மட்டக்களப்பு இராணுவ புலனாய்வுப்பிரிவை சேர்ந்த மதி சுட்டுக்கொல்லப்பட்டார்!

by **ஜனனி** Wed May 11, 2011 4:51 pm

மட்டக்களப்பில் இராணுவ புலனாய்வுப்பிரிவினருடன் சேர்ந்து செயற்பட்ட மதி
என்று அழைக்கப்படும் இராசமாணிக்கம் மதியழகன் என்ற நபர் இன்று நண்பகல்
இலங்கை நேரப்படி 2மணியளவில் அவரது வீட்டில் வைத்து இனந்தெரியாத நபர்களால்
சுட்டுக்கொல்லப்பட்டார்.
மட்டக்களப்பு புளியந்தீவு இரண்டாவது வாவி வீதியில் இவரது வீட்டில் வைத்து
சுட்டுக்கொல்லப்பட்டதாக அயலவர்கள் தெரிவித்தனர். இவரது சடலம் தற்போது
மட்டக்களப்பு போதனா வைத்தியசாலைக்கு எடுத்து செல்லப்பட்டுள்ளது.
ஈ.பி.டி.பி இயக்கத்துடன் இணைந்து செயற்பட்ட இவர் பின்னர் இராணுவ புலனாய்வு
பிரிவில் பணியாற்றினார். தாக்குதல் ஒன்றில் காயமடைந்து கால் ஒன்றை
இழந்திருந்த இவர் சக்கர நாற்காலியிலேயே நடமாடி வந்தார். மட்டக்களப்பில்
நடைபெறும் ஆட்கடத்தல் கொள்ளை போன்ற வன்முறை சம்பவங்களின் பின்னணியில் இவர்
செயற்பட்டு வந்ததாகவும் மட்டக்களப்பு மக்கள் தெரிவிக்கின்றனர்.
அண்மையில் ஆனைப்பந்தி பிள்ளையார் ஆலய நிர்வாக சபை தெரிவு செய்யப்பட்ட போது
அங்கு சென்ற அவர் தன்னையே தலைவராக தெரிவு செய்ய வேண்டும் என நிர்வாகிகளை
அச்சுறுத்தியதையடுத்து அவர்கள் மதி என்ற இந்நபரையே தலைவராக தெரிவு
செய்திருந்தனர்.
தற்போது இவர் கருணா குழுவின் மட்டக்களப்பு பொறுப்பாளராக இருப்பதாகவும்
சிறிலங்கா சுதந்திரக்கட்சியின் மட்டக்களப்பு நகரப்பொறுப்பாளராகவும்
நியமிக்கப்பட்டிருந்தார்.
மட்டக்களப்பு நகரில் அரசாங்கத்திற்கு ஆதரவான ஆர்ப்பாட்டங்களை இவரே
முன்னின்று ஏற்பாடு செய்வதாகவும் அப்பிரதேச மக்கள் தெரிவிக்கின்றனர்.
கடந்த சில வருடங்களுக்கு முதல் மட்டக்களப்பு மாமாங்கேஸ்வர ஆலய
தீர்த்தோற்சவத்தில் வைத்து இவர் மீது விடுதலைப்புலிகள் துப்பாக்கி
பிரயோகம் செய்த வேளை காயங்களுடன் தப்பி இருந்தார். இவர் இன்று
இனந்தெரியாத நபர்களின் துப்பாக்கி சூட்டுக்கு இலக்காகி கொல்லப்பட்டுள்ளார்.