சர்ச்சைக்குள்ளான எஸ்-பாண்ட் ஒதுக்கீட்டை ரத்து செய்ய சிபாரிசு

by **மாலதி** Thu Feb 10, 2011 7:23 am

புதுடில்லி : "எஸ்-பாண்ட்' டிரான்ஸ்பாண்டர் ஒதுக்கீடு ஒப்பந்தத்தை ரத்து செய்வது தொடர்பாக, கொள்கை முடிவு எடுக்கும்படி, சட்டத் துறை வல்லுனர்கள், அரசுக்கு, கடந்தாண்டே ஆலோசனை வழங்கியுள் ளனர்.

இந்திய விண்வெளி ஆராய்ச்சிக் கழகம், விரைவில் ஏவ இருக்கும், ஜி-சாட் -6 மற்றும் ஜி-சாட் 6ஏ செயற்கைக் கோள்களில், தலா, பத்து எஸ்-பாண்ட் டிரான்ஸ்பாண்டர்களை, திவாஸ் மீடியா நிறுவனத்திற்கு ஒதுக்கீடு செய்ய, 2005ல் ஒப்பந்தம் செய்யப்பட்டது. செயற்கைக் கோள்கள் ஏவப்படாத நிலையில், இந்த ஒப்பந்தத்தால், அரசுக்கு, 2 லட்சம் கோடி ரூபாய் இழப்பு ஏற்பட வாய்ப்பு உள்ளதாக செய்திகள் வெளியாயின. இதையடுத்து, இஸ்ரோவும், மத்திய அரசும் இதற்கு மறுப்பு தெரிவித்தன. ஒப்பந்தம் செய்தபோது, "எஸ்-பாண்ட்' டிரான்ஸ்பாண்டர்களை பயன்படுத்தும் தொழில்நுட்பம் யாரிடமும் இல்லை. மேலும், "எஸ்-பாண்ட்' தொழில்நுட்பத்திற்கும், வரும் காலத்தில் போட்டியிருக்கும் என்ற நோக்கில், இந்த ஒப்பந்தம் குறித்து, 2009ல், ஆய்வு செய்யப்பட்டது. ஆனால், திவாஸ் நிறுவனத்துடனான ஒப்பந்தத்தைரத்து செய்வது குறித்து முடிவு எடுக்கும் அதிகாரம் இஸ்ரோவிடம் இல்லை. எஸ்-பாண்ட் குறித்து முடிவு எடுக்கும் உரிமை, மத்திய அரசிடம் தான் இருந்தது. இதனால், இந்த ஒப்பந்தத்தை ரத்து செய்யும்படி, மத்திய அரசை இஸ்ரோ கேட்டுக்கொண்டது. பொதுவாக, இது போன்ற கொள்கை முடிவுகளை எடுக்கும்பட்சத்தில், அது, கேபினட்டில் ஒப்புதல் பெறப்பட்டு முறைப்படி அரசு கெசட்டில் வெளியிட்ட பிறகே அமலுக்கு வரும். இந்நிலையில், கடந்தாண்டு ஜூலையில், சட்ட வல்லுனர்கள், அரசுக்கு தெரிவித்த ஆலோசனையில், "எஸ்-பாண்ட் ஒதுக்கீட்டை ரத்து செய்வது தொடர்பாக கொள்கை முடிவு எடுக்கும்படி' கூறியிருந்தனர். தற்போதைய நிலையில், ஒப்பந்தம் ரத்து செய்யப்படவில்லை. "எஸ்-பாண்ட்' மொபைல் போன் பயன்பாட்டிற்கு அதிக வர்த்தக மதிப்பு கொண்டது. இது, 4ஜி ஸ்பெக்ட்ரம் பயன்பாட்டிற்கானது. இதை உணர்ந்து தான் சட்ட வல்லுனர்கள், ஒப்பந்தத்தை ரத்து செய்வது குறித்து அரசுக்கு ஆலோசனை வழங்கியுள்ளனர்.

"எஸ்-பாண்ட்' ஒப்பந்தம்அடுத்த வாரம் ரத்தாகிறது? "எஸ்-பாண்ட்' டிரான்ஸ்பாண்டர் ஒதுக்கீடு குறித்து ஆண்ட்ரிக்ஸ் - திவாஸ் நிறுவனங்கள் இடையேயான ஒப்பந்தத்தை மத்திய அரசு அடுத்த வாரம் ரத்து
செய்யும் என தெரிகிறது.இஸ்ரோ ஏவவிருக்கும் செயற்கைக்கோளில் உள்ள,"எஸ்-பாண்ட்' டிரான்ஸ்பாண்டர்களை வர்த்தக பயன்பாட்டிற்காக ஒதுக்கீடு செய்ய, ஆண்ட்ரிக்ஸ் நிறுவனம், திவாஸ் மல்டிமீடியா நிறுவனத்துடன் ஒப்பந்தம் செய்திருந்தது. இந்த ஒப்பந்தம் குறித்து ஆய்வு செய்த விண்வெளி கமிஷன் , "எஸ்-பாண்ட்' டிரான்ஸ்பாண்டர்களை ஒதுக்கீடு செய்வதில் சர்வதேச அளவில் முடிவு செய்ய வேண்டியிருப்பதால் ரத்து செய்ய வேண்டும் என கோரியது. இருப்பினும், இது குறித்து கொள்கை முடிவு எடுக்க வேண்டியிருந்ததால் , கேபினட்டை கூட்டி புதிய கொள்கையை வகுக்கும்படி சட்ட வல்லுனர்களும் கருத்து தெரிவித்து இருந்தனர். சமீபத்தில் இந்த விஷயம் மீடியாக்களில் வெளிவந்து, அரசுக்கு இழப்பு ஏற்பட்டுவிட்டதாக செய்திகள் வெளியானதை தொடர்ந்து, இந்த ஒப்பந்தத்தை ரத்து செய்வது தொடர்பாக அடுத்த வாரம் கேபினட் அமைச்சர்கள் கூட்டத்தில் முடிவு எடுக்கப்படும் என தெரிகிறது.அதற்கு முன்பாக, நாளை மறுநாள் விண்வெளி கமிஷனின் கூட்டம் நடைபெற உள்ளது. இதில், இந்த விவகாரம் குறித்து விவாதிக்கப்பட்டு, இதற்கான முடிவு எடுக்கப்படுகிறது.