சன் டிவி நெட்வொர்க்கின் ' கால் கேபிள்ஸ்' நிறுவன டிஜிட்டல் உரிமம் ரத்து

சென்னை: சென்னை: சன் டி.வி., நெட்வொர்க்கைச் சேர்ந்த கால் கேபிள் நிறுவனத்தை 15 நாட்களுக்குள் மூடுமாறு மத்திய அரசு உத்தரவிட்டுள்ளது. இந்த கேபிள் நிறுவனத்திற்கான உரிமத்தை மத்திய தகவல் ஒலிபரப்பு அமைச்சகம், கடந்த 20ம் தேதி ரத்து செய்து உத்தரவு பிறப்பித்தது. உள்துறை அமைச்சகத்தின் பாதுகாப்பு அனுமதியை பெறத் தவறியதால் உரிமம் ரத்து செய்யப்படுவதாக அந்த உத்தரவில் கூறப்பட்டுள்ளது.
கால் கேபிள் நிறுவனத்திற்கான ஒளிபரப்பு உரிமம் உடனடியாக ரத்த செய்யப்படுவதாகவும், இந்த கேபிள் நிறவனம் மூலம் தொலைக்காட்சி நிகழ்ச்சிகளைப் பார்த்து வரும் வாடிக்கையாளர்கள் 15 நாட்களுக்குமள் வேறு கேபிள் நிறுவனத்திற்கும் மாறிக் கொள்ள வேண்டும் என்றும் இது தொடர்பாக கால் கேபிள் நிறுவனம் 15 நாட்களுக்கு தனது ஒளிபரப்பின் மூலம் வாடிக்கையாளர்களுக்கு அறிவிக்க வேண்டும் என்றும் இவ்வாறு அறிவித்தததற்கு ஆதாரமாக அந்த அறிவிப்பை ஒரு சி.டி.,யில் பதிவு செய்து அமைச்சகத்திற்கு அனுப்ப வேண்டும் என்றும் அந்த உத்தரவில் குறிப்பிடப்பட்டுள்ளது.
இந்த உத்தரவால் சன் நெட் வொர்க்கின் அனைத்து வர்த்தக நடவடிக்கைகளும் பாதிக்கப்படும் என்றும் அதனால் ஏற்படும் இழப்பை ஈடுகட்ட முடியாது என்றும், எவ்வித விளக்கமும் கேட்காமல் திடீரென உரிமம் ரத்து செய்யப்பட்டிருப்பதாகவும், தங்கள் கருத்தை தெரிவிக்க வாய்ப்பு தரப்படவில்லை என்றும் கால் கேபிள் நெட்வொர்க் தரப்பில் கூறப்பட்டது.
இது தொடர்பாக கால் கேபிள் நிறுவனம் சென்னை ஐகோர்ட்டில் வழக்கு தொடர்ந்துள்ளது.
மத்திய தகவல் மற்றும் ஒலிபரப்புத் துறை, நேற்று வெளியிட்ட அறிவிப்பில், நாடு முழுவதும், 17 உரிமங்களை ரத்து செய்துள்ளது. இதில், தமிழகத்தைச் சேர்ந்த, சென்னை அயனாவரம் ஜோதிசங்கர் அண்ணாமலை, தஞ்சாவூரைச் சேர்ந்த காவிரி டிஜிட்டல் நெட்வொர்க், சென்னை, மயிலாப்பூர்,' கால் கேபிள்ஸ்' நிறுவனம் ஆகியவற்றின், டிஜிட்டல் உரிமங்கள் ரத்து செய்யப்பட்டு உள்ளதாக தெரிவித்துள்ளது.

செயல்படவில்லை:

ஜோதிசங்கர் அண்ணாமலை, 2012 ஜூன், 22ம் தேதி, உரிமம் பெற்ற பின் செயல்படவில்லை. அதனால், உரிமம் ரத்து செய்யப்படுவதாக தெரிவித்துள்ளது. தஞ்சாவூர் காவிரி டிஜிட்டல் நெட்வொர்க் மற்றும் 'கால் கேபிள்ஸ்' ஆகியவற்றுக்கு, மத்திய உள்துறை அனுமதி அளிக்கவில்லை என்பதால், ரத்து செய்யப்படுவதாக காரணம் கூறப்பட்டுள்ளது. இவ்விரு நிறுவனங்களில், காவிரி டிஜிட்டல் நெட்வொர்க், 2012 செப்டம்பர், 27ம் தேதி, தற்காலிக உரிமம் பெற்றுள்ளது. இந்த உரிமம் நிரந்தரம் செய்யப்படவில்லை.ஆனால், 'கால் கேபிள்ஸ்' நிறுவனம் ( சன் டிவி நெட்வொர்க்), சென்னை பெருநகரில் டிஜிட்டல் முறையில் ஒளிபரப்பு செய்ய, 2012 ஜூன், 12ம் தேதி, நிரந்தர உரிமமும், இரண்டாம் நகர பகுதியில் டிஜிட்டல் ஒளிபரப்பு செய்ய, 2013 மார்ச், 7ம் தேதி, தற்காலிக உரிமமும் பெற்றுள்ளது. இந்த இரண்டு உரிமங்களும் ரத்து செய்யப்பட்டு உள்ளன.இதேநேரத்தில், சென்னை பெருநகரில், டிஜிட்டல் ஒளிபரப்பு செய்ய, 'ஆதார் டிஜிட்டல் விஷன், அக் ஷயா டிஜிநெட் கேபிள் விஷன், தமிழக கேபிள் 'டிவி' கம்யூனிகேஷன், ஜாக் கம்யூனிகேஷன், ஏர் மீடியா நெட்வொர்க்' ஆகியவற்றுக்கு நிரந்தர டிஜிட்டல் உரிமத்தை, மத்திய தகவல் மற்றும் ஒலிபரப்பு துறை வழங்கியுள்ளது.
சென்னையைத் தவிர, பிற பகுதிகளில் டிஜிட்டல் ஒளிபரப்பு செய்ய, 'மேன் பவர் மீடியா நெட்வொர்க் (அரக்கோணம்), சுபம் டிஜிட்டல் கேபிள் சர்வீஸ் (ராஜபாளையம்), சூரியா டிஜிட்டல் பிராட்காஸ்டிங் (சேலம்), சிட்டி 'டிவி' (கோவை) நாகை டெலிவிஷன் நெட்வொர்க் (நாகப்பட்டினம்), சுபம் டிஜிட்டல் கேபிள் சர்வீஸ் (ராஜபாளையம்) ஆகியவற்றுக்கு நிரந்தர உரிமம் அளிக்கப்பட்டு உள்ளது.ஆனால், தமிழக அரசு கேபிள் 'டிவி' நிறுவனத்தின், டிஜிட்டல் உரிமம் கோரும் விண்ணப்பத்தை ஏற்கவோ, அனுமதி வழங்கவோ இல்லை என்பது குறிப்பிடத்தக்கது.