தமிழில் நடிகர் சிரஞ்சீவி மகன் ராம்சரண் தேஜா "மாவீரன்" மூலம் அறிமுகம்

நடிகர்
சிரஞ்சீவி மகன் ராம்சரண் தேஜா நடித்த “மகதீரா படம் தெலுங்கில் வெற்றிகரமாக
ஓடியது. அப்படம் தமிழில், “மாவீரன் என்ற பெயரில் எடுக்கப்பட்டுள்ளது.
இப்படத்தை ரெட் ஜெயன்ட் மூவிஸ் தமிழகமெங்கும் ரிலீஸ் செய்கிறது.

தமிழ் திரைப்பட உலகில் இதன் மூலம் ராம்சரண் தேஜா அறிமுகமாகிறார்.
ராஜமவுலி இயக்கியுள்ள இப்படத்துக்கு மரகத மணி இசையமைத்துள்ளார். தமிழில்
இதன் பாடல் வெளியீட்டு விழா சென்னையில் நேற்று நடந்தது. இவ்விழாவில்
தயாரிப்பாளர் சங்கத் தலைவர் ராமநாராயணன், டைரக்டர் கே.எஸ். ரவிக்குமார்,
தரணி, தயாரிப்பாளர் உதயநிதி ஸ்டாலின், நடிகர் ராம்சரண் தேஜா. நடிகை
சுகாசினி உள்ளிட்ட பலர் கலந்துகொண்டனர்.

நடிகர்
கமலஹாசன் வெளியிட இயக்குனர் மணிரத்னம் பெற்றுக்கொண்டார். அப்போது இருவரும்
ராம்சரண் தேஜாவின் அபார நடிப்பை பாராட்டி பேசினார்கள். கமலஹாசன்
பேசியதாவது:

நானும் சிரஞ்சீவியும் ஆரம்பகால நடிகர்கள். சிரஞ்சீவி மகன் உள்ளிட்ட
இளம் நடிகர்களின் நடிப்பாற்றல் பொறாமை அளிப்பதாக உள்ளது. ராம்சரண் தேஜா
கஷ்டப்பட்டு நடித்து இருப்பது தெரிகிறது. மாவீரன் தமிழ் படத்தை அப்படியே
ஆந்திராவிலும் ரிலீஸ் செய்ய வேண்டும். எனது பல தமிழ் படங்கள் அங்கு
நேரடியாக வெளியாகி பல நாட்கள் ஓடியுள்ளன. தமிழை ரொம்ப போற்றுகிறவர்கள்
தெலுங்கர்கள். இங்கு வசிக்கும் தெலுங்கர்கள் கூட தமிழை தாய்மொழி போல்
ஏற்றுள்ளனர்.

தமிழ், தெலுங்கு திரையுலகினர் இணைந்து செயல்படவேண்டும்.
வெளிநாட்டுக்காரர்கள் பலர் இந்தியப் படம் மும்பையில் தயாராகிறது என்று
நினைக்கின்றனர். தமிழில், மலையாளத்தில், தெலுங்கில் என பல மொழிகளில்
இந்தியப் படங்கள் வருகின்றன. அதை அவர்களுக்கு ஞாபகப்படுத்த நமது இருபட
உலகமும் கைகோர்க்க வேண்டும். இதன் மூலம் உலக வர்த்தகத்தை
எட்டிப்பிடிக்கலாம்.

இவ்வாறு அவர் பேசினார்.