பட்ஜெட்டில் அறிவிக்கப்பட்ட ரயில்கள் எங்கே?ரயில் பயணிகள் நலச் சங்கங்கள் கேள்வி

by **ஜனனி** Tue Jan 18, 2011 7:57 am

கடந்தாண்டு ரயில்வே பட்ஜெட்டில் தமிழகத்திற்கு அறிவிக்கப்பட்டு இன்னும்
துவங்கப்படாத ரயில்களை இயக்க, ரயில்வே நிர்வாகம் உடனடி நடவடிக்கை எடுக்க
வேண்டும்.
ஆய்வு செய்யப்பட்டுள்ள புதிய ரயில் பாதைகளுக்கு போதிய நிதி
ஒதுக்கீடு செய்யவும் அதிகாரிகளும், மத்திய, மாநில அரசுகளும் முயல வேண்டும்
என்றும் தமிழக பொதுமக்கள் மற்றும் பல்வேறு ரயில் பயணிகள் நலச் சங்கத்தின்
சார்பிலும் ரயில்வே நிர்வாகத்திற்கு கோரிக்கை விடுக்கப்பட்டுள்ளது.
* பட்ஜெட்டில் அறிவிக்கப்பட்டும் இன்னும் இயக்கப்படாத ரயில்கள்:
கடந்த ஆண்டு ரயில்வே பட்ஜெட்டில், சென்னை - கோவை இடையே வாரத்தில் ஆறு
நாட்கள் துரந்தோ ரயில் இயக்கப்படும் என்று அறிவிக்கப்பட்டது. இந்த ரயில்
இன்னும் இயக்கப்படவில்லை.
மதுரை - திருப்பதி இடையே வாரம் இரு முறை எக்ஸ்பிரஸ் ரயில், கோவை -
திருப்பதி இடையே வாரம் மூன்று முறை எக்ஸ்பிரஸ் ரயில், பெங்களூரு -
நாகர்கோவில் இடையே வாராந்திர எக்ஸ்பிரஸ் ரயில், கோவை - ஈரோடு இடையே
பாசஞ்சர் ரயில்கள் இயக்கப்படும் என்றும் பட்ஜெட்டில் அறிவிக்கப்பட்டது.
இதுவரை இந்த ரயில்கள் இயக்கப்படவில்லை.
பெங்களூரு - நாகர்கோவில் இடையே வாராந்திர ரயில் இயக்கப்படுவதற்கு
பதிலாக வாராந்திர சிறப்பு ரயில் இயக்கப்பட்டு வருகிறது. இந்த ரயிலை
நிரந்தர ரயிலாக அறிவிக்க வேண்டும்.கடந்த ஆண்டு பட்ஜெட்டில் அறிவிக்கப்பட்ட
எர்ணாகுளம் - மும்பை துரந்தோ எக்ஸ்பிரஸ், நான்கு தினங்களுக்கு முன்
இயக்கப்பட்டது. சென்னை - கோவை இடையே துரந்தோ ரயில் இயக்க ஏனோ அதிகாரிகள்
கண்டு கொள்ளவில்லை.நாகர்கோவில் - கோவை இடை யே இரவு நேரத்தில் இயக்கப்படும்
எக்ஸ்பிரஸ் ரயிலில், தூத்துக்குடி மாவட்ட மக்களுக்கு ஏதுவாக கோவைக்கு
இணைத்து இயக்கும் வகையில் தூத்துக்குடி - வாஞ்சி மணியாச்சி இடையே இணைப்பு
ரயில் இயக்கப்படும் என்று இரண்டாண்டுகளுக்கு முன் ரயில்வே பட்ஜெட்டில்
அறிவிக்கப்பட்டும் இன்னும் செயல்படுத்தப்படவில்லை.
ஜோத்பூர் - பெங்களூரு இடையே வாரத்தில் இரண்டு நாட்கள் இயக்கப்பட்டு
வரும் எக்ஸ்பிரஸ் ரயில், கோவை வரை நீட்டிக்கப்படும் என்று 2009ம் ஆண்டு
பட்ஜெட்டில் அறிவிக்கப்பட்டது. இந்த அறிவிப்பும் கிடப்பில்
போடப்பட்டுள்ளது. இந்த ரயில்கள் இயக்கப்பட தமிழக முதல்வரும், ரயில்வே
அதிகாரிகளும் துரித நடவடிக்கை எடுக்க வேண்டும் என, ரயில் பயணிகள்
சங்கங்கள் கோரியுள்ளன.
*தேவைப்படும் புதிய ரயில்கள்: கொல்லத்திலிருந்து -
திருவனந்தபுரம் - நாகர்கோவில் - திருநெல்வேலி - மதுரை - திருச்சி வழியாக
வேளாங்கண்ணிக்கும், மேட்டுப்பாளையத்திலிருந்து கோவை - திருப்பூர் - ஈரோடு
வழியாக வேளாங்கண்ணிக்கும், சென்னை எழும்பூரிலிருந்து மயிலாடுதுறை வழியாக
திருச்சிக்கும் இரவு நேர ரயில் இயக்கப்பட வேண்டும்.சென்னை எழும்பூர் -
திருச்செந்தூர் இடையே வாரத்தில் ஒரு நாள் இயக்கப்படும் செந்தூர்
எக்ஸ்பிரஸ் ரயிலை தினசரி ரயிலாக இயக்க வேண்டும்.தஞ்சை - மயிலாடுதுறை -
விழுப்புரம் இடையேயும், மதுரை - தூத்துக்குடி இடையேயும் பாசஞ்சர் ரயில்
இயக்கப்பட வேண்டும்.
*நிதியின்றி தவிக்கும் புதிய பாதை: தஞ்சை - திருவையாறு -
அரியலூர், தஞ்சை - ஒரத்தநாடு - பட்டுக்கோட்டை, மதுரை - மேலூர் -
திருப்பத்தூர், திருவண்ணாமலை - ஜோலார்பேட்டை, தர்மபுரி - மொரப்பூர்,
கன்னியாகுமரி - தூத்துக்குடி - திருச்செந்தூர் இடையே புதிய பாதை அமைக்க
ஆய்வு செய்யப்பட்டுள்ளது. இந்த ஆண்டு பட்ஜெட்டில் இப்பாதைகளுக்கு போதுமான
நிதி ஒதுக்கீடு செய்ய வேண்டும்.
திண்டிவனம் - செஞ்சி - திருவண்ணாமலை, திண்டிவனம் - நகரி, ஈரோடு -
தாராபுரம் - காங்கேயம் - பழநி ரயில் பாதை ஒப்புதல் அளிக்கப்பட்டு பணிகள்
துவங்கிவிட்டன. இப்பாதைகளுக்கு போதுமான நிதி இவ்வாண்டு பட்ஜெட்டில்
ஒதுக்கீடு செய்யப்பட வலியுறுத்தப்பட வேண்டும்.திருச்சி - தஞ்சை இடையே அகல
ரயில் பாதையில் ரயில் போக்குவரத்து அதிகரித்துள்ளது. இதனால், திருச்சி -
தஞ்சை இடையே உபயோகப்படுத்தாமல் போடப்பட்டிருக்கும் மீட்டர் கேஜ் பாதையை
அகல ரயில் பாதையாக மாற்றியமைத்தால், கூடுதல் ரயில்கள் இயக்கவும், சரக்கு
ரயில் போக்குவரத்துக்கும் உதவியாக இருக்கும்.
* கோவை சந்திப்பில் நிற்குமா?இருகூர் - வடகோவை இரு வழிப்பாதை
பணி முடிந்துள்ளதால் வெளியிடங்களிலிருந்து இயக்கப்படும் ரயில்கள்
அனைத்தும் கோவை சந்திப்பு ரயில் நிலையத்திற்கு வந்து செல்ல ஆவன செய்ய
வேண்டும் என்றும், நீலகிரி, தூத்துக்குடி, கன்னியாகுமரி மற்றும்
நாகப்பட்டினம் மாவட்ட பயணிகள் நலச் சங்கங்கள் மற்றும் அரசியல்
பிரமுகர்களின் சார்பில் தெற்கு ரயில்வேக்கு கோரிக்கைகள் அனுப்பப்பட்டுள்ளன.