பரம்பரை அரசியல் தவறில்லை : அமைச்சர் அன்பழகன் பேச்சு

தாம்பரம் : ""நம்பிக்கைக்குரிய தலைமை என்றால் அது கருணாநிதி தலைமை
தான். பரம்பரை முறையில் அரசியலுக்கு வருவது தவறில்லை, திறமை இருந்தால்
வரலாம்'' என்று அமைச்சர் அன்பழகன் பேசினார்.
தாம்பரம், அனகாபுத்தூர் ஆகிய இடங்களில் அமைச்சர் அன்பழகன் தேர்தல் பிரசாரத்தில் ஈடுபட்டார்.
அப்போது, அவர் பேசியதாவது:வேட்பாளர் எஸ். ஆர். ராஜா, கடந்த
ஐந்து ஆண்டுகளாக எம்.எல்.ஏ.,வாக இருந்து மேம்பாலம், குடிநீர், சாலை,
போக்குவரத்து உள்ளிட்ட வசதிகளையும் செய்துள்ளார். தமிழகம் முழுவதும்
கருணாநிதியின் சாதனைகள் தான் பேசப்படுகின்றன. ஆனால், தாம்பரத்தில் மட்டும்
ராஜாவின் சாதனைகளையே பேசுகின்றனர். ஆனால், இந்த இரண்டுமே ஒன்று தான்.
முதல்வர் கட்டளைப்படி தான் துணை முதல்வர் ஸ்டாலின், அழகிரி உள்ளிட்ட
அனைவருமே பணியாற்றுகின்றனர். அவர் உத்தரவு இல்லாமல் யாரும் செயல்பட
முடியாது. தி.மு.க., ஆட்சி பரம்பரை ஆட்சி என தவறாக கூறுகின்றனர். பரம்பரை
என்பது அடையாளம் காட்டுவதே தவிர, அவரவருக்கு திறமை இருப்பதால் அரசியலுக்கு
வருகின்றனர்.முதல்வர் என்னை விட இரண்டு வயது சிறியவர். இருந்தாலும் நான்
கலைஞர் என்று தான் அவரை அழைக்கிறேன். ஆனால், கலைஞரை கருணாநிதி என்று பெயர்
சொல்லித் தான் ஜெயலலிதா பேசுகிறார்; அரசியல் நாகரிகம் தெரியாதவர் அவர்;
கம்யூனிஸ்ட்காரர்களை உண்டி குலுக்குபவர்கள் என்று கூறினார். தற்போது
கம்யூனிஸ்ட் கட்சியுடன் கூட்டணி வைத்து, இவரும் உண்டி குலுக்கப் போகிறார்
என்று நினைக்கிறேன். நாட்டு மக்களுக்காக உழைப்பவர் கருணாநிதி. இவை எல்லாம்
தொடர, கருணாநிதி ஆறாவது முறையாக முதல்வராக வேண்டும்.