பாசமாக பெற்ற 10 பிள்ளைகளும் பணத்திற்காக மறந்தனர் தாயை

by **அருள்** Tue Jan 11, 2011 7:48 am

மதுரை : தொட்டிலிட்டு, சீராட்டி, தாலாட்டி வளர்த்த 10 பிள்ளைகளும்,
பணத்தையே பிரதானமாக எண்ணி, பாசத்தை மறந்ததால் அனாதையாக்கப்பட்ட 85 வயது
தாயம்மாள் இன்று மருத்துவமனையில் தவித்து கொண்டிருக்கிறார்.
காரைக்குடியை சேர்ந்த இவருக்கு, ஐந்து மகன்கள்; ஐந்து மகள்கள். தங்க
நகை செய்யும் தொழிலில் ஈடுபட்ட ராஜகோபால் என்பவரை, 14 வயதில் திருமணம்
செய்து கொண்டார். சொந்த வீட்டை ஏழு லட்ச ரூபாய்க்கு விற்று, கடைசி மகன்
திருமணத்தை நடத்தியதோடு, பிள்ளைகளுக்கு தலா 30 ஆயிரம் ரூபாய் பிரித்து
கொடுத்தனர். மீதி தொகையை வங்கியில் டிபாசிட் செய்தனர். வாரிசுகள் கேட்டு
கொண்டதால், அவர்களுக்கு மேலும் தலா 40 ஆயிரம் ரூபாய் கொடுத்தனர்.பின்,
வாடகை வீட்டில் இருந்த தந்தை, தாயை ஆறு ஆண்டுகளுக்கு முன், மகன் ஒருவர்
வெளியேற்ற, இருவரும் மதுரையில் அடைக்கலமானர். இந்நிலையில், கணவர்
உடல்நலமில்லாமல் இறந்தபின், மேல்மருவத்தூருக்கு செல்ல திட்டமிட்டிருந்த
தாயம்மாளை, வங்கி கணக்கில் இருந்த 90 ஆயிரம் ரூபாயை எடுப்பதற்காக மகன்
ஒருவர் தன்னுடன் சேர்த்து கொண்டார். பணத்தை எடுத்தவுடன் அவரை வீட்டை
விட்டு வெளியேற்றினார்.
இதுகுறித்து காரைக்குடி மகளிர் போலீசில் தாயம்மாள் புகார் செய்தார்.
போலீசார் சமரசம் செய்து அனுப்பினர். பின், மகன் கொடுமை காரணமாக, வீட்டை
விட்டு வெளியேறி, மதுரை வக்கீல் தமிழரசனின் உதவியை நாடி வந்தார். கடவூர்
ஆனந்தம் முதியோர் நல்வாழ்வு மையத்தில் சேர்க்கப்பட்ட தாயம்மாளுக்கு,
உடல்நலம் பாதிக்கப்பட்டது.தற்போது டாக்டர் நாராயணசாமி சிகிச்சை அளித்து
வருகிறார்.
அவர் கூறுகையில், "தாயம்மாள் பாசத்திற்காக ஏங்குகிறார். மனதளவில் பாதிக்கப்பட்டுள்ளதால் நினைவாற்றல் குறைந்து வருகிறது' என்றார்.
வக்கீல் தமிழரசன் கூறுகையில், "அவரது பிள்ளைகளுக்கு நோட்டீஸ்
அனுப்பினேன். மூத்த மகன் மட்டும் வந்து பார்த்து சென்றார். பின், திரும்பி
வரவில்லை. கலெக்டர், எஸ்.பி., மாவட்ட நீதிபதிக்கு தாயம்மாள் புகார்
அனுப்பினார். எந்த பலனும் இல்லை.கடந்த 15 நாட்களாக உடல்நலம் பாதித்து
மருத்துவமனையில் இருக்கிறார். பிள்ளைகளால் உதறி தள்ளப்பட்ட இவருக்கு,
தேவையான உதவிகளை வாரிசுகள் செய்து தர, அதிகாரிகள் நடவடிக்கை எடுக்க
வேண்டும்' என்றார்.