தனித்து போட்டி குறித்து ராகுல் எடுத்த சர்வேயால் தமிழக காங்கிரசார் உற்சாகம்

தமிழகத்தில் தனித்து போட்டியிட்டால் காங்கிரசுக்கு செல்வாக்கு எப்படியிருக்கும் என்ற நிலையை அறிவதற்கு ராகுல் தமிழகம் மற்றும் மும்பையை சேர்ந்த தனியார் நிறுவனங்கள் மூலம் ரகசிய சர்வே எடுத்துள்ளார். இந்த சர்வேயால் காங்கிரசார் உற்சாகமடைந் துள்ளனர். சர்வேயில் காங்கிரசுக்கு ஆதரவாக கருத்து வெளியாகியுள்ளது என தெரியவந்துள்ளது.

"தனிப் பெரும்பான்மையுடன் காங்கிரஸ் கட்சி மத்தியில் ஆட்சி அமைக்க வேண்டும் என்பது ராகுலின் கனவாக உள்ளது. அந்த கனவை நிறைவேற்றுவதற்கு, மாநில அளவில் காங்கிரஸ் கட்சியை பலப்படுத்தவும், மக்கள் ஆதரவை திரட்டும் வியூகத்தையும் ராகுல் அமைத்து வருகிறார். தமிழகத்தில் நடந்த இளைஞர் காங்கிரஸ் தேர்தலில் 13 லட்சம் உறுப்பினர்கள் சேர்க்கப்பட்டனர். இளைஞர் காங்கிரசார் முதலில் ஊராட்சி அளவில் கட்சியை பலப்படுத்த வேண்டும். அதன் பின் சட்டசபை, லோக்சபா தொகுதிகளில் கவனம் செலுத்த வேண்டும் என்பது ராகுலின் அறிவுரை. கட்சியை தேசிய அளவில் வளர்ப்பதற்குரிய திட்டங்களை அவர் வகுத்து, அதை செயல்படுத்தும் போது, சில மாநிலங்களில் நடக்கும் சட்டசபை தேர்தலும் அவருக்கு சவாலாக அமைந்து விடுகிறது. கடந்த 2007ம் ஆண்டு உ.பி., மாநில சட்டசபை தேர்தலில் 22 எம்.எல்.ஏ.,க்களையும், 2009ம் ஆண்டு லோக்சபா தேர்தலில் 22 எம்.பி.,க்களையும் காங்கிரஸ் வெற்றி பெற்றது. இந்த மாநிலத்தில் ராகுல் பார்முலா வெற்றி பெற்றது. அதே சமயம் பீகார் சட்டசபை தேர்தலில் தனித்து போட்டியிட்ட, காங்கிரஸ் மாநில அளவில் இரண்டாவது கட்சியாக இடம் பெற்றாலும், ஒன்பது சீட்டிலிருந்து நான்கு எம்.எல்.ஏ., சீட்டாக குறைந்ததால் அங்கு ராகுல் பார்முலா தோல்வி அடைந்தது. இரண்டு மாநில தேர்தல் பார்முலாவை தமிழக சட்டசபை தேர்தலுக்கு நடைமுறைப்படுத்த ராகுல் விரும்பவில்லை. அந்த இரண்டு மாநிலங்களுக்கும் தமிழகத்திற்கு பல்வேறு வித்தியாசம் உள்ளது.

தமிழகத்தில் தனித்து போட்டியிட்டால் காங்கிரசுக்கு செல்வாக்கு எப்படியிருக்கும் என்ற நிலையை அறிவதற்கு ராகுல் தமிழகம் மற்றும் மும்பையை சேர்ந்த தனியார் நிறுவனங்கள் மூலம் ரகசிய சர்வே எடுத்துள்ளார். அந்த சர்வேயின் முடிவில் தமிழத்தில் காங்கிரஸ் தனித்து போட்டியிட்டால் காங்கிரசின் செல்வாக்கு உயரும் என தெரியவந்துள்ளது. எனினும், ராகுல் தமிழகத்தில், "ரிஸ்க்' எடுக்க விரும்பவில்லை. தி.மு.க., கூட்டணியில் காங்கிரஸ் நீடிக்கட்டும் என பச்சைக் கொடி காட்டியுள்ளார். ஆனால், இந்த முறை 100 தொகுதிகள் வரை போட்டியிட வேண்டும் என விரும்புகிறார். அவரது விருப்பத்திற்கு ஏற்ப தி.மு.க., கூட்டணியில், காங்கிரஸ் குழு பேச்சுவார்த்தை நடத்தும். இதற்கிடையில் தமிழகத்தில் காங்கிரஸ் வெற்றி பெறக்கூடிய தொகுதிகள் எவை? எந்த தொகுதியில் வெற்றி வாய்ப்பு குறைவு? கூட்டணி பலத்துடன் எந்த தொகுதிகளில் வாய்ப்பு உள்ளது என்பதை அறிய ஒரு சட்டசபை தொகுதிக்கு பத்து பேர் வீதம் களம் இறக்கி சர்வே பணியில் ஈடுப்படுத்தியுள்ளார். இந்த சர்வே முடிவுக்கு, "ஏ' கிரேடு, "பி' கிரேடு, "சி' கிரேடு என மூன்று வகைகளாக பிரித்து வைத்துள்ளார். அதே போல் ஏற்கனவே ஒவ்வொரு தொகுதிகளின் இளைஞர் காங்கிரஸ் நிர்வாகி மற்றும் தாய் கட்சியின் (பேரன்ட்பாடி) முக்கிய நிர்வாகி ஒருவரிடமிருந்தும், கடந்த ஆறு மாதங்களுக்கு முன் இன்னொரு சர்வே எடுத்து வைத்துள்ளார். அதில் காங்கிரசுக்கு எவ்வளவு ஓட்டுக்கள் இருக்கிறது, காங்கிரஸ், "சிட்டிங்' எம்.எல்.ஏ.,வுக்கு செல்வாக்கு எப்படி இருக்கிறது? ஆதிதிராவிடர்கள் ஓட்டு எவ்வளவு, சிறுபான்மை ஓட்டுக்கள் எவ்வளவு? எந்த சமுதாயம் ஓட்டுக்கள் பெரும்பான்மையாக உள்ளது? காங்கிரசில் சிறந்த வேட்பாளர்கள் யார்? என்ற கேள்விகளுக்கும் அந்த சர்வேயில் பதில்கள் உள்ளன.

சர்வே விவரங்களையும், தேர்தல் கமிஷன் வெப்செட்டுகளில் உள்ள விவரங்களையும் சட்டசபை தொகுதி வாரியாக தொகுத்து வைத்துள்ளார். இந்த சர்வேயின் அடிப்படையில் தான் தொகுதி பங்கீட்டில் தி.மு.க., கூட்டணியில் சீட்டுகளை பெற வேண்டும் என்றும், பை-பாஸ் ரூட்டில் கட்சிக்கு சம்பந்தம் இல்லாமல் தேர்தல் டிக்கெட்டுகளை வாங்குவதை தடுக்கும் முயற்சியிலும் ராகுல் ஈடுபட்டுள்ளார். மொத்தத்தில் தமிழக தேர்தல்களில் கடைபிடிக்கப்பட்ட, "கோட்டா சிஸ்டத்திற்கு' முற்றுப்புள்ளி வைத்து, புதிய பார்முலாவை ராகுல் சட்டசபைத் தேர்தலில் அறிமுகப்படுத்தவுள்ளார். இந்த பார்முலா காங்கிரஸ் வட்டாரத்தில் உற்சாகத்தை ஏற்படுத்தியுள்ளது.