தமிழர்களுக்கு துன்பம் விளைவிக்கவே புலிகள் மீது மத்திய அரசு தடை விதிக்கிறது: வைகோ

தமிழர்களுக்கு
துன்பம் விளைவிக்கவே விடுதலைப் புலிகள் மீதான தடையை மத்திய அரசு
பயன்படுத்துகிறது என்று மதிமுக பொதுச் செயலாளர் வைகோ கூறியுள்ளார்.


விடுதலைப்புலிகள் இயக்கம் மீதான தடையை மேலும் 2 ஆண்டுகளுக்கு நீட்டித்து, மத்திய உள்துறை அமைச்சகம் உத்தரவு பிறப்பித்து இருந்தது.
இதற்கு தடை விதிக்கக்கோரி, டெல்லி உயர் நீதிமன்றில் உள்ள
தீர்ப்பாயத்தில் மனுதாக்கல் செய்யப்பட்டுள்ளது. இவ்வழக்கில், தன்னையும்
ஒருதரப்பாக சேர்த்துக்கொள்ள வேண்டும் என்று ம.தி.மு.க. பொதுச்செயலாளர்
வைகோ மிக விரிவான விண்ணப்பத்தை தாக்கல் செய்தார். அதில், `குற்றம்
சாட்டுகிறேன்' என்ற அவரது ஆங்கில நூலையும் இணைப்பாக சேர்த்து இருந்தார்.
தொடர்ந்து ஒவ்வொரு முறை தடையை நீட்டிக்கும்போதும் தன்னுடைய பேச்சுகளைக்
காரணமாகக் காட்டி இருக்கிறார்கள். எனவே, தான் பாதிக்கப்பட்டவன் என்ற
முறையில், தன் தரப்பு வாதத்தையும் கேட்க வேண்டும் என்று வைகோ சொன்னார்.
உடனே நீதிபதி, ’விடுதலைப்புலிகளை ஆதரிக்கிறீர்களே, நீங்கள் ஏன் உறுப்பினராகச் சேரவில்லை?’ என்று கேட்டார்.
’நான் உறுப்பினராகச் சேரவில்லை. ஆனால், அவர்களுடைய தமிழ் ஈழக்
கோரிக்கையைத் தொடக்கத்தில் இருந்தே ஆதரித்து வருகிறேன். அவர்களது
இயக்கத்தையும் ஆதரித்து வருகிறேன்’ என்றார் வைகோ.
உடனே அரசு வழக்கறிஞர், ’வைகோ, அந்த அமைப்பின் உறுப்பினராகவோ,
அதிகாரபூர்வ பிரதிநிதியாகவோ இல்லை. அதனால், அவர் தரப்பு வாதத்தை, இந்த
வழக்கில் அனுமதிக்கக் கூடாது’ என்றார். வைகோவின் தரப்பு வாதத்தைத்
தொடர்ந்து எடுத்து உரைப்பதற்கு நீதிபதி அனுமதி அளித்தார்.
தொடர்ந்து வைகோ முன் வைத்த வாதம் விவரம்:
விடுதலைப் புலிகள் அமைப்பு மீதான தடையை நீட்டிப்பதற்கு மத்திய அரசு கூறியுள்ள காரணங்கள் உண்மைக்கு புறம்பானவை.
உலகெங்கும் உள்ள தமிழர்களுக்காகவும், இந்தியாவில் உள்ள
தமிழர்களுக்காகவும் சேர்த்து தனி தமிழ் ஈழ நாடு கோருவதால் அது இந்தியாவின்
ஒற்றுமைக்கும், ஒருமைப்பாட்டுக்கும் ஆபத்தாக முடியும் என்று மத்திய அரசு
தனது வாதத்தில் கூறியுள்ளது.
தனி ஈழம் என்பது இலங்கைத் தீவில் உள்ள வடக்கு, கிழக்குப் பகுதி. அது அவர்களின் தாயகம்.
வரலாற்றின் தொடக்கத்திலிருந்து அவர்கள் அரசாண்ட பூமி. தமிழகத்தின் ஒரு
அங்குல இடத்தைக்கூட அவர்கள் தனி ஈழத்தோடு சேர்த்துக் கொள்ள விரும்பவில்லை.
இதற்கு மத்திய அரசு ஆதாரத்தை காட்ட முடியுமா?.
புலிகள் பற்றி தவறான எண்ணத்தை ஏற்படுத்த மத்திய அரசு செய்யும் திட்டமிட்ட பிரசாரமாகும்.
நான் இந்தியாவின் ஒற்றுமைக்கு எதிரானவன் அல்ல. நாட்டுப்பற்றில் நாங்கள்
யாருக்கும் சளைத்தவர்கள் அல்ல. தமிழகத்தைப் பிரிக்க வேண்டும் என்று
நாங்கள் சொல்லவில்லை. தனித்தமிழ் ஈழ நாட்டை ஆதரிக்கிறோம்.
அதை அமைப்பதுதான் எங்களின் குறிக்கோள். புலிகள் மீது தடை இருப்பதால்
அகதிகளாக தமிழகத்துக்கு வரும் தமிழர்களை புலிகள் என்று முத்திரை குத்தி
சிறை முகாமுக்கு அனுப்புகிறார்கள் அல்லது இலங்கைக்கே திருப்பி
அனுப்புகிறார்கள். இதற்காகவே தடையை நீட்டிக்க அனுமதிக்கக் கூடாது
என்கிறேன்.
உலகம் முழுவதும் இணையதளத்தில் புலிகளுக்கு ஆதரவாக, இந்தியாவுக்கு
எதிராக பிரசாரம் செய்யப்படுவதாக மத்திய அரசு ஆணையில்
குறிப்பிட்டுள்ளார்கள். மனித உரிமைகளைக் காக்க உலகில் எழுகின்ற குரல் அது.

தமிழர்களுக்கு துன்பம் விளைவிப்பதற்காகவே புலிகள் மீதான தடையை அரசு
பயன்படுத்துகிறது. இந்தக் காரணத்துக்காகவே, தடையை நீட்டிக்கக் கூடாது
என்கிறேன்’ என்றார் வைகோ.
அதற்கு நீதிபதி, ’உங்கள் மனுவின் மீதான ஆணை பின்னர் பிறப்பிக்கப்படும்’ என்று கூறி, வழக்கை ஒத்திவைத்தார்.
தொடர்ந்து, இந்த வழக்கின் அடுத்த விசாரணை, அக்டோபர் 5-ந் தேதி
சென்னையிலும், 20-ந் தேதி, ஊட்டியிலும் நடைபெறும் என்று நீதிமன்றப்
பதிவாளர் அறிவித்தார்.