திருநள்ளாறில் சனீஸ்வரனை வழிபடச் சென்ற இலங்கை அகதிகளுக்குச் சோதனை!

by **logu** Mon Aug 12, 2013 7:44 am

திருநள்ளாறில் சனீஸ்வரனை வழிபடச் சென்ற இலங்கை அகதிகளுக்குச் சோதனை!

தமிழகத்தின் பல்வேறு இடங்களிலும் உள்ள முகாம்களில் இலங்கை அகதிகள் உள்ளனர். முகாம்களில் தங்கி உள்ளவர்கள் வெளியே சென்று வர வேண்டும் என்றால் உரிய அனுமதி பெற வேண்டும்.இந்நிலையில், வேலூர் அகதிகள் முகாமிலிருந்து 3 பேர் அங்கிருந்து வெளியேறி, திருநள்ளாறுக்கு வந்துள்ளதாக கியூ பிரிவு போலீசாருக்கு தகவல் கிடைத்தது. அத்தகவலின் பேரில், கியூ பிரிவு போலீசார் நேற்று முன்தினம் இரவு திருநள்ளாறுக்கு ரகசியமாக வந்து, அவர்கள் தங்கியிருந்த லாட்ஜூக்கு சென்று அவர்களிடம் விசாரணை நடத்தி விட்டுச் சென்றனர்.

இதுகுறித்த தகவல் அறிந்த திருநள்ளாறு போலீஸ் இன்ஸ்பெக்டர் மரிகிறிஸ்டியன் என்கிற பால், சப்இன்ஸ்பெக்டர் பூபதி மற்றும் போலீசார் அகதிகள் தங்கியிருந்த லாட்ஜூக்கு சென்று அவர்களிடம் விசாரணை செய்தனர். விசாரணையில் அவர்கள் இலங்கைத் தமிழர்களான ராஜபாண்டியன்(50),அவரது மகள் சுபாஷிணி(33) மற்றும் நண்பரின் மகன் ஜேம்ஸ்(17) என்பதும், வேலூர் அகதிகள் முகாமில் தங்கி இருப்பவர்கள் என்பதும் தெரியவந்தது. ஆனால் அவர்களிடம் அதற்கான அடையாள அட்டை இல்லை. அவசரமாக கிளம்பி வரும்போது தவறுதலாக முகாமிலேயே வைத்துவிட்டு வந்து விட்டதாக கூறினார்கள்.
எனவே போலீசார் வேலூர் அகதிகள் முகாமை தொடர்பு கொண்டு விசாரித்தபோது அவர்கள் 3 பேரும் தங்களது முகாமை சேர்ந்தவர்கள்தான், திருநள்ளாறு சனீஸ்வரபகவானை தரிசனம் செய்து விட்டு வருவதாக முகாமில் தெரியப்படுத்தி விட்டுத் தான் வந்துள்ளார்கள் என்றும் முகாம் பொறுப்பாளர்கள் கூறியுள்ளனர். அதனை தொடர்ந்து முகாம் பொறுப்பாளர் நேரில் வந்து அவர்களை அடையாளம் காட்டி, பின்னர் அவர்களை அழைத்துச் செல்லும்படி போலீசார் கூறியதை தொடர்ந்து, வேலூர் அகதிகள் முகாம் பொறுப்பாளர் ரவீந்திரன் திருநள்ளாறுக்கு வந்து 3 பேர் அடையாள அட்டைகளையும் போலீசாரிடம் காட்டினார். அதனைத் தொடர்ந்து இலங்கை அகதிகள் 3 பேரையும் போலீசார் அவருடன் அனுப்பி வைத்தனர்.