்னை நகர மக்களின் குடிநீர் தேவையைப் போக்க புதிய
வீராணம் திட்டம் நிறைவேற்றப்பட்டது. இதனால், சென்னை நகர மக்களை
வாட்டிவதைத்த குடிநீர் பிரச்னை முடிவுக்கு வந்தது. இதனால், சென்னை நகர
மக்கள் அ.தி.மு.க., ஆதரவாளர்களாக மாறினர்.இந்த தேர்தலில் ஸ்பெக்ட்ரம்
விவகாரம் குறித்த விழிப்புணர்வு; விலைவாசி உயர்வு; மாநகராட்சி
கவுன்சிலர்களின் கட்டப்பஞ்சாயத்து, வசூல் வேட்டை; சட்டம் ஒழுங்கு
பாதிப்பு; ஆளுங்கட்சி போர்வையில் ரவுடிகள் நடமாடியது; தி.மு.க.,வின்
குடும்ப ஆதிக்கம் போன்றவை சென்னையில் தி.மு.க., தோல்வியடைய காரணமாக
அமைந்தது.