தரூர் ராஜிநாமாவை பிரதமர் ஏற்றது ஏன்? விளக்கம் அளிக்க பாஜக வலியுறுத்தல்

by **Tamil** Tue Apr 20, 2010 8:38 pm

புது
தில்லி, ஏப்.20: மத்திய வெளியுறவு இணை அமைச்சர் பதவியை சசி தரூர் ராஜிநாமா
செய்துவிட்ட போதிலும், பிரச்னை அத்துடன் முடிந்தபாடில்லை. தரூர்
ராஜிநாமாவை பிரதமர் ஏற்றதற்கான காரணத்தை விளக்க வேண்டும் என பாஜக
வலியுறுத்தியுள்ளது.÷கொச்சி ஐபிஎல் அணி ஏலத்தில் எடுத்த
விவகாரத்தில் ஆரம்பம் முதலே சசி தரூர் பெயர் இடம்பெற்றது. அதன் பங்குதாரர்
பெயரை ஐபிஎல் ஆணையர் லலித் மோடி வெளியிட்டவுடன் பிரச்னை
விஸ்வரூபமெடுத்தது. சசி தரூரின் பெண் நண்பர் சுனந்தா புஷ்கருக்கு ரூ. 70
கோடி மதிப்பிலான பங்குகள் இலவசமாக அளிக்கப்பட்டது தெரியவந்தது. இதையடுத்து
தனது அதிகாரத்தை தரூர் தவறாகப் பயன்படுத்தியதாக எதிர்க்கட்சிகள் குற்றம்
சாட்டின.÷இது தொடர்பாக மூத்த அமைச்சர்கள் பிரணாப் முகர்ஜி, ஏ.கே.
அந்தோனி ஆகியோரிடம் இரண்டு முறை நேரில் விளக்கம் அளித்தார் தரூர். பின்னர்
வெளிநாடு சுற்றுப் பயணம் முடித்துக் கொண்டு திரும்பியவுடன் பிரதமரை நேரில்
சந்தித்தார். அப்போது ராஜிநாமா செய்யும்படி பிரதமர் கேட்டுக் கொண்டார்.
இதையடுத்து ராஜிநாமா கடிதத்தை தரூர் அளித்தார். அதை உடனடியாக ஏற்று,
குடியரசுத் தலைவருக்கு அனுப்பி வைத்தார். ÷இந்நிலையில் சசி தரூரை
கட்டாயமாக ராஜிநாமா செய்யும் அளவுக்கு பிரதமர் நிர்பந்தித்தது ஏன்?
விசாரணை நடத்தியதில் அவருக்குக் கிடைத்த தகவல் என்ன? எந்த அடிப்படையில்
அவரது ராஜிநாமாவை பிரதமர் ஏற்றுக் கொண்டார் என்பதை விளக்க வேண்டும் என்று
பாஜக வலியுறுத்தியது.÷மக்களவையில் பேசும்போது சசி தரூர்,
விசாரணைக்குத் தயார் என குறிப்பிட்டிருந்தார். இது தொடர்பான விவரத்தை
பிரதமர் அளிப்பார் என எதிர்பார்க்கிறோம். இல்லையெனில் எந்த காரணத்திற்காக
அவரது ராஜிநாமாவை ஏற்றீர்கள்? என்பதை விளக்குமாறு பிரதமரை வற்புறுத்துவோம்
என்று செய்தியாளர்களிடம் பேசுகையில் பாஜக மாநிலங்களவைத் துணைத் தலைவர்
எஸ்.எஸ். அலுவாலியா தெரிவித்தார்.÷மாநிலங்களவையில் சசி தரூர் வந்து
விளக்கம் அளிக்க விரும்பினால், அதை பாஜக அனுமதிக்கும். இந்த விஷயத்தில்
முழு உண்மை வெளிவரும் வரை பாஜக தொடர்து குரல் கொடுப்பதென கட்சியின்
நாடாளுமன்ற குழு கூட்டத்தில் முடிவு செய்யப்பட்டதாக அவர் தெரிவித்தார்.
சசி தரூர் மீது கூறப்பட்ட குற்றச்சாட்டு குறித்து விசாரணை நடத்தப்பட்டதா?
அப்படியெனில் விசாரணைக் குழு நடத்திய விசாரணையின் முடிவுகள் என்ன? என்பதை
வெளியிடுமாறு வலியுறுத்தப் போவதாக அவர் கூறினார். ÷சத்தீஸ்கர்
மாநிலம் தந்தேவாடாவில் நக்ஸல் தாக்குதல் குறித்து விவாதிக்க வேண்டும்
என்று பாஜக வலியுறுத்தியதை ஏற்று அரசு விவாதத்துக்கு ஒப்புக் கொண்டதே
பாஜகவுக்குக் கிடைத்த முதலாவது வெற்றி. முதலில் விவாதத்துக்கு அரசு
மறுத்தது. பின்னர் பாஜகவின் நெருக்குதல் காரணமாக ஒப்புக் கொண்டது. ஐக்கிய
முற்போக்குக் கூட்டணி அரசின் முதலாவது தோல்வி சசி தரூரின் ராஜிநாமா. இந்த
விஷயத்தில் பாஜகவின் நிலைப்பாட்டை சரி என ஏற்று மற்ற எதிர்க்கட்சிகளும்
ஒரே திசையில் வலியுறுத்த கடைசியில் தரூர் ராஜிநாமா தவிர்க்க முடியாததானது.
÷விலைவாசி உயர்வு குறித்து வெட்டுத் தீர்மானம் கொண்டுவர வேண்டும்
என பாஜக தொடர்ந்து வலியுறுத்துகிறது. இது தொடர்பாக பிரமாண்டமான பேரணி
புதன்கிழமை நடத்தப்படுகிறது. ராமலீலை மைதானத்தில் பொதுக்கூட்டத்தில்
தொடங்கி பின்னர் நாடாளுமன்றத்தை முற்றுகையிடும் ஆர்ப்பாட்டமாக இப் பேரணி
நடைபெற உள்ளது. இப்பேரணியில் அதிக எண்ணிக்கையில் தொண்டர்கள்
பங்கேற்பார்கள் என எதிர்பார்ப்பதாகவும் அவர் குறிப்பிட்டார்.