ரூ.1.50 கோடி நிலம் அபகரிக்க முயற்சி : சேலம் தி.மு.க., மாஜி எம்.எல்.ஏ., மீது திடுக் புகார்

by **ஜனனி** Wed Jan 19, 2011 7:55 am

சேலம் : சேலத்தில், 1.50 கோடி ரூபாய் மதிப்புள்ள நிலத்தை, வெள்ளி நகை
தொழிலதிபரிடம் இருந்து, தி.மு.க., மாஜி எம்.எல்.ஏ.,வின், பினாமிகள் என
கூறும் சிலர், மிரட்டி அபகரிக்க முயற்சி மேற்கொண்டுள்ளதாக, மாநகர போலீஸ்
கமிஷனர் சுனில்குமார் சிங்கிடம் புகார் செய்யப்பட்டுள்ளது.
சேலம், செவ்வாய்ப்பேட்டை, மாணிக்கம் தெருவை சேர்ந்த வெள்ளி நகை
தொழிலதிபர் அமர்நாத்; இவரது மனைவி சாந்தி மற்றும் சகோதரர்கள் மோதிலால்,
ராஜன் ஆகியோருக்கு, நேஷனல் ஓட்டல் அருகில் உள்ள லஷ்மி நகரில், 3,340
சதுரடி காலி நிலம் சொந்தமாக உள்ளது. இது, குடும்ப சொத்து.தற்போதைய சந்தை
மதிப்புப்படி, இதன் விலை 1.50 கோடி ரூபாய். இந்த காலி இடத்தில் சிலர்
ஆக்கிரமிப்பு செய்ததாக, அமர்நாத்துக்கு தகவல் கிடைத்தது. கடந்த 10ம் தேதி
அமர்நாத் தரப்பினர், தங்களது மனையை பார்வையிட்டனர்.காம்பவுண்டு சுவர்,
நுழைவாயில் பூட்டை உடைத்து, சிலர் அத்துமீறி இரும்பு கூரை அமைத்துள்ளதை
கண்டு அதிர்ச்சியடைந்தனர். வெங்கடாசலம் என்பவர், அமர்நாத் குடும்ப சொத்தை,
சொந்தம் கொண்டாடி, இரும்பு கூரை அமைத்தது தெரியவந்தது. இது சம்பந்தமாக
அமர்நாத் தரப்பு, செவ்வாய்ப்பேட்டை போலீஸ் ஸ்டேஷனில் புகார் செய்தது.
போலீசார் எவ்வித நடவடிக்கையும் மேற்கொள்ளவில்லை.
நேற்று அமர்நாத்,
அவரது மனைவி சாந்தி, தாயார் சரஸ்வதி, சகோதரர்கள் மோதிலால், ராஜன்
உள்ளிட்டோர், போலீஸ் கமிஷனர் அலுவலகம் வந்தனர். 1986ல் அமர்நாத்
குடும்பத்தினர் வாங்கிய சொத்தை, வெங்கடாசலம், மேட்டுத்தெரு மோகன்,
செவ்வாய்ப்பேட்டையை சேர்ந்த பாபுலால் உள்ளிட்டோர் அபகரிக்கும் முயற்சியில்
ஈடுபட்டுள்ளதாக போலீஸ் கமிஷனர் சுனில்குமார் சிங்கிடம் அலுவலகத்தில்
புகார் தெரிவித்தனர்.
இது பற்றி அமர்நாத் சகோதரர்கள் கூறியதாவது:சேலம், நேஷனல் ஓட்டல், லஷ்மி
நகரில் 1.50 கோடி ரூபாய், மதிப்புள்ள 3,340 சதுரடி நிலம் எங்களுக்கு
சொந்தமானது. சேலம் மாவட்ட தி.மு.க., துணை செயலரும், பனமரத்துப்பட்டி,
முன்னாள் எம்.எல்.ஏ.,வுமான சிவலிங்கத்தின் பினாமிகள் என கூறி,
மேட்டுத்தெரு மோகன், பாபுலால் ஆகியோர் எங்களை மிரட்டி, நிலத்தை விற்பனை
செய்யும்படி கேட்டனர்.எங்களுக்கு சொந்தமான நிலத்தின், காம்பவுண்ட் சுவர்,
"கேட்' பூட்டை உடைத்து, அத்துமீறி நுழைந்துள்ளனர். மேலும், அங்கு இரும்பு
கம்பி கூரை போட்டு ஆக்கிரமிப்பு செய்துள்ளனர். மோகன், பாபுலால் ஆகியோர்,
சொத்தை தங்களுக்கு விற்பனை செய்யும்படி மிரட்டி வருகின்றனர். எனவே,
மிரட்டல் பேர்வழிகளிடம் இருந்து எங்கள் குடும்ப சொத்தை காப்பாற்றி,
ஆக்கிரமிப்பை அகற்ற, போலீஸ் அதிகாரிகள் நடவடிக்கை எடுக்க வேண்டும்.இவ்வாறு
அமர்நாத் சகோதரர்கள் கூறினர்.
சேலம் மாநகரம் மற்றும் மாவட்ட பகுதியில் சொத்து பிரச்னை சம்பந்தமாக
ஆளும்கட்சி பிரமுகர்கள் மீது தொடர்ந்து அடுக்கடுக்கான புகார்கள்
கூறப்பட்டு வரும் நிலையில், தி.மு.க., மாஜி எம்.எல்.ஏ., சிவலிங்கம்
உள்ளிட்டோர் மீது வெள்ளி நகை தொழிலதிபர் புகார் கூறியுள்ளது,
தி.மு.க.,வினரிடையே பெரும் சலசலப்பை ஏற்படுத்தியுள்ளது.
தி.மு.க., மாஜி எம்.எல்.ஏ., சிவலிங்கம் கூறியதாவது:அமர்நாத்
மற்றும் அவரது சகோதரர்கள் யார் என்றே, எனக்கு தெரியாது. கல்லூரி
கட்டியதில் கடன் வாங்கி, காசு இல்லாமல் இருந்து வருகிறேன். என் மீது பொய்
புகார் அளித்துள்ளனர். அந்த நிலம் எங்கிருக்கிறது என்றே எனக்கு
தெரியாது.வேண்டுமென்றே, அரசியல் ரீதியாக பழிவாங்க சிலர் தூண்டி விட்டு,
என் மீது பொய் புகார் கூறியுள்ளனர். என் பெயரை பயன்படுத்தி மேட்டுத்தெரு
மோகன், நிலம் சம்பந்தப்பட்ட பிரச்னையில் ஈடுபட்டாரா என்பது குறித்து
விசாரிக்கிறேன்.சும்மா நிலம் கொடுத்து பத்திரம் செய்து கொள்ள கூறினால்
கூட, பத்திரம் பதிவு செய்ய என்னிடம் காசு இல்லாத நிலையில் நான்
இருக்கிறேன். "ரியல் எஸ்டேட்' தொழிலில் நான் ஈடுபட்டு பல ஆண்டுகளாகி
விட்டது. தேர்தல் சமயத்தில் வீண் வதந்தியை பரப்பி வருகின்றனர். இவ்வாறு
சிவலிங்கம் கூறினார்.