மீனவர் மீது துப்பாக்கி சூடு நியாயமற்றது: மத்திய அரசு கண்டனம்

by **ஜனனி** Fri Jan 14, 2011 7:58 am

புதுடில்லி: "இந்திய மீனவர்கள் மீது துப்பாக்கிச் சூடு நடத்துவது
நியாயமற்றது. படை பலத்தை பிரயோகிப்பதை இலங்கை அரசு தவிர்க்க வேண்டும்' என,
மத்திய அரசு சார்பில் இலங்கையிடம் தெரிவிக்கப்பட்டுள்ளது.
மத்திய வெளியுறவு அமைச்சகம் வெளியிட்டுள்ள அறிக்கை: பாக்
நீரிணைப்பில் மீன் பிடித்துக் கொண்டிருந்த இந்திய மீனவர், இலங்கை
கடற்படையால் சுட்டுக் கொல்லப்பட்டதாக தகவல் கிடைத்துள்ளது. இந்த தகவல்
கிடைத்ததும், இலங்கையில் உள்ள எங்கள் தூதரக அதிகாரி விஷ்ணு பிரசாத்,
இலங்கை அரசின் கவனத்துக்கு இதை கொண்டு சென்றார். இது தொடர்பாக, இந்திய
அரசு சார்பில் கவலையையும், வருத்தத்தையும் அவர் தெரிவித்தார். இது போன்ற
சூழ்நிலையில், துப்பாக்கிச் சூடு நடத்துவது போன்ற படை பிரயோகத்தை இலங்கை
அரசு தவிர்க்க வேண்டும்.
இந்தியா - இலங்கை இடையேயான கடல் பகுதியில் மீன் பிடிக்கும் மீனவர்களின்
பாதுகாப்பு மற்றும் நலன் முக்கியமானது. இது போன்ற பிரச்னைகளுக்கு அரசு
முக்கியத்துவம் அளிக்கும். இது போன்ற நேரங்களில் துப்பாக்கிச் சூடு
நடத்துவதை தவிர்க்க வேண்டும் என, இலங்கை அரசிடம் தொடர்ந்து வலியுறுத்தி
வருகிறோம். இந்த விவகாரத்தில், 2008 அக்டோபரில் இரு நாடுகளுக்கும் இடையே
ஏற்பட்ட ஒப்பந்தத்தை பின்பற்ற வேண்டும். இலங்கை கடற்படை, அதிகபட்ச
எதிர்ப்பை காட்டக்கூடாது. இவ்வாறு அந்த அறிக்கையில்
தெரிவிக்கப்பட்டுள்ளது. இதனிடையே, கொழும்பில் உள்ள இந்திய தூதரகம் இது
குறித்து முழு விவரம் தரக் கேட்டு வெளியுறவு அமைச்சர் கிருஷ்ணா
கேட்டிருக்கிறார் என்று கூறப்பட்டது.
இலங்கை மறுப்பு: இந்திய அரசின் இந்த அறிக்கைக்கு, இலங்கை
சார்பில் பதில் அளிக்கப்பட்டுள்ளது. இலங்கை கடற்படை செய்தி தொடர்பாளர்
அதுலா செனார்த், செய்தியாளர்களிடம் கூறுகையில், "இந்திய மீனவர் மீது,
இலங்கை கடற்படையினர் துப்பாக்கிச் சூடு நடத்தியதாக தகவல் வெளியாகியுள்ளது.
இதுபோன்ற துப்பாக்கிச் சூடு சம்பவம் நடந்ததாக எங்களுக்கு எந்த தகவலும்
இல்லை. இலங்கை கடற்படையினர், தமிழக மீனவர்கள் மீது துப்பாக்கிச் சூடு
நடத்தவில்லை' என்றார்.
மத்திய அரசு கண்டனம்: இந்திய மீனவர்களை இலங்கை கடற்படையினர்
தாக்கியதற்கு, மத்திய அரசு கடும் கண்டனம் தெரிவித்துள்ளது. கடந்த புதன்
கிழமை கடலில் மீன் பிடித்துக் கொண்டிருந்த இந்திய மீனவர்கள் மீது இலங்கை
கடற்படையினர் தாக்குதல் நடத்தியதில், ஒரு மீனவர் இறந்தார்; மற்றொரு மீனவர்
பலத்த காயம் அடைந்தார். இந்நிலையில், இந்திய மீனவர்கள் மீது இலங்கை
கடற்படையினர் நடத்திய தாக்குதலுக்கு, கொழும்பில் உள்ள தூதரகம் மூலமாக
மத்திய அரசு கடும் கண்டனம் தெரிவித்துள்ளது. "இந்திய மீனவர்கள் மீது
நடத்தப்பட்ட தாக்குதல் நியாயமற்றது. இலங்கை கடற்படையினர் இதுபோன்ற
செயல்களில் ஈடுபடாமல் அந்நாட்டு அரசு தடுக்க வேண்டும். இரு நாட்டு அரசுகள்
இடையே 2008 அக்டோபரில் ஏற்பட்ட உடன்பாட்டின்படி, இலங்கை கடற்படையினர்
கட்டுப்பாட்டுடன் நடந்து கொள்ள வேண்டும். மீனவர்கள் உயிரிழப்பு சம்பவங்கள்
நிகழாமல் தடுக்க வேண்டும்' என, கூறியுள்ளது.