அலகாபாத் ஐகோர்ட் தீர்ப்பு மாறுபட்ட ஒன்று : சுப்ரீம் கோர்ட் விதித்தது தடை

by **மாலதி** Tue May 10, 2011 7:21 am

புதுடில்லி :அயோத்தியில் உள்ள சர்ச்சைக்குரிய நிலம்
தொடர்பாக அலகாபாத் ஐகோர்ட் வழங்கிய தீர்ப்பிற்கு, சுப்ரீம் கோர்ட் தடை
விதித்துள்ளது. சர்ச்சைக்குரிய நிலத்தை மூன்றாகப் பிரிக்க வேண்டும் என,
எந்த தரப்பினரும் கோராத நிலையில், அதை பிரிக்கும்படி அலகாபாத் ஐகோர்ட்
வழங்கிய தீர்ப்பு மாறுபட்ட தீர்ப்பு என்று நீதிபதிகள் கூறியுள்ளனர்.

அயோத்தியில்
உள்ள சர்ச்சைக்குரிய 2.77 ஏக்கர் நிலம் யாருக்குச் சொந்தம் என்பது
தொடர்பாக தொடரப்பட்ட வழக்கில், கடந்த ஆண்டு செப்டம்பரில் அலகாபாத் ஐகோர்ட்
தீர்ப்பு வழங்கியது. மூன்று நீதிபதிகள் பெஞ்ச் வழங்கிய இந்த தீர்ப்பில்,
"சர்ச்சைக்குரிய நிலம் முஸ்லிம்கள், இந்துக்கள் மற்றும் நிர்மோகி அகடா
ஆகிய மூன்று தரப்பினருக்கும் சொந்தம்.நிலம் மூன்றாகப் பிரிக்கப்பட்டு,
மூன்று தரப்பினருக்கும் வழங்கப்பட வேண்டும்' என, உத்தரவிட்டது.

ஐகோர்ட்டின்
இந்த தீர்ப்பை எதிர்த்து, நிர்மோகி அகடா, அகில பாரத இந்து மகா சபா, ஜமாயத்
உலமா -ஐ- ஹிந்த், சன்னி மத்திய வக்ப் வாரியம் உட்பட பல அமைப்புகள்,
சுப்ரீம் கோர்ட்டில் அப்பீல் மனு தாக்கல் செய்தன. இந்த மனுக்கள் எல்லாம்
நேற்று நீதிபதிகள் அப்டாப் ஆலம் மற்றும் லோதா ஆகியோர் அடங்கிய சுப்ரீம்
கோர்ட் பெஞ்ச் முன் விசாரணைக்கு வந்தன.

அப்போது நீதிபதிகள் கூறியதாவது:அயோத்தியில்
உள்ள சர்ச்சைக்குரிய நிலத்தை மூன்றாகப் பிரிக்க வேண்டும் என்ற, அலகாபாத்
ஐகோர்ட்டின் உத்தரவிற்கு தடை விதிக்கிறோம். நிலத்தை மூன்றாகப் பிரிக்க
வேண்டும் என, வழக்கு தொடர்ந்த எந்த தரப்பினரும் கோராத நிலையில், அது போன்ற
தீர்ப்பை ஐகோர்ட் வழங்கியது மாறுபட்ட ஒன்று. இதன் மூலம் புதிய பரிமாணம்
உருவாக்கப்பட்டுள்ளது.ஐகோர்ட்டின் உத்தரவு மாறுபட்ட உத்தரவு என்பதால்,
அதற்கு தடை விதிக்க வேண்டியது அவசியம். நிலம் மூன்று தரப்பினருக்கும்
சொந்தம் என தெரிவித்ததன் மூலம், கோர்ட் தானாகவே ஏதோ ஒன்றைச் செய்துள்ளது.
இது போன்ற உத்தரவுகள் செயல்பாட்டுக்கு வர அனுமதிக்க முடியாது. நிலத்தை
மூன்று தரப்பினரும் பிரித்துக் கொள்ள வேண்டும் என தெரிவித்ததால், இந்த
வழக்கில் புதிய சர்ச்சை உருவாகியுள்ளது. திரும்ப திரும்ப கூறப்பட்ட
வாசகங்களை கொண்ட சர்ச்சையை தீர்க்காத தீர்ப்பாக அது அமைந்திருக்கிறது.
அயோத்தியில் சர்ச்சைக்குரிய நிலத்தில் தற்போதைய நிலை தொடரும். மேலும்,
சர்ச்சைக்குரிய 2.77 ஏக்கர் நிலத்தை சுற்றியுள்ள, மத்திய அரசால்
கையகப்படுத்தப்பட்டுள்ள 67 ஏக்கர் நிலத்திலும் எந்த விதமான மத
நடவடிக்கைகளையும் மேற்கொள்ளக்கூடாது. அந்த நிலத்திலும் தற்போதைய நிலை தொடர
வேண்டும்.இவ்வாறு நீதிபதிகள் தங்கள் உத்தரவில் குறிப்பிட்டனர்.

சுப்ரீம்
கோர்ட் பிறப்பித்த இந்த தடை உத்தரவால், அயோத்தியில் சர்ச்சைக்குரிய
நிலத்தில் இப்போதுள்ள ராமர் கோவிலில் நடைபெறும் வழிபாடுகளில் எந்தப்
பாதிப்பும் ஏற்படாது. அவை வழக்கம் போல நடைபெறும் என,
தெரிவிக்கப்பட்டுள்ளது.

சுப்ரீம் கோர்ட்டில் சன்னி வக்ப் வாரியம் தாக்கல் செய்த மனுவில்,
"அலகாபாத் ஐகோர்ட் பிறப்பித்த உத்தரவை ரத்து செய்ய வேண்டும். அந்த
தீர்ப்பு, ஆதாரங்கள் அடிப்படையில் வழங்கப்படவில்லை; நம்பிக்கையின்
அடிப்படையில் வழங்கப்பட்டுள்ளது. சர்ச்சைக்குரிய நிலத்தில் தற்போதுள்ள
கட்டடம் ராமர் பிறந்த இடம் என தெரிவித்ததன் மூலம், ஐகோர்ட் மிகப்பெரிய
தவறு செய்துள்ளது' என தெரிவித்தது.

இந்து மகா சபா தாக்கல் செய்த
மனுவில், ""அலகாபாத் ஐகோர்ட்டின் மூன்று நீதிபதிகள் வழங்கிய தீர்ப்பில்,
ஒரே ஒரு நீதிபதி மட்டும், அயோத்தியில் உள்ள சர்ச்சைக்குரிய நிலம்
முழுவதும் இந்துக்களுக்கே சொந்தம் என, கூறியுள்ளார். அந்த தீர்ப்பை உறுதி
செய்ய வேண்டும். மற்ற இரண்டு நீதிபதிகள் வழங்கிய தீர்ப்பை ரத்து செய்ய
வேண்டும்,'' என, கோரப்பட்டது.

"தடை விதித்தது திருப்தி அளிக்கிறது':"அலகாபாத்
ஐகோர்ட்டின் தீர்ப்பிற்கு சுப்ரீம் கோர்ட் தடை விதித்தது திருப்தி
அளிக்கிறது' என, ராமஜென்ம பூமி வழக்கில் தொடர்புடைய பல்வேறு தரப்பினரும்
கூறியுள்ளனர்.

"அயோத்தியில் சர்ச்சைக்குரிய நிலத்தில் தற்போதுள்ள
ராமர் கோவிலின் இப்போதைய நிலை தொடர வேண்டும். அங்கு நடைபெறும் பூஜைகள்
தொடரலாம் என, சுப்ரீம் கோர்ட் உத்தரவிட்டது மகிழ்ச்சி அளிக்கிறது' என,
ராம்லாலா விராஜ்மான் அமைப்பு சார்பில் ஆஜரான மூத்த வக்கீல் ரவிசங்கர்
பிரசாத் கூறியுள்ளார்.

சன்னி வக்ப் வாரிய வக்கீல் ஜப்பார்யப் ஜிலானி கூறுகையில்,
""சுப்ரீம் கோர்ட்டின் இன்றைய (நேற்றைய) உத்தரவின் மூலம் நாங்கள் திருப்தி
அடைந்துள்ளோம். இது, நாட்டில் அமைதியான சூழ்நிலை தொடர உதவும்.
சர்ச்சைக்குரிய நிலம் தங்களுக்கே சொந்தம் என, ஒவ்வொரு தரப்பினரும் உரிமை
கோருகின்றனர். அதனால், ஐகோர்ட் தீர்ப்பிற்கு சுப்ரீம் கோர்ட் தடை
விதித்துள்ளது. இந்த வழக்கின் விசாரணையை விரைவுபடுத்தும்படியும் கோர்ட்டை
நாங்கள் கேட்டுக் கொள்வோம்,'' என்றார்.

இந்து மகா சபா சார்பில் ஆஜரான வக்கீல் கூறுகையில்,
""சர்ச்சைக்குரிய நிலத்தை மூன்றாகப் பிரிக்க வேண்டும் என, வழக்கு தொடர்ந்த
எந்த ஒரு தரப்பினரும் கோரவில்லை. சர்ச்சைக்குரிய நிலம் என அழைக்கப்படும்
ராமஜென்ம பூமி முழுவதும் இந்து மகா சபாவுக்கே சொந்தம்,'' என்றார்.