கேன்ஸ் திரைப்பட விழா நாளை கோலாகல துவக்கம்: கமல் ஹாசன் கலந்து கொள்கிறார்

by tamilcinemafire Tue May 13, 2014 8:38 pm

உலக புகழ்பெற்ற ‘கேன்ஸ்’ படவிழா, பிரான்சு நாட்டில், நாளை (புதன்கிழமை) தொடங்குகிறது. இந்த படவிழாவில், நடிகர் கமல் ஹாசன் கலந்து கொள்கிறார்.
ஆண்டுதோறும் மே மாதம் பிரான்சு நாட்டில் உள்ள ‘கேன்ஸ் நகரில் ‘கேன்ஸ்’ திரைப்பட விழா நடைபெறுவது வழக்கம். அதன்படி இந்த ஆண்டு கேன்ஸ் விழா நாளை (புதன்கிழமை) ‘கேன்ஸ்’ நகரில் தொடங்குகிறது. இம்மாதம் 25–ந்தேதி வரை விழா நடைபெற இருக்கிறது. இது, உலகஅளவில் புகழ்பெற்ற திரைப்படவிழா. உலகம் முழுவதும் பல்வேறு நாடுகளில் தயாரான சிறந்த திரைப்படங்கள் அங்கு திரையிடப்படும். போட்டி பிரிவு, போட்டியில்லாத பிரிவு, மரியாதை நிமித்தமான பிரிவு ஆகிய மூன்று பிரிவுகளில் ஆயிரக்கணக்கான படங்கள் திரையிடப்படுகிறது.
அதில், கலை–அழகியல் நிறைந்த சிறந்த படங்களுக்கான போட்டியும் நடைபெறும். சிறந்த படத்துடன், சிறந்த நடிகர்–நடிகை, மற்றும் சிறந்த தொழில்நுட்ப கலைஞர்களும் தேர்ந்தெடுக்கப்பட்டு விருதுகள் வழங்கப்படும். உலகஅளவில் மிகஉயர்ந்த விருதுகளாக இந்த விருது கருதப்படுகிறது. பலநாடுகளில் உள்ள தேர்வாளர்கள் விருதுக்குரிய படங்களையும், சிறந்த நடிகர்–நடிகைகளையும் தேர்ந்தெடுப்பார்கள்.
இந்த ஆண்டு இந்தியாவிலிருந்து யாஷ்ராஜ் நிறுவனம் தயாரித்த டிட்லி என்ற இந்திப் படம் மட்டும் விழாவில் கலந்து கொள்கிறது. கவுரவப் பிரிவில் இந்தப் படத்துக்கு இடம் கிடைத்துள்ளது. போட்டிப் பிரிவுக்கோ, போட்டியில்லாத பிரிவுக்கோ எந்த இந்தியப் படமும் போகவில்லை. நாளை தொடங்கி, வரும் மே 25 வரை நடக்கும் இந்த விழாவில் தமிழகத்திலிருந்து நடிகர் கமல் ஹாசன் சென்று கலந்து கொள்கிறார். அவருடன் பிலிம்சேம்பர் நிர்வாகிகளும் செல்கின்றனர்.