தாக்குப் பிடிக்குமா சிவப்புக் கோட்டை?முதல்வர் பதவியை குறிவைத்து மம்தா அதிரடி

தமிழகத்தை போலவே, மேற்கு வங்கத்திலும் சட்டசபை தேர்தல் திருவிழா
கோலாகலமாக துவங்கி விட்டது. நக்சலைட்கள் ஆதிக்கம் அதிகம் இருப்பதால்,
பாதுகாப்பு காரணங்களுக்காக, மொத்தம் உள்ள 294 தொகுதிகளுக்கும் ஆறு
கட்டங்களாக இங்கு தேர்தல் நடக்கிறது. ஆளும் மார்க்சிஸ்ட் கம்யூனிஸ்ட்
கட்சி தலைமையிலான இடதுசாரி கட்சிகள் ஒரு கூட்டணியாகவும், மம்தாவின்
திரிணமுல் காங்கிரஸ் மற்றும் காங்கிரஸ் ஒரு கூட்டணியாகவும் தேர்தலை
சந்திக்கின்றன.
சிவப்புக் கோட்டை : மேற்கு வங்க மாநிலத்தை சிவப்புக் கோட்டை
என்றே கூறலாம். அந்த அளவுக்கு, கடந்த 34 ஆண்டுகளாக இடதுசாரி கட்சிகளின்
ஆதிக்கம், இங்கு கொடி கட்டிப் பறக்கிறது. ஜோதிபாசு முதல்வராக இருந்தவரை,
இடதுசாரி கட்சிகளின் ஆதிக்கத்தை, அசைக்க முடியவில்லை. குறிப்பாக,
எதிர்க்கட்சிகளே இல்லாத சூழல் இங்கு நிலவியது. ஜோதிபாசுவுக்கு பின்,
புத்ததேவ் முதல்வராக பதவியேற்றதும், இடதுசாரி கட்சிகளின் கோட்டை, ஆட்டம்
காணத் துவங்கி விட்டது.
நந்திகிராம், சிங்கூர் வன்முறை : கடந்த 2007ல் நந்திகிராம் என்ற
இடத்தில் சிறப்பு பொருளாதாரம் மண்டலம் அமைப்பதற்காக, 10 ஆயிரம் ஏக்கர்
பரப்பிலான நிலத்தை மாநில அரசு கையகப்படுத்தியது. இந்தோனேசியாவைச் சேர்ந்த
சலீம் குரூப் என்ற நிறுவனத்துக்கு ராசாயன தொழிற்சாலை அமைக்க அனுமதி
அளிக்கப்பட்டது. இதை எதிர்த்து, அந்த பகுதியில் வசித்த மக்கள் போராட்டம்
நடத்தினர். எதிர்க்கட்சிகளும் இந்த போராட்டத்துக்கு ஆதரவு தெரிவித்தன.
போலீசார் நடத்திய துப்பாக்கிச் சூட்டில் 14 பேர் கொல்லப்பட்டனர். இதனால் ,
அங்கு பெரும் வன்முறை ஏற்பட்டது.இதைத் தொடர்ந்து, கடந்த 2009ல் சிங்கூரில்
டாடாவின் நானோ கார் தொழிற்சாலை அமைக்க, மாநில அரசு ஒப்புதல் அளித்தது.
இதற்காக, 997 ஏக்கர் நிலம் கையகப்படுத்தப்பட்டது. இந்த நிலங்கள் விளை
நிலங்கள் என்றும், தொழிற்சாலை அமைக்க, இந்த நிலங்களை கையகப்படுத்தக்
கூடாது என்றும் பொதுமக்களும், எதிர்க்கட்சியினரும் போராட்டம் நடத்தினர்.
இதைத் தொடர்ந்து வன்முறை பரவியது. பலர் பலியாயினர்.இந்த இரண்டு
சம்பவங்களும், இடதுசாரி கூட்டணி ஆட்சியின் வரலாற்றில், நீக்க முடியாத ஒரு
கரும்புள்ளியாக அமைந்து விட்டது. மேற்கு வங்கத்தில் மார்க்சிஸ்ட்
கட்சியின் செல்வாக்கு குறைவதற்கு, இந்த இரண்டு சம்பவங்களும் அடித்தளமாக
அமைந்து விட்டன.இந்த சம்பவங்களுக்கு பின் நடந்த லோக்சபா தேர்தல்,
உள்ளாட்சி தேர்தல்கள் ஆகியவற்றில் மம்தாவின் திரிணமுல் கட்சிக்கு கணிசமான
வெற்றி கிடைத்தது. ஆளும் இடதுசாரி கூட்டணிக்கு கடும் சரிவு ஏற்பட்டது.
இதையடுத்துத் தான், தங்களது கோட்டை, ஆட்டம் காணத் துவங்கி விட்டதை,
இடதுசாரி கட்சி தலைவர்கள் உணரத் துவங்கினர்.
நக்சலைட்களால் நெருக்கடி : இதனால், ஆட்சியை தக்க வைத்துக்
கொள்வதற்காக பல்வேறு நலத் திட்டங்களை அறிவித்தனர். ஆனால், மேற்கு
மிட்னாபூர் மாவட்டத்தில் நக்சலைட்கள் மற்றும் அவர்களுக்கு ஆதரவாக
செயல்படும் பழங்குடியினரின் நடவடிக்கைகளால், ஆளும் கட்சிக்கு அடுத்த அடி
விழுந்தது. இந்த விவகாரத்தில் மம்தாவின் திரிணமுல் கட்சி, மறைமுகமாக
பழங்குடியினருக்கு ஆதரவு அளித்தது. இந்த விவகாரத்திலும், ஆளும் கட்சிக்கு
கடும் நெருக்கடி ஏற்பட்டது.இந்த நேரத்தில் தான், மம்தா பானார்ஜி ரயில்வே
அமைச்சராக பொறுப்பேற்றார். ஒட்டு மொத்த நாட்டுக்கே ரயில்வே அமைச்சராக
இருந்தாலும், மேற்கு வங்கத்துக்கு தான், ரயில்வே திட்டங்களுக்கு
முக்கியத்துவம் அளித்தார். ரயில்வே அமைச்சராக பொறுப்பேற்றதும், தான்
தாக்கல் செய்த இரண்டு பட்ஜெட்டிலுமே, மேற்கு வங்கத்துக்கு ஏராளமான
சலுகைகளை அறிவித்தார். ரயில்வேயின் தலைமையிடமே, கோல்கட்டாவில் தான்
செயல்படுகிறது என, கூறும் அளவுக்கு அவரின் நடவடிக்கைகள் அமைந்தன.
முதல்வர் பதவி குறி : மேற்கு வங்கத்தின் முதல்வர் பதவில் அமர
வேண்டும் என்ற ஒரே நோக்கத்துக்காகவே, அவர் இதைச் செய்தார். இந்த
சூழ்நிலையில் தான், தற்போது சட்டசபை தேர்தல் அறிவிக்கப்பட்டுள்ளது.
இதற்காகவே காத்துக் கொண்டிருந்த மம்தா பானர்ஜி, தீவிரமாக களம் இறங்கி
விட்டார். தொகுதி பங்கீடு, பிரசாரம் என, மம்தாவின் தேர்தல் எக்ஸ்பிரஸ்,
மிக வேகமாக சென்று கொண்டிருக்கிறது. ஆளும் இடதுசாரி கூட்டணியோ, தடுமாறிக்
கொண்டிருக்கிறது. கடந்த 34 ஆண்டுகளாக ஆட்சியில் இருந்தாலும், திடீரென
கிளம்பியுள்ள மம்தா என்ற அரசியல் புயலை சமாளித்து கரை சேர்ந்து விடுவோமா
என, அவர்கள் கவலைப்படுகின்றனர்.தேர்தலில் தோற்றுவிட்டால், இத்தனை
ஆண்டுகளாக கட்டிக் காத்து வந்த பெருமை பறிபோய் விடுமே என்ற பயம்
அவர்களுக்கு உள்ளது. எனவே, மம்தாவை சமாளித்து, எப்படியும் மீண்டும்
ஆட்சியில் அமர்ந்து விடுவது என்ற ஒரே நோக்கத்துடன் தேர்தல் பணிகளை
துவக்கியுள்ளனர். மேற்கு வங்கத்தில், மம்தாவின் அதிரடி அரசியலுக்கு,
சிவப்புக் கோட்டை தாக்குப் பிடிக்குமா என்பது, மே 13ம் தேதி தெரிந்து
விடும்.
அருண் ஜெட்லியை களமிறக்க திட்டம்: மேற்கு வங்கத்தில் பா.ஜ.,
வுக்கு பலமான அடித்தளம் இல்லை. இதனால், தேர்தல்களில் பா.ஜ.,வால் சாதிக்க
முடியவில்லை. இருந்தாலும், இந்த தேர்தலில், மற்ற பிரதான அரசியல்
கட்சிகளுக்கு அதிர்ச்சி வைத்தியம் அளிக்க வேண்டும் என்பதில் பா.ஜ.,
உறுதியாக உள்ளது. இதற்காக, அருண் ஜெட்லியை பிரசார தளபதியாக மேற்கு
வங்கத்துக்கு அனுப்பி வைக்கவும், கட்சி மேலிடம் முடிவு செய்துள்ளது.
பீகாரில் கடந்த சட்டசபை தேர்தலில், பா.ஜ.,வின் தேர்தல் ஒருங்கிணைப்பாளராக
அருண் ஜெட்லி தான் பணியாற்றினார். அந்த தேர்தலில் பா.ஜ., - ஐக்கிய ஜனதா
தளம் கூட்டணி மகத்தான வெற்றி பெற்றது. இதை மனதில் வைத்து தான், தற்போது
மேற்கு வங்கத்துக்கும் அருண் ஜெட்லியை, களமிறக்க பா.ஜ., மேலிடம் முடிவு
செய்துள்ளது. பா.ஜ.,வின் அருண் ஜெட்லி "சென்டிமென்ட்' கை கொடுக்குமா
என்பதை பொறுத்திருந்து தான் பார்க்க வேண்டும்.