தமிழக மீனவர்களை குறிவைக்கும் இலங்கை அரசு : தமிழகத்தில் பல தரப்பு போராட்டம் வலுக்கிறது

by **ஜனனி** Thu Feb 17, 2011 1:23 pm

சென்னை: இலங்கை கடற்படையினர் தமிழக மீனவர்கள் மீது தொடர்ந்து கொடுத்து
வரும் தொல்லையினால் தற்போது நூற்றுக்கும் மேற்பட்ட மீனவர்கள் இலங்கை
சிறையில் வாடுகின்றனர். இந்த விவகாரத்தை கையில் எடுத்துள்ள அனைத்து அரசியல்
கட்சியினரும், ஆளும் கட்சி, எதிர்கட்சி என்ற பாரபட்சம் காட்டாமல்
போராட்டக்களத்தில் குதித்துள்ளனர்.
நேற்று முன்தினம் நாகை மீனவர்கள் இலங்கை கடல் எல்லைக்குள் மீன்பிடிக்க
சென்றதால் அந்நாட்டு கடற்படை போலீசார் தமிழக மீனவர்கள் 112 பேரை கைது
செய்தனர். தொடர்ந்து வடக்கு ஜப்னாவில் உள்ள பாய்ண்ட்பெட்ரோ மாஜிஸ்திரேட்
கோர்ட்டில் ஆஜர்படுத்தப்பட்டு ரிமாண்ட் செய்யப்பட்டனர். தற்போது சிறையில்
அடைக்கப்பட்டுள்ளனர். இதற்கிடையில் புதுக்கோட்டையை சேர்ந்த மேலும்24
மீனவர்களை மீண்டும் கைது செய்திருக்கின்றனர்.

களம் இறங்கினார் கனிமொழி:
நேற்று மீனவர்கள் நலன் காத்திடவும், இலங்கை அரசை கண்டித்தும் முதல்னர்
கருணாநிதியின் மகளும், எம்.பி.,யுமான கனிமொழி தம்கட்சி தொண்டர்களுடன்
இணைந்து போராட்டக்களத்தில் குதித்தார். கைது செய்யப்பட்டு உடனடியாக விடுதலை
செய்யப்பட்டார். இன்று 2 வது நாளாக தமிழகத்தில் இலங்கைக்கு எதிராக கடும்
கண்டனக்குரல் எழுந்துள்ளன.

இலங்கை தூதரகம் முற்றுகை : சென்னையில்
பா.ஜ., கட்சி மாநில தலைவர் பொன்.ராதா கிருஷ்ணன் தலைமையில் இலங்கை
தூதரகத்தை முற்றுகையிட திரண்டு வந்தனர். இவர்களை போலீசார் தடுத்து நிறுத்தி
200 பேரை கைது செய்தனர்.

நாகையில் மீன்பிடி தொழில் பாதிப்பு : கைது செய்யப்பட்ட மீனவர்களை
விடுவிக்க வலியுறுத்தி நாகை மாவட்டம் முழுவதும் மீனவர்கள்
வேலைநிறுத்தப்போராட்டத்தில் ஈடுபட்டுள்ளனர். பைபர் படகுகள், கட்டுமரங்கள்
விசைப்படகுகள் கடலுக்கு செல்லவில்லை. சுமார் ஒரு லட்‌சம் மீனவர்கள் மீன்
பிடிக்க செல்லவில்லை. ஏற்கனவே கடலுக்கு சென்ற படகுகள் அனைத்தும் கரை
திரும்பி விட்டன.
மதுரையில் இலங்கை கொடி எரிப்பு :
மதுரையில் இலங்கை அரசை கண்டித்து இந்திய இளைஞர் பேரவையினர் இலங்கை கொடியை
எரித்தனர். இது தொடர்பாக 5 பேரை போலீசார் கைது செய்திருக்கின்றனர்.
பிரதமர் உறுதி என்னாச்சு: கடந்த
மாதம் நாகையை சேர்ந்த 2 மீனவர்கள் இலங்கை கடற்படையினரால் கொல்லப்பட்டனர்.
இதனையடுத்து தமிழக முதல்வர் கருணாநிதி பிரதமருடன் தொடர்பு கொண்டு இலங்கை
அரசை கண்டிக்குமாறு கேட்டுக்கொண்டார். தொடர்ந்து தமிழக மீனவர் நலன் காத்திட
உரிய நடவடிக்கை எடுக்கப்படும் என்றார் பிரதமர். கடந்த சில நாட்களுக்கு
முன்னர் இந்திய வெளியுறவு செயலர் நிருபமாராவ் இலங்கை சென்று அதிபர் மகிந்தா
ராஜபக்சேவை சந்தித்தார். இந்த பேச்சிலும் தமிழக மீனவர்கள் பிரச்னை முக்கிய
அம்சமாக இருந்தது குறி்ப்பிடத்தக்க்து.
ம.தி.மு.க., கண்டனம் தீர்மானம்:
சென்னையில் இன்று நடந்த ம.தி.மு.க., பொதுக்குழுவில் மீனவர்களை காப்பாற்ற
தவறிய மத்திய , மாநில அரசுகளுக்கு எதிராக கண்டனம் தெரிவித்து தீர்மானம்
நிறைவேற்றப்பட்டுள்ளது.