ஆம்லா இரட்டை சதம்: தென் ஆப்ரிக்கா ரன்குவிப்பு: இந்தியா அதிரடி துவக்கம்

நாக்பூர்:
இந்தியாவுக்கு எதிரான முதல் டெஸ்டில், தென் ஆப்ரிக்காவின் ஹாசிம் ஆம்லா
இரட்டைச் சதம் அடித்து தூள் கிளப்பினார். தென் ஆப்ரிக்க அணி முதல்
இன்னிங்சில், 6 விக்கெட்டுக்கு 558 ரன்கள் குவித்து "டிக்ளேர்' செய்தது.
முதல் இன்னிங்சை துவக்கிய இந்திய அணிக்கு சேவக், காம்பிர் ஜோடி அதிரடி
துவக்கம் கொடுத்தது.
இந்தியா வந்துள்ள தென் ஆப்ரிக்க அணி, 2 போட்டிகள்
கொண்ட டெஸ்ட் தொடரில் மோதுகிறது. முதல் போட்டி நாக்பூர், விதர்பா
கிரிக்கெட் சங்க மைதானத்தில் நடக்கிறது. முதல் நாள் ஆட்டநேர முடிவில்,
தென் ஆப்ரிக்க அணி முதல் இன்னிங்சில் 2 விக்கெட் இழப்புக்கு 291 ரன்கள்
எடுத்து இருந்தது. காலிஸ் (159), ஆம்லா (115) இருவரும் அவுட்டாகாமல்
இருந்தனர்.
காலிஸ் அவுட்:
நேற்று
இரண்டாம் நாள் ஆட்டம் நடந்தது. தொடர்ந்து காலிஸ், ஆம்லா ஜோடி சிறப்பான
ஆட்டத்தை வெளிப்படுத்தியது. இந்த ஜோடி மூன்றாவது விக்கெட்டுக்கு 340
ரன்கள் சேர்த்த நிலையில், 173 ரன்கள் எடுத்திருந்த காலிஸ், ஹர்பஜன்
பந்தில், முரளி விஜயிடம் "கேட்ச்' கொடுத்து அவுட்டானார்.
டிவிலியர்ஸ் அபாரம்:
பின்
ஆம்லா, டிவிலியர்ஸ் இணைந்து அசத்தல் ஆட்டத்தை தொடர்ந்தனர். டிவிலியர்ஸ்,
சர்வதேச அரங்கில் 21வது அரைசதம் கடந்தார். இவர்களை பிரிக்க தோனி எடுத்த,
பல முயற்சிகளும் வீணானது. இறுதியில் சேவக்கை பந்து வீச அழைத்தார் தோனி.
இதற்கு நல்ல பலன் கிடைத்தது. நான்காவது விக்கெட்டுக்கு 108 ரன்கள் சேர்த்த
நிலையில், டிவிலியர்ஸ் (53), சேவக் சுழலில் வீழ்ந்தார்.
ஆம்லா இரட்டை சதம்:
மறுமுனையில்
ஆம்லா உறுதியான ஆட்டத்தை வெளிப்படுத்தினார். முதல் நாளில் இரண்டுமுறை
அவுட் வாய்ப்பில் இருந்து தப்பிய ஆம்லா, நேற்றும், 149 ரன்கள்
எடுத்திருந்த போது, இருமுறை தப்பிப்பிழைத்தார். தொடர்ந்து அசத்திய இவர்,
சேவக் பந்தில் ஒரு பவுண்டரி அடித்து, சர்வதேச டெஸ்ட் அரங்கில் முதன்
முதலாக இரட்டை சதம் கடந்தார். இவருடன் இணைந்த டுமினி (9), ஹர்பஜன் சுழலில்
சிக்கினார்.
தெ.ஆப்., "டிக்ளேர்':
அடுத்து
பவுச்சர் (39), ஜாகிர் கான் வேகத்தில் பலியானார். தென் ஆப்ரிக்க அணி முதல்
இன்னிங்சில், 6 விக்கெட் இழப்புக்கு 558 ரன்கள் எடுத்திருந்த போது,
"டிக்ளேர்' செய்வதாக அறிவித்தது. ஆம்லா (253, 22 பவுண்டரி), ஸ்டைன் ரன்
எதுவும் இன்றி, ஆட்டமிழக்காமல் இருந்தனர். இந்தியா சார்பில் ஜாகிர் கான்
3, ஹர்பஜன் 2, சேவக் ஒரு விக்கெட்டுகளை வீழ்த்தினர்.
அதிரடி துவக்கம்:
பின்
முதல் இன்னிங்சை துவக்கிய இந்திய அணிக்கு சேவக், காம்பிர் ஜோடி வழக்கம்
போல அதிரடி துவக்கம் கொடுத்தது. இரண்டாம் நாள் ஆட்ட நேர முடிவில் இந்திய
அணி, முதல் இன்னிங்சில் 4 ஓவரில், விக்கெட் இழப்பின்றி 25 ரன்கள் எடுத்து,
533 ரன்கள் பின்தங்கி இருந்தது. சேவக் (9), காம்பிர் (12) அவுட்டாகாமல்
களத்தில் இருந்தனர்.
லாங்வெல்ட்டுக்கு வாய்ப்பு
டெஸ்ட்
தொடருக்கு பின், இந்தியா--தென் ஆப்ரிக்க அணிகள் மூன்று ஒருநாள் போட்டிகள்
கொண்ட தொடரில் பங்கேற்கின்றன. இதற்கான தென் ஆப்ரிக்கா அணியில் லாங்வெல்ட்
சேர்க்கப்பட்டுள்ளார். இதுகுறித்து தேசிய தேர்வுக்குழுத் தலைவர் ஜெரால்டு மஜோலா கூறுகையில்,""
விரைவில் "டுவென்டி-20' <உலக கோப்பை மற்றும் உலக கோப்பை (50 ஓவர்)
போட்டிகள் வரவுள்ள நிலையில், இந்தியாவுக்கு எதிரான ஒருநாள் தொடரில்
பங்கேற்க, லாங்வேல்ட்டுக்கும் வாய்ப்பு அளித்துள்ளோம்,'' என்றார்.
அதிர்ஷ்டக்காரர்:
தென்
ஆப்ரிக்க அணியின் ஆம்லா, முதல் இன்னிங்சில் இரட்டை சதம் அடித்து
ஆட்டமிழக்காமல் இருந்தார். இதற்கு இந்திய அணியின் பீல்டிங்கும் ஒரு
காரணம். முதல் நாளில் இவர், 61 ரன்கள் எடுத்திருந்த போது, ஜாகிர் கான்
பந்தில் கொடுத்த வாய்ப்பை, தோனி மற்றும் முரளி விஜய் தவறவிட்டனர். பின் 82
ரன்களில் இருந்த போது பத்ரிநாத் வாய்ப்பை தவறவிட்டார். நேற்றும், 149
ரன்கள் எடுத்திருந்த போது ஹர்பஜனின் அடுத்தடுத்த பந்தில், ஆம்லா கொடுத்த
"கேட்ச்' வாய்ப்பை தோனி மற்றும் முரளி விஜய் வீணடித்தனர். இப்படி நான்கு
முறை தப்பிப்பிழைத்த இவர், இரட்டைச் சதம் அடித்து அசத்தினார்.
ஆம்லா "3000':
நேற்று
தென் ஆப்ரிக்க வீரர் ஆம்லா, 229 ரன்கள் எடுத்த போது சர்வதேச டெஸ்ட்
அரங்கில் 3000 ரன்களை கடந்து சாதித்தார். மொத்தம் 42 போட்டிகளில்
பங்கேற்று 13வது தென் ஆப்ரிக்க வீரராக, இந்த ரன்களை எடுத்துள்ளார்.
முதலிடத்தில் தென் ஆப்ரிக்காவின் காலிஸ் (10730) உள்ளார்.
வெள்ளி "பேட்':
இந்திய
வீரர் சச்சின், 20 ஆண்டுகளுக்கும் மேலாக கிரிக்கெட்டில் சாதித்து
வருகிறார். இவரது இந்த சாதனையை பாராட்டும் விதமாக, நாக்பூர் விதர்பா
கிரிக்கெட் சங்க அசோசியேஷன் (வி.சி.ஏ.,) சார்பில், நேற்று இரண்டாவது நாள்
ஆட்டம் முடிந்ததும், சச்சினுக்கு வெள்ளியினால் ஆன "பேட்' ஒன்று நினைவு
பரிசாக வழங்கப்பட்டது.
வெற்றிபெற முயற்சிப்போம்:
முதல்
டெஸ்டில் நாங்கள் வெற்றி பெற முயற்சிப்போம். இது பேட்ஸ்மேன்கள் கையில்
உள்ளது என இந்திய அணியின் பயிற்சியாளர் கிறிஸ்டன் தெரிவித்துள்ளார்.
இதுகுறித்து அவர் கூறியது:
நூறு டெஸ்டில் விளையாடிய அனுபவ வீரர்கள்
டிராவிட், லட்சுமண் இல்லை என்பது தெரியும். இருப்பினும் முரளி விஜய்
மற்றும் பத்ரிநாத் இருவரும் தங்களுக்கு கிடைத்துள்ள வாய்ப்பை நன்கு
பயன்படுத்துவார்கள் என நம்புகிறேன். அமித் மிஸ்ரா, விக்கெட் எதுவும்
வீழ்த்தாத போதும், என்னைப் பொறுத்தவரையில் அபாரமாக செயல்பட்டார். அதுபோல
ஹர்பஜனும் அசத்தினார். கடந்த 15 டெஸ்ட் போட்டிகளில் தொடர்ந்து ஐந்தாவது
பவுலர் இல்லாமலேயே சாதித்துள்ளோம். இதைத் தொடருவோம்.
எப்படியும்
போட்டியில் வெல்வதற்கு தேவையான அளவில், சிறப்பாக விளையாட முயற்சிப்போம்.
இதற்கு அபாரமான பேட்டிங் திறனை வெளிப்படுத்துவது முக்கியம். ஒருசில
வீரர்கள் அதிக ரன்களை குவிக்க வேண்டும். இதற்கான திறமை எங்களிடம் உள்ளது.
இவ்வாறு கிறிஸ்டன் கூறினார்.
ஸ்கோர்போர்டு
முதல் இன்னிங்ஸ்
தென் ஆப்ரிக்கா
ஸ்மித்(ப)ஜாகிர் 6(26)
பிரின்ஸ்(கே)தோனி(ப)ஜாகிர் 0(10)
ஆம்லா-அவுட் இல்லை- 253(473)
காலிஸ்(கே)முரளி விஜய்(ப)ஹர்பஜன் 173(351)
டிவிலியர்ஸ்(கே)பத்ரிநாத்(ப)சேவக் 53(88)
டுமினி-எல்.பி.டபிள்யு.,(ப)ஹர்பஜன் 9(35)
பவுச்சர்(கே)மிஸ்ரா(ப)ஜாகிர் 39(75)
ஸ்டைன்-அவுட் இல்லை- 0(7)
உதிரிகள் 25
மொத்தம் (176 ஓவரில் 6 விக்.,) 558 (டிக்ளேர்)
விக்கெட் வீழ்ச்சி: 1-5(பிரின்ஸ்), 2-6(ஸ்மித்), 3-346(காலிஸ்), 4-454(டிவிலியர்ஸ்), 5-476(டுமினி), 6-554(பவுச்சர்).
பந்துவீச்சு: ஜாகிர் கான் 31-7-96-3, இஷாந்த் 28-4-85-0, ஹர்பஜன் 46-1-166-2, அமித் மிஸ்ரா 53-5-140-0, சேவக் 18-1-55-1.
இந்தியா
காம்பிர்-அவுட் இல்லை- 12(14)
சேவக்-அவுட் இல்லை- 9(10)
உதிரிகள் 4
மொத்தம் (4 ஓவரில், விக்கெட் இழப்பின்றி) 25
பந்து வீச்சு: ஸ்டைன் 2-0-8-0, மார்கல் 2-0-13-0