திருமண விழாவில் புதுமையான தாம்பூலம்: சமூக மாற்றத்துக்கு அச்சாரம்

வாழப்பாடி: திருமண விழாவிற்கு வந்த உறவினர்கள் மற்றும் நண்பர்களுக்கு,
தகவல் அறியும் உரிமை சட்ட புத்தகம், லஞ்சம் தவிர்க்கும் ஜீரோ ரூபாய்
நோட்டு மற்றும் அறிஞர்களின் புத்தகங்களை வழங்கி அசத்தும் பழக்கம்,
வாழப்பாடி பகுதியில் அதிகரித்து வருகிறது. மக்களை நல்வழிப்படுத்தும் இந்த
பழக்கத்துக்கு, பொதுமக்களிடையே வரவேற்பு அதிகரித்துள்ளது.
உறவினர்கள், நண்பர்களை அழைத்து சுபமுகூர்த்தத்தில் திருமணம்
செய்பவர்கள், அந்த மகிழ்ச்சியை பகிர்ந்து கொண்டவர்களுக்கு அறுசுவை உணவுடன்
விருந்து வைப்பது வழக்கம். திருமண ஜோடியை வாழ்த்திய நெஞ்சங்களுக்கு, நன்றி
சொல்லும் விதமாக, தேங்காய், பழம் மற்றும் வெற்றிலை, பாக்கு போன்றவற்றை
தாம்பூலமாக வழங்குவதும் நம்மிடையே வழக்கத்தில் உள்ளது. சிலர் மணக்களின்
பெயர் அச்சிட்ட பையில் தாம்பூலம் போட்டு வழங்குகின்றனர்.தற்போது, புதுமை
புகுத்தும் வகையில், திருமண விழாவிற்கு வந்து வாழ்த்தும்
உறவினர்களுக்கும், நண்பர்களுக்கும் தேங்காய், பழம் மற்றும் வெற்றிலை,
பாக்கு தாம்பூலம் கொடுப்பதை தவிர்த்து, தகவல் அறியும் உரிமை சட்ட
புத்தகம், இங்கிலீஸ் டிக்ஷனரி, லஞ்சம் தவிர்க்கும் ஜீரோ ரூபாய் நோட்டு
மற்றும் நல்லன போதிக்கும் அறிஞர்களின் புத்தகங்களை வழங்கி அசத்தும்
பழக்கம் வாழப்பாடி பகுதியில் அதிகரித்து வருகிறது.
கடந்த வாரம், வாழப்பாடி அடுத்த அத்தனூர்பட்டி கிராமத்தை சேர்ந்த ஓய்வு
பெற்ற தலைமையாசிரியர் கணேசன் இல்லத் திருமணத்திற்கு வந்து, மணமக்களை
வாழ்த்திய அனைவருக்கும், லஞ்சம் கொடுப்பதையும் வாங்குவதையும் தவிர்க்கும்
வகையில், ஐந்தாம் தூண் இயக்கம் வெளியிட்ட ஜீரோ ரூபாய் நோட்டுகளும், ஆங்கில
அறிவுக்கு வழிவகுக்கும் இங்கீலீஸ் -தமிழ் அகராதி மற்றும் தகவல் அறியும்
உரிமை சட்டம் புத்தகம் ஆகியவற்றை வழங்கி அசத்தினர்.நேற்று முன்தினம்
வாழப்பாடி அடுத்த வெள்ளாளகுண்டம் கிராமத்தை சேர்ந்த ஓய்வு பெற்ற வேளாண்
அலுவலர் கோவிந்தன், புத்தனாம்பட்டி நேரு நினைவு கல்லூரி நூலக
கண்காணிப்பாளர் கலியமூர்த்தி ஆகியோரது இல்லத் திருமண விழாவில், தாம்பூலமாக
பாலசுப்பிரமணியன் என்பவர் எழுதிய "சிந்திப்போம்' என்ற வாழ்வியல் அறம்
குறித்த புத்தகமும் தாம்பூலமாக வழங்கப்பட்டது.திருமண விழாவிற்கு வந்து
வாழ்த்தும் உறவினர்களுக்கும், நண்பர்களுக்கும் தாம்பூலத்துக்கு பதிலாக,
சமூக மாற்றத்திற்கு வழி வகுக்கும் புத்தகங்களை கொடுக்கும் பழக்கம் நல்ல
வரவேற்பை பெற்றுள்ளது.